გურამ დევდარიანის საავტორო ფიზიკა-მათემატიკური სკოლა (დირექტორი — გულნარა დევდარიანი) არაერთი საინტერესო და შემეცნებითი ღონისძიების ავტორია. სკოლის მთავარი საზრუნავი და მოთხოვნა მოსწავლეზე ორიენტირებული სწავლებაა. განსაკუთრებული ყურადღება ექცევა სწავლების ერთ-ერთ ფორმას – პროექტების შემუშავებას, რომელთა მომზადება მოსწავლეს შეძენილი უნარ-ჩვევების პრაქტიკულად გამოყენებას აჩვევს. ამ ყველაფერს კი, სკოლის პროფესიონალი პედაგოგები უდგანან სათავეში.
ერთ-ერთი მათგანია ქართული ენისა და ლიტერატურის პედაგოგი მზია ტყემალაძე, რომელიც თავისი საქმიანობით თითქოს ეხმიანება შოთა ნიშნიანიძის ქართულის მასწავლებლისადმი მიძღვნილ სიტყვებს: „აყმუვლდებიან შენი დაზრდილნი, როგორც ალგეთზე ლეკვნი მგლისანი!..“ იგი მრავალი საინტერესო ღონისძიებისა თუ ინიციატივის ავტორად გვევლინება.
„ციხე-ტაძართა საგალობელი“ – ასე ერქვა ქალბატონი მზიას მიერ, სკოლის ბიბლიოთეკის გამგის, სვეტლანა კონჯარიას თანადგომით, განხორციელებულ პროექტს, რომელზეც X-XI კლასების მოსწავლეებმა იმუშავეს, რაც გულისხმობდა ტაო-კლარჯეთის ტერიტორიაზე არსებული ეკლესია-მონასტრების გაცნობას. ამ ყველაფერს წინ უსწრებდა მოსწავლეთა ვიზიტი ხელნაწერთა ეროვნულ ცენტრში, სადაც ტაძრებზე შესრულებულ ხელნაწერებს გაეცნენ.
პროექტის პრეზენტაციის დღე არასოდეს დაავიწყდებათ მოსწავლეებს, მასწავლებლებსა და სკოლის სტუმრებს. სრულიად განსხვავებული, ორიგინალური ფორმით ჩატარებულმა ღონისძიებამ საოცრად ლამაზ, ამავდროულად, სევდიან და შინაარსობრივად დატვირთულ სამყაროში, საქართველოს ძირძველ კუთხეში, ტაო-კლარჯეთში გვამოგზაურა.
დარბაზში თითქოს ჩვენი ქვეყნის წარსული დიდების სურნელი ტრიალებდა… გრიგოლ ხანძთელისა და უცხო მიწაზე მოღვაწე წმინდანთა ლოცვა-მადლს შეიგრძნობდა ყველა.
სცენაზე ერთმანეთს ენაცვლებოდნენ მოსწავლეები: ელენე ბერიძე, ნათია იანვარაშვილი, დავით ლესელიძე, ნიკოლიზ მეტრეველი, ელენე მირუაშვილი, მარი ფალავანდიშვილი, ლუკა იველაშვილი, მარიამ მუსელიანი, საბა სულაქველიძე, რომლებმაც ხანძთის, შატბერდის, ოშკის, მერეს, ოპიზას, იშხანის, ბანას ისტორიულ წარსულში გვამოგზაურეს და ამ ტაძრებზე შესრულებული, დღემდე შემორჩენილი, წარწერებისა და ხელნაწერების, ხუროთმოძღვრული სტილის შესახებ გვესაუბრნენ. პარალელურად, სცენაზე, სლაიდების სახით, თითოეული მონასტრის ამსახველი მასალა გადიოდა, ფონად კი ქართული საგალობლები მიჰყვებოდა.
დამსწრე საზოგადოებას დიდხანს გაჰყვება ამ დღეს მიღებული შთაბეჭდილება. კიდევ ერთხელ დაგვარწმუნეს ბავშვებმა, რომ ჩვენს ქვეყანას კვლავ ეზრდება მამულზე, ენასა და სარწმუნოებაზე შეყვარებული თაობა.
მსგავსი ღონისძიებები სწავლების ხარისხის ამაღლებას ემსახურება, რაც, თავის მხრივ, დამოკიდებულია სკოლის ადამიანურ, მატერიალურ რესურსებსა და სწორ სტრატეგიაზე, რაც ჩვენს სკოლაში თანმიმდევრულად ხორციელდება.
