ბოლო წლებში პროფესიული განათლებით დაინტერესებული ადამიანების რიცხვი, მათ შორის ზრდასრულებისაც, საგრძნობლად იზრდება. ზოგადად, ასეთ ტენდენციას სხვადასხვა ფაქტორი განაპირობებს. უმთავრესი და ყველასთვის საერთო პროგრამების/არჩევანის მრავალფეროვნება და დასაქმების პერსპექტივაა. თუმცა, საბავშვო ბაღის აღმზრდელის პროფესიული პროგრამა განსაკუთრებულად მიმზიდველი სწორედ დასაქმებულებისთვის გახდა და ეს იმიტომ, რომ სახელმწიფოს მხრიდან საგრძნობლად გაიზარდა ხარისხზე მოთხოვნა. დღეს საქართველოს სკოლამდელ დაწესებულებებში აღმზრდელის პოზიციაზე დასაქმებულთა დიდი უმრავლესობა სრულიად განყენებული პროფესიის ადამიანები არიან, თუმცა – მრავალწლიანი პრაქტიკული გამოცდილებით. საბავშვო ბაღების ავტორიზაციის ახალი სტანდარტით კი აღმზრდელის პროფესიული კვალიფიკაცია ერთ-ერთი უმთავრესი მოთხოვნაა.
პროფესიული კოლეჯი „ფანასკერტელი“ ამ პროგრამას 2019 წლიდან ახორციელებს და მას თინათინ ნოზაძე ხელმძღვანელობს. ჩვენთან საუბარში ის ადასტურებს, რომ აღმზრდელის პროგრამაზე სწავლის მსურველთა რიცხვი ყოველწლიურად იზრდება, ამბობს, რომ ამის გამო მიიღეს გადაწყვეტილება, რეავტორიზაციის დროს, გააორმაგონ კვოტაზე მოთხოვნა, ანუ 40-მდე გაზარდონ (აქ თელავის ფილიალიც იგულისხმება). „ამის საშუალებას კოლეჯის ინფრასტრუქტურაც გვაძლევს და ადამიანური რესურსიც, სახელმძღვანელოები, ტექნიკური აღჭურვილობა და საბავშვო ბაღის ჯგუფთან მიახლოებული სივრცეც გვაქვს, ინკლუზიური განვითარებისთვის საჭირო პირობებიც პროგრამის განუყოფელი ნაწილია,“ – ამბობს თინათინი.
ახლა, რაც შეეხება სტუდენტებს – სალომე ეფრემიძესა და ლელა ურიადმყოფელს.
სალომემ ჟურნალისტიკის ფაკულტეტი 2018 წელს დაასრულა ბაკალავრის ხარისხით, პროფესიით არ უმუშავია, შემდეგ დედა გახდა და შვილთან ურთიერთობამ ბევრი ისეთი კითხვა გაუჩინა, რაზეც პასუხებს ვერ პოულობდა; შემდეგ საბავშვო ბაღში მიიყვანა და იქაც ბევრი რამ აღმოჩნდა მისთვის უცნობი და საინტერესო. ერთი სიტყვით, გადაწყვეტილების მიღებაში დაეხმარნენ შვილი და მეგობარი, ყოფილი თანაკურსელი, რომელსაც ამავე კოლეჯში ფარმაციის მიმართულება ჰქონდა დამთავრებული.
