✔🟩 მზიკო დალაქიშვილი
ფსიქოლოგი, ბავშვთა და ზრდასრულთა ფსიქოთერაპევტი
პანდემიით შექმნილი ქაოსი, შიში და სირთულეეები სამყაროს მთავარი გამოწვევაა – ყველა სფეროს, დარგისა და მიმართულების, ყველანაირი სოციალური ჯგუფის, სქესის თუ ასაკისთვის თავსატეხად ქცეული რეალობა. ამ რელობაში კი, განსაკუთრებით რთულ სიტუაციაში მოწყვლადი ჯუფები აღმოჩნდნენ. ამ წერილის ადრესატი არც ერთ კონკრეტულ ჯგუფს არ მიეკუთვნება, წერილის ავტორი ქალებს საკუთარ თავზე ზრუნვისკენ მოუწოდებს, მით უფრო, მასწავლებლებს და მშობლებს, რომლებიც დიდი დატვირთვის ქვეშ არიან ონლაინ სწავლების პირობებში და ისედაც რთულ ყოველდღიურობას კიდევ ერთი და ძალიან მნიშვნელოვანი საზრუნავი დაემატა — როგორმე თავი გაართვან სწავლა-სწავლების პროცესს. ეს ყველაფერი კი, საბოლოო ჯამში, კიდევ მეტ დროს, ენერგიასა და შრომას მოითხოვს. ამიტომ, ქალების ნაწილმა საკუთარ თავზე ზრუნვა გვერდზე გადადო და მხოლოდ მოსწავლეებისა და შვილების განათლებაზე ზრუნვით შემოიფარგლა. მზიკო დალაქიშვილი კი, მათ ახსენებს, რომ: „ახლა არის დრო იზრუნოთ საკუთარ თავზე ისე, როგორც არასდროს. საკუთარ თავზე ზრუნვა არ არის ფუფუნება, არც შეუძლებელია. ეს აუცილებელია! მთავარია ცოდნა, რაზე და როგორ გაამახვილოთ ყურადღება. რომელ აზრს მისცეთ გასაქანი და რომელი შეაჩეროთ.“
გთავაზობთ ფსიქოლოგის რჩევებს, როგორ შეიძლება ასეთ რთულ მდგომარეობაშიც კი, შეიქმათ პოზიტიური განწყობა და დრო პრიორიტეტების მიხედვით გადაანაწილოთ.
♦ მიაქციეთ ყურადღება, როგორ იწყებთ დღეს. ადრიანი დილა დაუთმეთ მხოლოდ საკუთარ თავს.
♦ გაიღვიძეთ პირველმა, დაიწყეთ დღე პოზიტიურად, შეიქმენით განწყობა. ფოკუსირდით მთავარ მიზანზე, რაც თქვენი ცხოვრების აზრია, ენერგიის წყაროა. რამდენიმე წუთი დაუთმეთ ფიქრს, რისთვის ცხოვრობთ, რა გამოძრავებთ. კარგი იქნება, თუ დღეს რომელიმე პოზიტიური აფირმაციით დაიწყებთ, რაც თქვენი დღის გეგმას ეხმიანება, მაგალითად: დღეს მე მზად ვარ, გავაკეთო ყველა ჩემი საქმე დადებითი ენერგიით, გავცე და მივიღო მხოლოდ პოზიტიური ენერგია, მივიღო მაქსიმალური სიამოვნება საყვარელ ადამიანებთან ურთიერთობით, საყვარელი საქმის კეთებით, მოვასწრო ყველაფერი და დღე დავასრულო მადლიერების განცდით.
♦ დილა დაიწყეთ საყვარელი რიტუალით, იქნება ეს ყავის დალევა, ყვავილების მორწყვა თუ უბრალოდ ჰაერზე გასეირნება. შეარჩიეთ მუსიკა დილის ფონად, რაც შეესაბამება თქვენი დღის გეგმების რიტმსა და სტილს. დაისახეთ პატარ-პატარა მიზნები, რომელთა შესრულებაც მიგიყვანთ დიდ მიზნამდე, დღის ბოლოს იტყვით, მე ეს შევძელი! კარგი იქნება, თუ დილის რიტუალის დროს, თქვენი დღის მიზნებს და გეგმებს ჩამოწერთ.
