ნინო ცარციძე
სსიპ ვიქტორ ნოზაძის სახელობის საჩხერის მუნიციპალიტეტის სოფელ მოძვის საჯარო სკოლის და ააიპ წმინდა ნინოს სახელობის საირხის მართლმადიდებლური გიმნაზიის სახვითი და გამოყენებითი ხელოვნების მენტორი მასწავლებელი
ბავშვობაში, სანამ ინტერნეტთან წვდომის ბედნიერებას ვეზიარებოდი, მხოლოდ ფილმებში შემეძლო მენახა თვალწარმტაცი, ზღაპრული ქვეყანა, რომელიც მხიბლავდა თავის ფერადოვნებით. მაშინ ვერ წარმოვიდგენდი, რომ შევძლებდი ინდოეთში მოგზაურობასა და ფილმებით განცდილი ზღაპრის ნახვას. ამის შესაძლებლობა მომცა მსოფლიოში ერთ-ერთმა ცნობილმა ციფრულმა საერთაშორისო სტაჟირების უნივერსიტეტმა IIU, რომელიც გლობალური საგანმანათლებლო ორგანიზაციაა, მისი მიზანია მსოფლიოში ხარისხიანი განათლების ხელშეწყობა. უნივერსიტეტს თავისი წარმომადგენლობა ჰყავს მსოფლიოს თითქმის ყველა ქვეყანაში და, ყოველდღიურ რეჟიმში, სხვადასხვა საგანმანათლებლო აქტივობით, ცდილობს ხელი შეუწყოს, დაეხმაროს განათლების სფეროს წარმომადგენლებს.
საერთაშორისო სტაჟირების უნივერსიტეტის დამფუძნებელია ბატონი პეეუშ პანდიტი. IIU ევროპის კონტინენტის დირექტორია ქალბატონი ინგა ხარჩილავა, რომელიც სამშენებლო კოლეჯ „კონსტრუქტ-2“-ის ლექტორი, სსიპ ზაზა ფერაძის სახელობის ზესტაფონის მუნიციპალიტეტის შორაპნის საჯარო სკოლის და სსიპ ზესტაფონის მუნიციპალიტეტის სოფელ კვალითის საჯარო სკოლის გეოგრაფიისა და მეწარმეობის საფუძვლების წამყვანი მასწავლებელია. ინგა ხარჩილავასთან ერთად საერთაშორისო სტაჟირების უნივერსიტეტის გუნდში გაერთიანებული არიან ქართველი პედაგოგები: სსიპ წყალტუბოს მუნიციპალიტეტის სოფელ ქვიტირის საჯარო სკოლის ისტორიის მენტორი მასწავლებელი, განათლების ხარისხის განვითარების ეროვნული ცენტრის ექსპერტი, ბათუმის მასწავლებლის სახლის ტრენერ-კონსულტანტი კახაბერ ჩაკვეტაძე; სსიპ ქარელის მუნიციპალიტეტის სოფელ დვანის საჯარო სკოლის ხელოვნების უფროსი მასწავლებელი მარიამ მამაგულაშვილი; სსიპ ხარაგაულის მუნიციპალიტეტის სოფელ ხიდრის საჯარო სკოლის ინგლისური ენის და ისტ-ის წამყვანი მასწავლებელი, ბრიტანეთის საბჭოს ონლაინ საზოგადოების ფასილიტატორი, ტრენერი მზეო ბერაძე და სსიპ ვიქტორ ნოზაძის სახელობის საჩხერის მუნიციპალიტეტის სოფელ მოძვის საჯარო სკოლის და ააიპ წმინდა ნინოს სახელობის საირხის მართლმადიდებლური გიმნაზიის ხელოვნების მენტორი მასწავლებელი ნინო ცარციძე. ჩვენი გუნდის წევრები სრულიად უანგაროდ შრომობენ, უნივერსიტეტის ციფრულ პლატფორმაზე გეგმავენ და ახორციელებენ სხვადასხვა საერთაშორისო პროექტს (ვებინარს, კონფერენციას), რომელშიც, მსოფლიოს სხვადასხვა ქვეყნის წარმომადგენლებთან ერთად, აქტიურად მონაწილეობენ ქართველი მასწავლებლები, ლექტორები, სტუდენტები და საქართველოს სხვადასხვა საჯარო და კერძო სკოლების მოსწავლეები. IIU პლატფორმაზე, სხვადასხვა პროექტის ფარგლებში, მიმდინარეობს მდგრადი განვითარების მიზნებზე ორიენტირებული, ინფორმაციული და პრაქტიკული აქტივობების პირდაპირ ეთერში გაზიარება. ეს არის საუკეთესო პრაქტიკის ურთიერთგაზიარების შესაძლებლობა საუკეთესო მომავლისთვის. ქართული გუნდის წევრებს, მსოფლიო განათლებაში შეტანილი წვლილისთვის, საერთაშორისო სტაჟირების უნივერსიტეტმა საქართველოს განათლების ელჩების სტატუსები მოგვანიჭა.
