გრიგოლ რობაქიძის უნივერსიტეტის რექტორის მრჩეველი ანა აბესაძე განათლების საერთაშორისო ჯილდოს, GESS Education Award-ის 13 ფინალისტს შორის დასახელდა, რომელშიც 60 ქვეყნის განათლების სფეროს 900-ზე მეტი წარმომადგენელი მონაწილეობდა. მან აღიარება მოიპოვა კატეგორიაში – „განათლებაში შეტანილი განსაკუთრებული წვლილისთვის“.
GESS განათლების ჯილდოსა და დაჯილდოების გალა ღონისძიების შესახებ, რომელიც 31 ოქტომბერს, დუბაიში, გაიმართა, ანა აბესაძე გვესაუბრა.
⇒ ანა, გილოცავთ GESS-ის განათლების ჯილდოს 13 ფინალისტს შორის დასახელებას. შეგიძლიათ გაგვიზიაროთ თქვენი თავდაპირველი რეაქცია და ემოციები, როდესაც შეიტყვეთ ამ პრესტიჟული აღიარების შესახებ?
დიდი მადლობა, ჩემთვის ნამდვილად დიდი პატივია, ვიყო ამ პრესტიჟული ჯილდოს ფინალისტი. როცა შეტყობინება მივიღე, GESS განათლების ჯილდოს ფინალისტად დასახელების შესახებ, პასპორტის კონტროლს გავდიოდი კვიპროსში, საქმიანი მოგზაურობის დროს. უნდა ვაღიარო, მადლიერებასთან და სიხარულთან ერთად, დიდი პასუხისმგებლობა ვიგრძენი.
მადლობელი ვარ, რადგან ვერ მივაღწევდი ამ აღიარებას გრიგოლ რობაქიძის უნივერსიტეტის რექტორის, ბატონი მამუკა თავხელიძისა და ჩემი ერთგული კოლეგების მხარდაჭერის გარეშე. ეს როგორც ინდივიდუალური, ასევე უნივერსიტეტის საქმიანობის დადებითი გავლენის საერთაშორისო აღიარებაა, ჩვენი სტუდენტების განათლებისა და მომავალი საზოგადოების ჩამოყალიბებაში შეტანილი წვლილისთვის.
აღნიშნულმა უფრო დიდი სტიმული და, ამასთანავე, პასუხისმგებლობა შემმატა, რათა ფეხი ავუწყოთ განათლების სფეროს საერთაშორისო ტენდენციებს და შევქმნათ გარემო, რომელიც წარმატებით გაუმკლავდება თანამედროვე, გლობალურ გამოწვევებს და ჩვენს კურსდამთავრებულებს აღჭურავს საუკეთესო ცოდნითა და უნარებით.
⇒ რას წარმოადგენს GESS Education Award და საიდან მიიღეთ ინფორმაცია ამ საერთაშორისო ჯილდოს შესახებ?
GESS Education Award განათლების ინდუსტრიაში მსოფლიოს ერთ-ერთი წამყვანი ჯილდოა, რომლის გალა საღამო ყოველწლიურად იმართება დუბაიში. საერთაშორისო ჯილდოს მიზანია, გამოავლინოს და წაახალისოს განათლების ინდუსტრიის ლიდერები, ინსტიტუტები და საგანმანათლებლო პროდუქტები. GESS Education Award-ის შესახებ ინფორმაციას პროფესიულ სოციალურ პლატფორმა ლინქდინზე გადავაწყდი, სადაც შეტყობინება მივიღე აღნიშნულ ჯილდოზე.
⇒ რა იყო GESS Education-ის გალა საღამოს მთავარი მესიჯი?
საღამოზე, რომელიც ნამდვილად დასამახსოვრებელი იყო, არაერთი საინტერესო სპიკერი გამოვიდა, რომლებმაც ხაზი გაუსვეს ხარისხიანი განათლების მნიშვნელობას. GESS Education-ის გალა საღამოს ესწრებოდნენ განათლების ინდუსტრიის ლიდერები მსოფლიოს სხვადასხვა ქვეყნიდან. ამ ღონისძიებამ შესაძლებლობა მომცა, ახალი კავშირები დამემყარებინა განათლების წამყვან ინსტიტუტებთან სამომავლო თანამშრომლობისთვის და ახალი მემორანდუმებიც გამეფორმებინა.
⇒ ანა, როგორ ფიქრობთ, რომელმა ინიციატივამ ითამაშა გადამწყვეტი როლი, ამ ნომინაციის გამარჯვებულად თქვენ რომ დასახელდით?