დაგეგმეთ დღე, სადაც დრო გადანაწილებული იქნება პრიორიტეტების მიხედვით, როგორც ვალდებულებებზე, ისე სურვილებზე. მთავარი მათ შორის ბალანსის პოვნაა!
♦ ეცადეთ, იყოთ მომენტში, იცხოვროთ აწყმოს მაქსიმალური შეგრძნებით. რას ნიშნავს ეს? გრძნობდე რას აკეთებ, ყველა შენი შეგრძნების ორგანო იყოს ღია, მიიღოს ინფორმაცია და შეიგრძნოს მომენტი, მთელი თავისი შინაარსითა და მოცემულობით.
♦ არ იმოქმედოთ მექანიკურად, დასწავლილი ვალდებულების პირნათლად შესრულებისთვის, არამედ იგრძენით ის, რასაც აკეთებთ, გონებით და შეგრძნებებით. ესაუბრეთ საკუთარ შინაგან მეს: „მე ვიცი რას ვაკეთებ, როგორ და რისთვის“, ასევე, „ვიცი რა მსიამოვნებს ამ პროცესში და რა არ მომწონს, მე ეს ვიცი, ვაცნობიერებ და ვაკეთებ პასუხისმგებლობით, რაც კმაყოფილების განცდას მანიჭებს“, „ჩემი ვალდებულებაც ჩემი არჩევანია“ – ამაზე იფიქრეთ, ეს მართლაც ასეა! ამის აღიარება ძალას მოგცემთ.
მე ვარ პასუხისმგებელი ჩემს ცხოვრებაზე, ვზრუნავ როგორც საკუთარ თავზე, ისე სხვაზე! ისიც ვიცი, როგორ გადავანაწილო ენერგია, რომ ის, რაც მსიამოვნებს და ის, რაც ჩემი ცხოვრების ვალდებულებაა (ჩემივე არჩეული), ერთმანეთთან ბალანსში იყოს.
♦ თუ გყავთ ბავშვები, გაამახვილეთ ყურადღება დილის რიტუალზე. თქვენი დილის რიტუალის შემდეგ, მათ შეეგებეთ სიყვარულით, გამოხატეთ ემოცია ისე, თითქოს პირველად დაინახეთ ისინი და თქვენთვის მათი დანახვა დღესასწაულია. თქვენი განწყობა გადამდებია, ამავე განწყობით ბავშვის დღეც დაიწყება ბედნიერად, კარგი ამბების მოლოდინით. ბავშვს გაუჩნდება განცდა – „მე მნიშვნელოვანი ვარ!“
დღე დაწყებული მადლიერებით, საყვარელი ადამიანების დანახვის ბედნიერებით, უკვე სიხარულია, დაიჭირეთ ეს მომენტი, დაიწყეთ დღე ამ ენერგიით!
♦ დღის განმავლობაში, ხშირად შეცვალეთ სიტუაცია. როგორ? ჩვენ ხომ სულ სახლში ვართ?! შეძლებისდაგვარად, მრავალფეროვანი გახადეთ გარემო, თქვენ ყველაზე უკეთ იცით რა გიქმნით დადებით განწყობას: იქნება ეს სახლის განათება, მუსიკა, თუ ტანსაცმელი (ჩაიცვით ლამაზად, შეგიძლიათ რამდენჯერმე გამოიცვალოთ კიდეც), ყურადღება მიაქციეთ ჭურჭელს, საიდანაც მიირთმევთ, იყოს ფერადი (მოგონებებით სავსე), ისეთი, როგორიც თქვენ მოგწონთ და გეხალისებათ, გახსენებთ ვინმეს ან რამეს. ხშირად გადააადგილეთ ავეჯი. ყველაფერი ეს შეგინარჩუნებთ განწყობას და ცხოვრების ხალისს. გახსოვდეთ, რომ ცვალებადია ყველაფერი, მიუხედავად იმისა, რომ დღევანდელ სიტუაციაში ამის აღქმა გართულებულია, ყველაზე მეტად საკუთარი განწყობებით თუ შეძლებთ მის გამდიდრებას!