„არჩევანში რომ არ შევცდი, ამას პირველივე ლექციებიდან მივხვდი, გაცნობითი პრაქტიკის მოდულის გავლისას, რომელსაც თამარ ბულია-მარშავა უძღვება და სადაც არჩეული პროფესიის არსს ეცნობი. დიდი მნიშვნელობა აქვს, ინტერესი რომ უფრო მეტად გიმძაფრდება და მეტის გაგების სურვილი გიჩნდება, როცა ვარდისფერ ფერებში კი არა, შენი მომავალი პროფესიის ობიექტურ, რეალისტურ სურათს გიხატავენ – თავისი სირთულეებითა და მრავალფეროვნებით. ძალიან დიდი ფაქტორია პედაგოგები, რომლებიც სხვადასხვა მოდულს გვიკითხავენ, მათი საქმისადმი სიყვარული და სტუდენტებისადმი ყურადღება. ამიტომაც ვამბობ, რომ კოლეჯში გატარებულმა ორმა წელმა ჩემი გადაწყვეტილების სისწორეში დამარწმუნა. იმ მოკლევადიანმა (3-4 დღე) პრაქტიკულმა გამოცდილებამ, რაც ბაღში მივიღე, მოდულის დასრულების შემდეგ, როცა გარემოს გავეცანით, ვაწარმოეთ დაკვირვება და შეფასებაც გავაკეთეთ, საბოლოოდ მიმახვედრა, რომ სწავლის დასრულების შემდეგ აუცილებლად ჩემი ახალი პროფესიით დავსაქმდები. კოლეჯი ამ მიმართულებითაც ძალიან გვეხმარება.“
სალომესგან განსხვავებით, ლელა ურიადმყოფელს საბავშვო ბაღში მუშაობის საკმაო გამოცდილება აქვს. ისე მოხდა, რომ აგრარული უნივერსიტეტის საინჟინრო ეკოლოგიის ფაკულტეტის დასრულების შემდეგ 6 წელი იმუშავა 56-ე ბაღში აღმზრდელის თანაშემწედ, 4-წლიანი წყვეტის შემდეგ – კერძო ბაღში, აღმზრდელად. არაერთი ტრენინგის გავლისა და მრავალწლიანი გამოცდილების მიუხედავად მიაჩნია, რომ ამ სფეროში მომუშავისთვის აუცილებელია სპეციალური განათლების მიღება. „უამრავი ახალი ტერმინოლოგიაა, მუშაობის ახალი სტილი, ახალი სახელმძღვანელოები, მეთოდოლოგია, რომელსაც აუცილებლად უნდა იცნობდე და იყენებდე, რომ თანამედროვე სტანდარტს შეესაბამებოდე – ყველაფერი ეს ხელმისაწვდომია „ფანასკერტელში“, მაღალკვალიფიციური პედაგოგების მეშვეობით. ბაღებში დასაქმებულთა 80%-ს ხომ არ გვაქვს სპეციალური განათლება, ამიტომ ეს არაჩვეულებრივი შესაძლებლობაა ჩემი ყველა კოლეგისთვის; ვურჩევ მათ, გამოიყენონ ეს შანსი არა მარტო დასაქმებისთვის, არამედ პროფესიული ზრდისთვისაც. ეს აუცილებელია, რომ კონკურენტუნარიანი იყო შრომის ბაზარზე. 15 მოდულიდან 12 პროფესიულია, ყველა საინტერესოა და მოიცავს ყველაფერს, რასაც გულისხმობს ადრეული და სკოლამდელი განათლება და რაც საჭიროა ბავშვის ჰარმონიული განვითარებისთვის – მათემატიკური წარმოდგენებიდან დაწყებული, ცეკვა-მუსიკა-მოძრაობების მოდულებით გაგრძელებული და ბაღში არსებულ ყველა პოზიციაზე მომუშავეთა ფუნქცია-მოვალეობების გაცნობით დასრულებული.“
გარდა ამისა, ორივე რესპონდენტისთვის ძალიან მნიშვნელოვანი აღმოჩნდა კომპიუტერული ტექნოლოგიების მოდული, რომელსაც თითქმის მთელი ზაფხულის განმავლობაში გადიოდნენ; ხელსაყრელია თეორიული ხასიათის მოდულების დისტანციურ რეჟიმში შესწავლაც, განსაკუთრებით ლელასთვის: „დღე ძალიან დატვირთული მაქვს და შეიძლება ვერ მოვახერხო ლექციაზე შესვლა, მაგრამ ამას ყოველთვის ვაკეთებ საღამოობით, სახლში, მშვიდ გარემოში. უკუკავშირის საშუალებაც გვაქვს, რაც ძალიან კარგია და სასარგებლო ჩვენთვის. ერთი სიტყვით, აქ გატარებულმა 2-მა წელმა, ჩვენმა პედაგოგებმა, მათმა მცდელობამ, რაც შეიძლება მეტი ცოდნა წავიღოთ კოლეჯიდან, კიდევ ერთი პროფესიის – ფარმაციის შესწავლაზე დამაფიქრა.“
თებერვლიდან უკვე 3-თვიანი პრაქტიკა დაიწყება ბაღებში, რომლის დასრულების შემდეგაც უკვე დიპლომირებული სპეციალისტები, სიახლეებითა და თანამედროვე ცოდნით აღჭურვილები, გააგრძელებენ ან დაიწყებენ საქმიანობას ერთ-ერთ ყველაზე მნიშვნელოვან და რთულ სფეროში.
