14 თებერვალს, საქართველოს პარლამენტის ეროვნულ ბიბლიოთეკაში, საქართველოს „დამოუკიდებლობის დარბაზში“ ჩატარდა გამარჯვებული ინოვაციური მეთოდის გამოფენა-პრეზენტაცია, სახელწოდებით – „ქართულ-იაპონური კულტურის სინთეზი ქართულ მწერლობაში“, პროექტის ხელმძღვანელი – მასწავლებლის ეროვნული პრემიის მფლობელი, ფილოლოგი ნინო ჯალაღონია.
პროექტში ჩართული იყო თბილისის რამდენიმე საჯარო თუ კერძო სკოლა, კერძოდ:
- №166 საჯარო სკოლა;
- №141 საჯარო სკოლა;
- № 79 საჯარო სკოლა;
- № 32 საჯარო სკოლა;
- საპატრიარქოს წმ. ილია მართლის სკოლა.
გამოფენა-პრეზენტაციაში მონაწილეობდნენ აღნიშნული სკოლების მოსწავლეები და მასწავლებლები: ნინო მაჭარაშვილი, გალინა ქადაგიშვილი, მარინა ჯანგველაძე, მანანა ბერიაშვილი, მანანა წიკლაური, ლელა ლომიძე და სხვ; ესწრებოდნენ მოწვეული სტუმრები: იაპონიის საელჩოს კულტურის ატაშე რიოსეი სუგინაკა; ლიტერატორი, პუბლიცისტი, ფილოლოგიის დოქტორი იოსებ ჭუმბურიძე; გამომცემლობა „დიოგენეს“ სტრატეგიული კომუნიკაციის მენეჯერი მეგი რუსია; იაპონოლოგი, მთარგმნელი თამთა ბოკერია.
ღონისძიება თბილისის №141 სკოლის მოსწავლეებმა გახსნეს, მათ მხატვრულად წაიკითხეს ამონარიდები იაპონელი მწერლის, ნაცუმე სოსეკის მოთხრობების კრებულიდან „ათი ღამის სიზმრები“.
წარმოდგენილი იყო ქართველი მწერლებისა და პოეტების შემოქმედება, იაპონური მანგას სახით, კერძოდ: შოთა რუსთაველის პოემა „ვეფხისტყაოსანი“, სულხან-საბა ორბელიანის იგავ-არაკები, ნიკოლოზ ბარათაშვილის, ვაჟა-ფშაველას, გალაკტიონის, ანა კალანდაძის და სხვათა შემოქმედება.
ასევე საინტერესოდ წარმოადგინეს ქართულ-იაპონური ჰაიკუები, პოეზია ნახატების საშუალებით იყო გადმოცემული. ღონისძიებას ამშვენებდა მოსწავლეების მიერ დამზადებული ქართულ-იაპონური აქსესუარები, რომლებმაც აღფრთოვანებაში მოიყვანა იაპონელი სტუმარი.
პროექტი აქტუალურია იმდენად, რამდენადაც მოსწავლეები დაინტერესებული არიან „იაპონური მანგით“. სწავლა-სწავლება ხელს უნდა უწყობდეს მოსწავლეთა შინაგანი ძალების გააქტიურებას.
პროექტის მიზანი – მოსწავლეთა მიღწევების გაუმჯობესება, კლასში ნასწავლი მასალის გამეორება-გამყარება, დამოუკიდებლად სწავლის უნარის განვითარება, თვითდისციპლინის გამომუშავება, პასუხისმგებლობის გრძნობის გაზრდა, დროის სწორად განაწილების უნარის ჩამოყალიბება, სკოლაში დაწყებული სასწავლო აქტივობების გაგრძელება. მოსწავლეებს ეძლევათ შემოქმედებითი უნარების გამოხატვის თავისუფლება. სწორედ ამითაა ორიგინალური და განსაკუთრებული მოსწავლეზე ორიენტირებული პროექტი. სწავლის პროცესში მართებული ხერხებისა და მიდგომების გამოყენება წარმატებული სწავლის განმსაზღვრელი ფაქტორია.
დაბოლოს, უახლოეს მომავალში, აღნიშნულ ინოვაციურ მეთოდთან დაკავშირებით, ჩანიშნულია „ვორქშოპების“ საზღვარგარეთ ჩატარება და ნამუშევრების გამოფენა-პრეზენტაცია ქართველი ემიგრანტებისა და ტურისტებისათვის.
ნინო ჯალაღონია
პედაგოგი
