სსიპ სენაკის მუნიციპალიტეტის სოფელ ლეძაძამეს საჯარო სკოლაში, 2021-22 სასწავლო წელს, ერთ-ერთი გამჭოლი პრიორიტეტული მიმართულებაა „ბუნების დაცვა“. სკოლა თანამშრომლობს საქართველოს გარემოს დაცვისა და სოფლის მეურნეობის სამინისტროსთან, სსიპ გარემოსდაცვითი ინფორმაციისა და განათლების ცენტრთან.
საქართველოს კონსტიტუციის 29-ე მუხლის თანახმად, ყველას აქვს უფლება, ცხოვრობდეს ჯანმრთელობისთვის უვნებელ გარემოში, სარგებლობდეს ბუნებრივი გარემოთი და საჯარო სივრცით; ყველას აქვს უფლება, დროულად მიიღოს სრული ინფორმაცია გარემოს მდგომარეობის შესახებ; ყველას აქვს უფლება, ზრუნავდეს გარემოს დაცვაზე, გარემოსდაცვით საკითხებთან დკავშირებით გადაწყვეტილებების მიღებაში. მონაწილეობის უფლება უზრუნველყოფილია კანონით.
ახლანდელი და მომავალი თაობების ინტერესების გათვალისწინებით, გარემოს დაცვა და ბუნებრივი რესურსებით რაციონალური სარგებლობა უზრუნველყოფილია კანონით. სსიპ გარემოსდაცვითი ინფორმაციისა და განათლების ცენტრის მიზანია: საზოგადოების გარემოსდაცვითი და აგრარული განათლების ხელშეწყობა და ცნობიერების ამაღლება, გადაწყვეტილებების მიღების პროცესში საზოგადოების ჩართულობა, ინფორმაციაზე ხელმისაწვდომობის უზრუნველყოფა, სამინისტროს ერთიანი ინფორმაციული ტექნოლოგიური პოლიტიკის დანერგვა.
გარემოსდაცვითი და აგრარული განათლების და ცნობიერების ამაღლების კუთხით სკოლაში ფორმალურ და არაფორმალურ განათლებას განსაკუთრებული მნიშვნელობა ენიჭება. ამ მიმართულებით აქტიურად მუშაობს საზოგადოებრივი და საბუნებისმეტყველო მეცნიერებათა კათედრა. სკოლას მჭიდრო კავშირი აქვს შოთა მესხიას ზუგდიდის სახელმწიფო სასწავლო უნივერსიტეტთან და სენაკის ბაზასთან (რექტორი – თეონა ხუფენია, დირექტორი – მანანა ჭანტურია).
ჩვენი სკოლის რამდენიმე კურსდამთავრებული ამჟამად ღებულობს როგორც უმაღლეს, ასევე პროფესიულ განათლებას აგრარული მიმართულებით, რეგიონის უმაღლეს და პროფესიულ სასწავლებელში, სადაც დანერგილია გარემოსდაცვითი და აგრარული მიმართულების მოდულები.
2021 წლის დეკემბერში გავიარე ტრენინგი „გარემოსდაცვითი და აგრარული განათლება სკოლაში“, რომელიც ჩაატარა საქართველოს გარემოს დაცვისა და სოფლის მეურნეობის სამინისტრომ, სსიპ გარემოსდაცვითი ინფორმაციისა და განათლების ცენტრთან ერთად.
ტრენინგი საინტერესო და მრავალფეროვანი იყო, პასუხობდა მესამე თაობის ესგ-ს, განხილული იყო შემდეგი თემები: მდგრადი განვითარების კონცეფცია, ბიომრავალფეროვნების დაცვა, წყლის რესურსების დაცვა და მდგრადი მართვა, ჰაერის დაცვა დაბინძურებისაგან, ნარჩენების მართვა, კლიმატის ცვლილება და ბუნებრივი საფრთხეების შემცირება, მიწის მართვა და გაუდაბნოების წინააღმდეგ ბრძოლა, სოფლის მეურნეობა, სურსათის უვნებლობა და ხარისხი. თითოეული თემა მოიცავდა თეორიულ მასალას პედაგოგებისთვის, თემასთან დაკავშირებულ აქტივობებს და კომპლექსურ დავალებებს. ტრენინგი საინტერესოდ მიჰყავდათ ტრენერებს: მანანა მაძღარაშვილს და ნინო გულმაგარაშვილს.
ამ მიმართულებით, ტრენინგი გაიარა აგრეთვე, მათემატიკის მაძიებელმა მასწავლებელმა, ფელიქს ხურცილავამ.