ვფიქრობ, ჩემი დასახელება ჯილდოს ფინალისტად შეიძლება მივაწეროთ რიგ მნიშვნელოვან ინიციატივებს წინა აკადემიური წლიდან, რომელთაგან შემდეგს გამოვყოფ: ვინაიდან გრუნის ამბიცია საერთაშორისო დონის პროფესიონალების ჩამოყალიბებაა, ვცდილობთ, გეოგრაფიული საზღვრები გავარღვიოთ და სტუდენტები გლობალურ შესაძლებლობებთან დავაკავშიროთ. ერთ-ერთი მთავარი წამოწყება, რამაც დიდი გავლენა მოახდინა სტუდენტებზე, ახალგაზრდულ ასოციაციებთან თანამშრომლობის ფარგლებში, სტუდენტების ევროკავშირის საერთაშორისო სემინარებზე გაშვებაა ევროპაში. აღნიშნული შესაძლებლობა არა მარტო პროფესიული კუთხით ზრდის ახალგაზრდებს, არამედ სძენს მულტიკულტურულ გამოცდილებას და ეხმარება ენის ცოდნის გაუმჯობესებაში. ბოლო კვლევებმა აჩვენა, რომ არაფორმალური განათლების ფორმალურ განათლებასთან ინტეგრირება დადებით გავლენას ახდენს სტუდენტების წარმატებასა და სწავლის საერთო შედეგებზე.
ამასთანავე, აქტიურად ვთანამშრომლობთ უცხოურ კომპანიებთან, რათა სტუდენტები პირდაპირ კავშირზე გავიყვანოთ და მივცეთ ინგლისურენოვანი სტაჟირებების გავლის შესაძლებლობა. მთავრობის გაცვლითი პროგრამების საქართველოს მონაწილეთა ასოციაციის დახმარებით, ასევე, სტუდენტებს ლოკალურად ვაკავშირებთ მენტორებთან, რომლებსაც განათლება ამერიკაში ან ევროპაში აქვთ მიღებული. მენტორობის პროგრამა გულისხმობს მენტორის, მრავალწლიანი გამოცდილების მქონე წარმატებული სპეციალისტის, თანამშრომლობას მისივე სპეციალობის სტუდენტთან, ცოდნისა და გამოცდილების გაზიარებასა და კონსულტაციას, დახმარებას პროფესიულ დაოსტატებაში, პიროვნული უნარ-ჩვევების გამომუშავებასა და კარიერისთვის მომზადებაში.
იმის გათვალისწინებით, რომ ვაცნობიერებთ ამერიკული განათლების უპირატესობას მსოფლიო მასშტაბით, ვცდილობთ, მათგან ბევრი რამ ვისწავლოთ. მაგალითად, უნივერსიტეტი, როგორც პარტნიორი, წარმატებით თანამშრომლობს ტეხას ა&მ უნივერსიტეტთან, პროგრამის Paths to Publication ფარგლებში, რომელიც მოიცავს კვლევასთან, სამეცნიერო ნაშრომის მომზადებასთან, გამოქვეყნებასა და გრანტებთან დაკავშირებულ სემინარებს, რომელსაც მასპინძლობს ტეხას ა&მ უნივერსიტეტის განათლებისა და კვლევის სკოლა. სემინარების სერია განკუთვნილია აკადემიური პერსონალისა და ახალგაზრდა მკვლევრებისთვის. აღსანიშნავია, რომ ახლახან Wall Street Journal-ში გამოქვეყნებული მონაცემების მიხედვით, ტეხას ა&მ უნივერსიტეტი პირველ უნივერსიტეტად დასახელდა ტეხასის შტატში, ხოლო მეექვსე სახელმწიფო უნივერსიტეტად – აშშ-ში. ასევე, აშშ-ის საელჩოს მხარდაჭერით, უკვე მეორე წელია, ჩვენს უნივერსიტეტს მიემაგრა ინგლისური ენის ექსპერტი, რომელიც პროგრამის „English Language Fellow“ ფარგლებში, ერთ წელს იმუშავებს, ასევე, აშშ-ის საელჩოს სპეციალისტის პროგრამის ფარგლებში, აკადემიურ პერსონალსა და სტუდენტებს ამერიკელი პროფესორი დაატრენინგებს.
ბოლოს, მინდა გამოვყო TESOL პროგრამა, რომლის ფარგლებშიც გრუნიმ 30-მდე ინგლისური ენის მასწავლებლის გადამზადება დააფინანსა საქართველოს მასშტაბით და აქტიურად აგრძელებს ამ საქმიანობას, რაც ზოგადსაგანმანათლებლო დაწესებულებებისადმი გრუნის კიდევ ერთი უპრეცედენტო მხარდაჭერის გამოხატულებაა. 3-თვიანი TESOL პროგრამა, რომელსაც ტეხას ა&მ უნივერსიტეტის კვლევებისა და განვითარების ცენტრი უწევს ადმინისტრირებას, იმისთვის შეიქმნა, რომ დაეხმაროს ქართველ ლექტორებს/მასწავლებლებს, განაახლონ ცოდნა სწავლების საუკეთესო მეთოდებისა და პრაქტიკის გაცნობით და შეიძინონ ის უნარ-ჩვევები, რომლებიც მათ დაეხმარება, ასწავლონ ინგლისური ენა მსოფლიოს ნებისმიერ ქვეყანაში როგორც ფიზიკურად, ისე ვირტუალურად. პროგრამის დასრულების შემდეგ, კურსდამთავრებულები საერთაშორისოდ აღიარებულ სერტიფიკატს იღებენ. მათ, ასევე, ექნებათ შესაძლებლობა, მიღებული ცოდნა უანგაროდ გადასცენ ქართველ მოსწავლეებს, მათ შორის სოციალურად დაუცველ მოსწავლეებს, რათა ხელი შევუწყოთ ინკლუზიური საგანმანათლებლო გარემოს შექმნას.
