სოფელი თივი, შუაგულ კახეთში, ყვარლის მუნიციპალიტეტში მდებარეობს. გამორჩეული იმითაა, რომ ავარიელებითაა დასახლებული. ამ ხალხმა კი, როგორც საბჭოთა კავშირის შემადგენლობაში შემავალმა არაერთმა ეთნიკურმა ჯგუფმა, თავის თავზე იწვნია სტალინური რეპრესიების სისასტიკე – თითქმის მთელი სოფელი გადაასახლეს და მხოლოდ 50-იან წლებში დაუბრუნდნენ საკუთარ კერას. ამის შემდეგ კი, როგორც ხდება ხოლმე, პირველი რიგის ამოცანა განათლების საკითხის მოგვარება იყო და 1958 წელს, ოროთახიან შენობაში, დაწყებითი კლასები შეუდგნენ წერა-კითხვის შესწავლას, შემდეგ კიდევ 2 ოთახი შეემატა და საბოლოოდ, ცნობილი მწერლის, რასულ გამზათოვის ხელშეწყობით, ახალი შენობა აშენდა – თივის საშუალო სკოლა. ეს იყო 1981 წელი.
სოფლის სრულფასოვანმა ცხოვრებამ 90-იან წლებამდე გასტანა – თივიც, ისევე როგორც საქართველოს სხვა სოფლები, მაშინ დაიცალა. დროთა განმავლობაში ნაწილი კი დაბრუნდა, მაგრამ არა იმდენი, რომ საშუალო სკოლა შეევსოთ; ახლა მხოლოდ 9 კლასი ფუნქციონირებს 35 მოსწავლით. სწავლის გაგრძელების მსურველებს სასკოლო ავტობუსი ემსახურება და ახალსოფლის საჯარო სკოლაში იღებენ სრულ ზოგად განათლებას.
ერთი კარგი ამბავი ამ სოფელში 2018 წელს მოხდა, როცა სახალხო დამცველის მოადგილემ, ეკატერინე მსხილაძემ, თივის სკოლაში ბიბლიოთეკის შექმნას ჩაუყარა საფუძველი. „კატო მიქელაძის პრემიის მიღების შემდეგ გადავწყვიტე, პრემიის ფარგლებში გათვალისწინებული ჰონორარი ბიბლიოთეკის მოწყობისთვის გამომეყენებინა იქ, სადაც ყველაზე მეტად სჭირდებოდათ. ამ ძიების პროცესში ყვარლის მუნიციპალიტეტის სოფელ თივის საჯარო სკოლას მივაგენი. გამომდინარე იქიდან, რომ სოფელში არ იყო ბიბლიოთეკა, ხოლო სკოლას ჰქონდა სივრცე, სადაც შესაბამისი რემონტის შემდეგ მოხერხდებოდა ბავშვებისთვის საგანმანათლებლო სივრცის შექმნა, გადაწყვეტილება სოფელ თივაზე შევაჩერე. ეროვნული ბიბლიოთეკის განუზომელი მხარდაჭერით გამოიყო წიგნები, ტექნიკა და ბიბლიოთეკარის შტატი. განსაკუთრებით სასიხარულოა, რომ ბიბლიოთეკა დღემდე ფუნქციონირებს და ბავშვები აქტიურად არიან ჩართული. ჩემი აზრით, ბიბლიოთეკას განსაკუთრებული დატვირთვა აქვს ბავშვებისთვის, ეს არის სივრცე და ადგილი, სადაც მათ შეუძლიათ არაფორმალურ გარემოში მიიღონ დამატებითი ცოდნა, წაიკითხონ მათთვის სასურველი ლიტერატურა, რაც ცხადია, ხელს უწყობს მათ განვითარებას“.
სკოლის კურსდამთავრებული რახიმათ ზაურბეგოვა, დირექტორის, გიორგი ხატიაშვილის მიწვევით, ბიბლიოთეკის გამგედ დაინიშნა. „ბიბლიოთეკარი არ ვარ, წნორის კოლეჯი მაქვს დამთავრებული, საბანკო-საფინანსო საქმე, მაგრამ ტრენინგები გავიარე და 5 წელია უკვე აქ ვმუშაობ. საინტერესოა ბავშვებთან, წიგნებთან ურთიერთობა, სკოლის ცხოვრებით ცხოვრება. პატარები აქ სათამაშოდაც შემოდიან და ზღაპრების წასაკითხადაც. გაზაფხულიდან, ღია ცის ქვეშ, ერთად ვკითხულობთ ხოლმე წიგნებს. ჩვენს ბიბლიოთეკას თავიდანვე გამოუჩნდნენ გულშემატკივრები. ქალბატონი ეკატერინეს ინიციატივას ყვარლის ბიბლიოთეკების გაერთიანებამ, რესურსცენტრმა, საჯარო ბიბლიოთეკამ აუბეს მხარი. დღეისათვის, ჩვენი წიგნადი ფონდი 678 წიგნს მოიცავს. ამ ბოლო ხანებში, შევსება არ გვქონია. სასურველია, თანამედროვე ქართველი მწერლების მეტი გამოცემები გვქონდეს, რომ ახალგაზრდებს მათი გაცნობის ინტერესი გაუჩნდეს. ქართული ჩვენმა მოსწავლეებმა კარგად იციან და ამ მხრივ სირთულე არ შეექმნებათ,“ – გვიყვება რახიმათი. ამაში თავად დავრწმუნდი, როცა მეშვიდეკლასელ ზაურ ალიევს ვესაუბრე. ამბობს, რომ ბიბლიოთეკა მისი საყვარელი ადგილია. აქ კითხულობენ, ერთობიან, ღონისძიებებშიც აქტიურად ერთვებიან, სხვადასხვა კლასის მოსწავლეებთან ერთად. მსოფლიოს ხალხთა ზღაპრები, ნოდარ დუმბაძის, ილია ჭავჭავაძის მოთხრობები მათი საყვარელი წიგნებია. მეცხრეკლასელი ირაკლი ტურიაშვილი წელს დაამთავრებს თივის სკოლას და, ოთხ თანაკლასელთან ერთად, სწავლას ახალსოფლის სკოლაში გააგრძელებს. ამბობს, რომ განსაკუთრებით ის ღონისძიებები ახსოვს, რომელიც რახიმათის ხელმძღვანელობით ხშირად ტარდება ბიბლიოთეკაში, მათ შორის ყველაზე საინტერესოდ კი ვიქტორინები მიაჩნია.
სახელმწიფო ენის შესწავლის საკითხი სოფელში, ბიბლიოთეკის გახსნამდე, ერთი წლით ადრე მოგვარდა. სკოლის დირექტორი გიორგი ხატიაშვილი ამბობს, რომ დაგვიანებით, მაგრამ კარგი საქმე გაკეთდა, ეფექტური გამოდგა სკოლაში წინასასკოლო მზაობის ჯგუფის გახსნა, სადაც 4-6 წლის ასაკის ბავშვები იმ ცოდნასა და უნარ-ჩვევებს იღებენ, რაც პირველკლასელისთვისაა აუცილებელი სასწავლო პროგრამის დასაძლევად. დღეში 4 საათი საკმარისი აღმოჩნდა იმისთვის, რომ პატარებმა ქართული ენა იმ დონეზე ისწავლონ, რომ სკოლაში ჩამორჩენა არ ჰქონდეთ, განსამტკიცებლად კი წინ მოსწავლეობის პერიოდი, ქართველ პედაგოგებთან და თანატოლებთან ურთიერთობა, ათასგვარი საინტერესო აქტივობით გაჯერებული წლები ელოდებათ…