ხშირად უთხარით თქვენს თავს: „მერე რა, რომ სახლში ვარ, მე ვარ ყველგან! ჩემი ლამაზი ცხოვრებით, მოთხოვნილებებით, მიზნებით… მე ყველგან და ყოველთვის ვზრუნავ ჩემს თავზე. არ ველოდები სხვას, იზრუნოს ჩემზე!“
♦ დაურეკეთ, დღის განმავლობაში, ერთ ადამიანს მაინც, ვინც იცით, რომ დადებით ენერგიას მოგცემთ, ასევე, მოიკითხეთ ახლობლები, ვისაც იცით, რომ სჭირდება და გაახარებს თქვენი ზარი.
♦ საქმიანი დღის შუალედში, გამოითავისუფლეთ 15 წუთი, ეს დრო იქნება მხოლოდ თქვენთვის, განმარტოვდით ან გამოიყენეთ ეს დრო ისე, როგორც გინდათ, ნებისმიერი რამ, რაც ოდნავ მაინც მოგანიჭებთ თუნდაც სულ პატარა სიხარულს, სიამოვნებას.
♦ საღამო, ვახშმის პერიოდი, გაატარეთ ოჯახის წევრებთან ერთად, გააზიარეთ დღის შთაბეჭდილებები, გამოიყენეთ ეს მომენტი ენერგიის აღსადგენად, თქვენ ხომ უახლოესი ადამიანების გარემოცვაში ხართ!
♦ თუ გყავთ ბავშვები, მნიშვნელოვანია, მათი დაძინების შემდეგაც დაიტოვოთ დროის მოკლე მონაკვეთი განმარტოებისთვის. დღის ბოლოს ამბობთ ორ, ძალიან მნიშვნელოვან წინადადებას — მადლობის და თანაგრძნობის გამომხატველს: „მე დღეს ვეცადე გამეკეთებინა ჩემი შესაძლებლობის მაქსიმუმი.“ თუ რამე არ მომეწონა ჩემს საქციელში ან ვთვლი, რომ შემეშალა, ვერ მოვასწარი, არ მეყო მოთმინება, არ ვიყავი საკმარისად ნაყოფიერი, გავიხსენებ სიტყვას – არა უშავს – გათენდება ხვალინდელი დღე ახალი შესაძლებლობებისთვის! და მეორე: მადლობა უთხარით საკუთარ თავს გამძლეობისთვის, მონდომებისთვის, იყავით მიმტევებელი. „მადლობელი ვარ დღევანდელი დღისთვის!“ – მესმის და ვპატიობ საკუთარ თავს შეცდომებს.
♦ გაიხსენეთ, რამდენ რამეზე გიწევთ ერთდროულად ზრუნვა და ფიქრი, აპატიეთ და გაამხნევეთ საკუთარ თავი, ეს მომენტი მნიშვნელოვანია, ასევე, მიუტევეთ სხვებსაც შეცდომები – შვილებს, ქმარს, მშობლებს, მეგობრებს…
♦ გაიხსენეთ ყველა ის ადამიანი, ვის გამოც გიხარიათ ცხოვრება, ვინც გენატრებათ, გამოხატეთ მადლიერება და სიყვარული, რომ თქვენ ისინი გყავთ. თქვენ ხართ ის, რასაც ფიქრობთ, თქვენს გარშემოც მოვლენები ვითარდება თქვენი აზრების გავლენით. დღის დასასრული, ასეთი ფიქრებითა და ემოციით, სასიამოვნო დილას გაგითენებთ!
♦ აირჩიეთ ფიქრი, გააზიარეთ ემოცია, შეიცვლება ქცევაც!
♦♦♦
ამავე ავტორისგან 👇👇👇
მარტივად გაუგებთ ოკლანდერს, თუ მზად ხართ სიმართლის მოსასმენად