⇒ რას ნიშნავს თქვენთვის ეს აღიარება?
ჩემთვის ეს აღიარება ნიშნავს კიდევ ერთ დასტურს, რომ საქართველოში დაბრუნება სწორი არჩევანი იყო, აშშ-ში 3-წლიანი მუშაობის შემდეგ. აშშ-ის შტატის დეპარტამენტისა და ევროკავშირის გრანტების მოპოვების შემდეგ, რამაც ამერიკასა და ევროპაში უფასო სწავლის შესაძლებლობა მომცა, ნამდვილად დიდი პასუხისმგებლობა დამეკისრა. ამ ინსტიტუტებს ღრმად სჯეროდათ, რომ ჩემნაირ ახალგაზრდებში ინვესტიციით, ისინი საქართველოს მომავალს ეხმარებოდნენ. ექვს ქვეყანაში სწავლისა და მუშაობის გამოცდილების შემდეგ, საქართველოს დავუბრუნდი დიდი მოტივაციით, რომ მიღებული ცოდნის რეალიზება აქ მომეხდინა, ხოლო ეს აღიარება კი დასტურია იმისა, რომ სწორი გზით მივდივარ.
⇒ GESS-ის განათლების ჯილდო საქართველოში, თქვენ გარდა, სხვა ინდივიდს ან ინსტიტუტს თუ აქვს მიღებული?
სამწუხაროდ, აღნიშნულზე არ მაქვს ინფორმაცია. მინდა, ამ ჯილდოს შესახებ ბევრმა ქართველმა კოლეგამ, საგანმანათლებლო ინსტიტუტმა და ორგანიზაციამ გაიგოს. ეს დიდი შესაძლებლობაა არა მარტო აღიარების მისაღებად, არამედ განათლების სფეროში საუკეთესო პარტნიორების შესაძენად, საუკეთესო პრაქტიკების გასაცვლელად და ისეთი გადაწყვეტილებების მისაღებად, რომელიც გლობალური განათლების მიზნებთან იქნება შესაბამისობაში.
⇒ შეგიძლიათ გვითხრათ, ვინ ან რამ მოახდინა გავლენა თქვენს კარიერაზე და იმაზე, თუ როგორ უდგებით თქვენს საქმიანობას?
მყავს ბევრი მისაბაძი ადამიანი, მენტორი მსოფლიოს მასშტაბით. კონკრეტულად განათლების სფეროში და საქართველოში კი, პირველი მახსენდება ბატონი მამუკა თავხელიძე. განსაკუთრებით რასაც ვაფასებ, არის მისი თავმდაბლობა, ამდენი რეგალიის მიუხედავად და სტუდენტებისადმი დიდი სიყვარული და თავგანწირვა. ადამიანი, რომელიც ყველა ინიციატივაში დებს ინვესტიციას, თუ სჯერა რომ ის ერთი სტუდენტის ცხოვრებაზე მაინც მოახდენს დადებით ცვლილებას. ალბათ, განსაკუთრებით ამის გამო, ჩვენი ხედვები ერთმანეთს ემთხვევა და ძალიან წარმატებულად ვთანამშრომლობთ, უკვე მესამე წელია.
⇒ რას ურჩევდით, საკუთარი გამოცდილებიდან გამომდინარე, განათლების სფეროს პროფესიონალებს, რომლებიც ასევე დადებითი ცვლილებებისკენ მიისწრაფვიან?
რაც არ უნდა ბანალურად ჟღერდეს, ძალიან მნიშვნელოვანია ადაპტაციის უნარის გამომუშავება და ცნობისმოყვარეობა ახალი იდეების, განათლების ტენდენციებისა და საუკეთესო პრაქტიკის მიმართ, რადგან განათლება მუდმივად განვითარებადი სფეროა და აუცილებელია ფეხის აწყობა. საუნივერსიტეტო მუშაობიდან გამომდინარე, ასევე, არსებითი მნიშვნელობა აქვს სტუდენტებზე ორიენტირებული მიდგომით ხელმძღვანელობას და მათი ინტერესებისა და საჭიროებების პირველ ადგილზე დაყენებას. არანაკლებ მნიშვნელოვანია კოლეგებთან თანამშრომლობა როგორც ადგილობრივ, ისე გლობალურ დონეზე. გამოცდილებისა და საუკეთესო პრაქტიკის განათლების პროფესიონალებთან და ინსტიტუტებთან გაზიარებამ შეიძლება ახალი ინიციატივები და პროექტების იდეები დაბადოს.
ესაუბრა მაკა ყიფიანი