სახელმძღვანელოში წარმოდგენილი აქტივობები, გამჭოლადაა ინტეგრირებული სხვადასხვა საგანთან: ბუნებისმეტყველება, მათემატიკა, მე და საზოგადოება, ინფორმაციული და საკომუნიკაციო ტექნოლოგიები, ქართული ენა და ლიტერტურა, უცხოური ენა, სახვითი და გამოყენებითი ხელოვნება, მუსიკა, ფიზიკური აღზრდა და სპორტი.
ტრენინგის გავლის შემდეგ, გადავწყვიტეთ, მარტის თვეში, სკოლაში აღგვენიშნა მწვანე დღეები – 3 მარტი – ველური ბუნების მსოფლიო დღე, 8 მარტი – კატების მსოფლიო დღე, 14 მარტი – მდინარეების დაცვის საერთაშორისო დღე, 18 მარტი – ნარჩენების გადამუშავების საერთაშორისო დღე, 20 მარტი – ბეღურების საერთაშორისო დღე, 21 მარტი – ტყის საერთაშორისო დღე, 22 მარტი – წყლის რესურსების დაცვის მსოფლიო დღე, 23 მარტი – მეტეოროლოგიის საერთაშორისო დღე, 30 მარტი – დედამიწის საათი. ღონისძიებებში, თითქმის მთელი სკოლა მონაწილეობდა, მაღალი იყო როგორც მოსწავლეთა, ასევე მასწავლებელთა ჩართულობა, გაკვეთილებიც ამ მიმართულებით ტარდებოდა როგორც ღია სივრცეში, ასევე საკლასო ოთახებსა და ლაბორატორიებში. მოსწავლეებმა მონაწილეობა მიიღეს დისკუსიებში, გააკეთეს პრეზენტაციები, მიიღეს ინფორმაციები სხვადასხვა კონცეფციებისა და დეკლარაციების, გარემოს შემადგენელი ელემენტების შესახებ, აგრეთვე, გარემოს მდგომარეობის გავლენის შესახებ ადამიანის ჯანმრთელობასა და უსაფრთხოებაზე, საინტერესოდ იყო წარმოდგენილი პოსტერები და კომპლექსური დავალებები.
მეექვსეკლასელების მიერ შესრულებული ინტეგრირებული კომპლექსური დავალება ერთ-ერთი საუკეთესო ნამუშევარია ამ პროექტში. მოსწავლეებმა ხაზგასმით წარმოაჩინეს მათემატიკის კავშირი მდგრად განვითარებასთან, მასწავლებლის, ფელიქს ხურცილავას მიერ მიცემული რჩევებითა და მკაფიო ინსტრუქციებით, მოსწავლეებმა წარმატებით შეასრულეს კომპლექსური დავალება მესამე თაობის ესგ-ს მოთხოვნის საფუძველზე. კარგად გაართვეს თავი პრაქტიკული ხასიათის აქტივობას – „ჩემი ეკოლოგიური ნაკვალევი“. მასწავლებლის ფასილიტაციით და ბუნებრივი რესურსების გაცნობით, გაითავისეს მდგრადი განვითარების არსი: „მდგრადი განვითარება განვითარების ისეთი ფორმაა, რომელიც აკმაყოფილებს აწმყოს მოთხოვნებს ისე, რომ არ უქმნის საფრთხეს მომავალი თაობების შესაძლებლობას, დაიკმაყოფილონ თავიანთი საჭიროებები“.
სკოლაში გარემოსდაცვით ღონისძიებებში აქტიურად იყვნენ ჩართულები კლასის ხელმძღვანელები: ლარისა გოგია, ეკატერინე ჯალაღონია, მარინე ჯიმშელეიშვილი; მასწავლებლები: ფელიქს ხურცილავა, ხვიჩა ძაძამია.
სსიპ გარემოსდაცვით ინფორმაციისა და განათლების ცენტრმა სკოლას გადასცა სახელმძღვანელოებისა და დისკების ნაკრები, რომელსაც მოსწავლეები სასწავლო რესურსის სახით მომავალშიც მიზნობრივად გამოიყენებენ.
მადლობა მინდა გადავუხადო საქართველოს გარემოს დაცვისა და სოფლის მეურნეობის სამინისტროს, სსიპ გარემოსდაცვითი ინფორმაციისა და განათლების ცენტრს კვალიფიციური სახელმძღვანელოების მომზადების, კომპლექსური დავალებების შექმნისა და ტრენინგების ორგანიზებისთვის.
გიორგი ხურცილავა – სსიპ სენაკის მუნიციპალიტეტის სოფელ ლეძაძამეს საჯარო სკოლის დირექტორი, წამყვანი მასწავლებელი
