მაკა პაპავა
სსიპ ზუგდიდის მუნიციპალიტეტის სოფ. ახალაბასთუმნის საჯარო სკოლის ისტორიის წამყვანი მასწავლებელი
მესამე თაობის ეროვნულმა სასწავლო გეგმამ ახალი ვალდებულება დააკისრა საგანმანათლებლო საზოგადოებას – ფუნქციური უნარების განვითარება. ფუნქციური უნარები ყველა იმ უნარ-ჩვევათა ერთობლიობაა, რომელიც მოსწავლეებს პიროვნული თვითგანვითარებისთვის ესაჭიროებათ. თითოეულის გამომუშავება უნდა მოხდეს სასკოლო გარემოში.
ფუნქციურ-კომპონენტური უნარებია:
♦ კრიტიკული აზროვნება;
♦ შემოქმედებითობა;
♦ კომუნიკაცია;
♦ კოლაბორაცია;
♦ მოქალაქეობა;
♦ ხასიათი/ნებელობა.
განვიხილოთ ექვსივე ფუნქციური უნარი.
მასწავლებლის ამოცანაა, კომპლექსურ დავალებაზე მუშაობის პროცესში, ჰკითხოს საკუთარ თავს: რამდენად უწყობს ხელს ჩემ მიერ დაგეგმილი და განხორციელებული აქტივობები/პროვოცირებული შეკითხვები კრიტიკულ აზროვნებასთან დაკავშირებული კოგნიტური ოპერაციების გააქტიურებას? სწორედ ამას გულისხმობს კრიტიკული აზროვნება.
კრიტიკულ აზროვნებასთან დაკავშირებული კოგნიტური ოპერაციები/კომპონენტებია:
- დაკვირვება – გახსენება, ამოცნობა;
- კანონზომიერების აღმოჩენა და განზოგადება – შედარება და დაპირისპირება (კონტრასტი), კლასიფიცირება, რელევანტური და არარელევანტური ინფორმაციის იდენტიფიცირება;
- დასკვნების ჩამოყალიბება კანონზომიერებების საფუძველზე – პირველადი დასკვნა, ვარაუდის გამოთქმა;
- დასკვნების შეფასება დაკვირვების საფუძველზე – თანმიმდევრულობის შემოწმება, ტენდენციურობის, სტერეოტიპების, კლიშეებისა და პროპაგანდის, უსაფუძვლო დაშვებების იდენტიფიცირება, გადამეტებული განზოგადების ან მცირედ განზოგადების ამოცნობა, დასკვნების ფაქტებით დადასტურება.
რას გულისხმობს შემოქმედებითობა? მასწავლებლის ამოცანაა, კომპლექსურ დავალებაზე მუშაობის პროცესში, ჰკითხოს საკუთარ თავს: რამდენად უწყობს ხელს ჩემ მიერ დაგეგმილი და განხორციელებული აქტივობები/ პროვოცირებული შეკითხვები შემოქმედებით უნართან დაკავშირებული კოგნიტური ოპერაციების გააქტიურებას?
შემოქმედებითი უნარების განვითარებისათვის საჭიროა კოგნიტური ოპერაციები:
♦ თავისუფლად აზროვნება – კითხვების დასმა, იდეების გენერირება; პრობლემის გადაჭრის გზების დასახელება; ალტერნატიული პასუხების ძიება და პრობლემის გადაჭრის გზების შემოთავაზება;
♦ ფლექსიურობა – პრობლემის დანახვა და შეფასება სხვადასხვა პერსპექტივიდან, მიდგომების მრავალფეროვნება;
♦ ორიგინალობა – უნიკალური და ახალი იდეის გენერირება, სხვადასხვა ელემენტისგან უნიკალური კომბინაციების შექმნა;
♦ დეტალებზე ყურადღების გამახვილება – იდეების განვითარება და გამდიდრება დეტალიზაციის ხარჯზე.
მასწავლებლის ამოცანაა, მოსწავლეს საშუალება მისცეს გააანალიზოს კომპლექსურ დავალებაზე მუშაობის პროცესი. ანალიზისას კი, მოსწავლეს ყურადღება გაამახვილებინოს კომუნიკაციასთან დაკავშირებულ კომპონენტებზე. სწორედ ამაში მდგომარეობს კომუნიკაციური უნარის მნიშვნელობა.
კომუნიკაციასთან დაკავშირებული კომპონენტებია:
♦ ინფორმაციის ნათლად და შინაარსიანად გამოხატვა – მიზნობრიობა (ინფორმირება, ინსტრუქტირება, მოტივირება, დარწმუნება), მეტყველების ტიპის შერჩევა – აღწერა, თხრობა, მსჯელობა, აქტიური მოსმენა (კავშირის დამყარება, ნდობის მოპოვება, დიალოგში გაყოლა (ანუ მონიტორინგი), მიზნობრივი ფრაგმენტულობა), კონტექსტუალიზება (საკომუნიკაციო სიტუაციის გაანალიზება და გამოხატვის რელევანტური საშუალების შერჩევა (სათანადო ფუნქციური სამეტყველო ქმედების გამოყენება), არავერბალური სიგნალები (სხეულის ენა, მიმიკა, ჟესტიკულაცია და ა.შ.);
♦ თავდაჯერებულობა – ღიაობა, კეთილგანწყობა;
♦ ემპათია (სხვისი თვალით დანახვა) – თვითრეფლექსია/უკუკავშირი, ურთიერთობის მონიტორინგი;
♦ აღიარება – თანასწორობა, პასუხისმგებლობა, ტოლერანტობა (განსხვავებულის მიმღებლობა), ორიენტაცია პრობლემაზე და არა კომუნიკაციაში ჩართულ სუბიექტზე.
მასწავლებელმა მოსწავლეს საშუალება უნდა მისცეს, გააანალიზოს კომპლექსურ დავალებაზე მუშაობის პროცესი. ანალიზისას კი, მოსწავლეს ყურადღება გაამახვილებინოს კოლაბორაციასთან (თანამშრომლობასთან) დაკავშირებულ კომპონენტებზე. ეს კომპონენტები შემდეგში მდგომარეობს:
♦ ერთად მუშაობა – პირისპირ და ტექნოლოგიების გამოყენებით, იდეებისა და რესურსების გაზიარების გზით;
♦ საერთო პასუხისმგებლობა – საერთო მიზანი, ანგარიშვალდებულება შედეგთან მიმართებით;
♦ არსებითი გადაწყვეტილებები (შინაარსი, პროცესი, პროდუქტი) – წინარე ცოდნის გამოყენება გადაწყვეტილებების მიღების მიზნით, როლებისა და პასუხისმგებლობების განაწილება, პროდუქტის დიზაინი, ბუნება და გამოყენებითობა, ურთიერთდამოკიდებულება (ანგარიშვალდებულების ორი დონე – ინდივიდუალური და ჯგუფური).
აგრეთვე მასწავლებლის ერთ-ერთი პრიორიტეტული ამოცანაა, მოსწავლეს საშუალება მისცეს გააანალიზოს, ვისთან და როგორ მოუხდა თანამშრომლობა კომპლექსურ დავალებაზე მუშაობის პროცესში. ანალიზისას კი, მოსწავლეს ყურადღება გაამახვილებინოს მოქალაქეობის უნარის კომპონენტებზე.
ისევე, როგორც ნებისმიერ სხვა უნარს, მოქალაქეობის უნარებსაც აქვს კომპონენტები:
♦ უზენაესი ეთიკის პრინციპები – ადამიანის ღირსება, განსხვავებულებისადმი შემწყნარებლური დამოკიდებულება.
♦ ანგარიშვალდებულება საზოგადოებისადმი და თანაშემოქმედებითობა – პასუხისმგებლობა, კონფლიქტების მართვა, კანონის უზენაესობის დაფასება;
♦ თემის პრიორიტეტების გააზრება – ლოკალური თემისთვის აქტუალური პრობლემები, ქვეყნისთვის აქტუალური პრობლემები, მსოფლიოს ცოდნა და შემეცნება.
ამ კომპონენტთა განვითარებით ყალიბდება სრულფასოვანი მოქალაქე.
მას შემდეგ, რაც მასწავლებელი მოსწავლეს საშუალებას აძლევს გააანალიზოს კომპლექსურ დავალებაზე მუშაობის პროცესი, ყურადღება უნდა გაამახვილებინოს ხასიათის/ნებელობის უნარის კომპონენტებზე:
♦ იდენტობა – საკუთარი შესაძლებლობებისა და ინტერესების გაცნობიერება (ვინ ვარ მე), გადაწყვეტილების მიღება თვითრეალიზაციისთვის (რასთან ვაფილირდები);
♦ თვითრეგულაცია – მიზნების დასახვა, დაგეგმვა, თვითეფექტურობის განცდა, სწავლის სტრატეგიები, მონიტორინგი და შეფასება;
♦ თვითაქტუალიზაცია – ენთუზიაზმი ყველა საქმის მიმართ, ავტონომიურობა, საკუთარი თავის პოზიტიური შეფასება, ადამიანებისა და სამყაროს მიმართ კეთილგანწყობა, პროცესზე ორიენტირებულობა.
ეს იმ კომპონენტთა ერთობლიობაა, რომელსაც მოიცავს ხასიათის/ნებელობის უნარები.
ფუნქციურ უნართა ჩამოყალიბება და განვითარება მნიშვნელოვანი წინ გადადგმული ნაბიჯია მოსწავლის პიროვნებად ჩამოყალიბების პროცესში. მათი განვითარება დიდწილად დამოკიდებულია სწავლა-სწავლების წარმართვის პროცესზე, ვინაიდან მოსწავლეში სწორედ ამ დროს იბადება აღნიშნული უნარის მიმართ ინტერესი და მიმღებლობა.