საერთაშორისო სტაჟირების უნივერსიტეტის ინიციატივით, უკვე მეორედ, განხორცილედა BIKEP-ის უდიდესი ინტერაქტიული ცოდნის გაცვლითი პროგრამა, რომელიც 2023 წლის 25 ივლისიდან 31 ივლისამდე გრძელდებოდა. BIKEP-2-ში მონაწილეობდნენ დელეგატები საქართველოდან, აზარბაიჯანიდან, რუმინეთიდან, აშშ-დან, ლიბანიდან, ზიმბაბვედან, ინდოეთიდან.
პროგრამა მოიცავდა:
♦ ცოდნის გაცვლის, გლობალური განათლების ინტერკულტურულ პროგრამას;
♦ მონაწილეობას ინდოეთის კონსტიტუციის კლუბის საერთაშორისო კონფერენციაში „ადრეული ბავშვთა ზრუნვისა და განათლების შესახებ“;
♦ დამფუძნებლის დღისადმი მიძღვნილ ღონისძიებასა და საპატიო ჯილდოების გადაცემის ცერემონიას;
♦ ინდოეთის ტურისტულ ადგილებში ვიზიტებს;
♦ ინდოეთის სოფლის ცხოვრების კვლევას, ფერმაში სტუმრობას და შეხვედრებს სოფლის მაცხოვრებლებთან;
♦ ვიზიტებს – მსოფლიოს პირველ ინოვაციურ მეტრო სოფელში, ჯეიმსის საერთაშორისო სკოლაში, ასევე, სხვადასხვა სკოლასა და საავადმყოფოში.
პროგრამის დასაწყისში, ინდოეთის დედაქალაქში, დავათვალიერეთ ინდოეთის კარიბჭე, ლოტოსის ტაძარი და ისტორიული გურდვარადან ტრანკილის ეკლესია.
ლოტოსის ტაძარი ნიუ-დელიში მდებარეობს. ასევე ცნობილია, როგორც ბაჰაის სალოცავი სახლი. ბაჰაის რელიგიის მიხედვით, არსებობს ღმერთის, რელიგიების და ადამიანების ერთობა, მისი კარი ღიაა ყველა რელიგიის წარმომადგენლისთვის. ლოტოსის ტაძარი არქიტექტურულ ღირსშესანიშნაობას წარმოადგენს, შენობა 27 მარმარილოს ფოთლისგან შედგება, რაც მას ლოტოსის ფორმას აძლევს.
ინდოეთის კარიბჭე – მონუმენტი აგებულია პირველ მსოფლიო ომსა და ავღანეთის ომში დაღუპული ინდოელი ჯარისკაცების ხსოვნისთვის, მდებარეობს რაჯპატში, ნიუ-დელიში. მონუმენტის კედლებზე დაღუპულ ჯარისკაცთა სახელებია ამოტვიფრული. წინ, უცნობი ჯარისკაცის საფლავზე, „უკვდავი მეომრის ალი“ ანთია.
დელის გურუდვარა ბანგლა საჰიბი სიქების ერთ-ერთი ყველაზე მნიშვნელოვანი სალოცავი ადგილია ინდოეთის დედაქალაქში. თეთრი მარმარილოს გურუდვარა, თავისი ოქროს გუმბათებით და დიდი წმინდა აუზით, მე-17 საუკუნის შუა ხანებში დაარსდა.
დელიში ვეწვიეთ ინდოეთის კონსტიტუციის კლუბს. კონფერენციაში მონაწილეობდნენ უზენაესი სასამართლოს ადვოკატები და საუბრობდნენ ადრეული განათლების საკითხებზე. დელეგატებისა და დამსწრე საზოგადოების წინაშე წარდგა ბატონი პეეუშ პანდიტი, რომელიც, ასევე, არის უზენაესი სასამართლოს ადვოკატი. კონფერენციაზე გამოვიდნენ, აგრეთვე, დელეგატები სხვადასხვა ქვეყნიდან, მათ შორის ქალბატონი ინგა ხარჩილავა, რომელმაც ადრეული განათლების მნიშვნელობაზე ისაუბრა.
შემდეგ გავემგზავრეთ ინოვაციურ მეტრო სოფელში, სადაც საზეიმო დახვედრა მოგვიწყვეს ელექტრონული სოფლის, ჯეიმსის საერთაშორისო სკოლის თანამშრომლებმა და მოსწავლეებმა. ჯეიმსის საერთაშორისო სკოლა ბატონმა პეეუშ პანდიტმა დააარსა სოფელ კუნდას ბავშვებისთვის. სკოლის 350-მა მოსწავლემ, ყვავილებით ხელში, ტრადიციული აარტი, ლამაზი ინდური რიტუალი შეასრულა. საზეიმო დახვედრა იყო თბილი და გულწრფელი.
ინდოელებს აქვთ გამოთქმა „სტუმარი ღმერთია“. მართლაც, ჩვენ აღმოვჩნდით არაჩვეულებრივ სტუმართმოყვარე გარემოში. ეს იყო დაუვიწყარი შთაბეჭდილება, რომელსაც ერთნაირად განვიცდიდით პროგრამაში მონაწილე სხვადასხვა ქვეყნის წარმომადგენლები. აღსანიშნავია, რომ ინდოეთის სოფლებსა და ქალაქებში განთავსებული იყო BIKEP-ის დელეგატების ბანერები. საგანმანათლებლო ორგანიზაციებში ჩვენი ვიზიტისას, გვხვდებოდნენ ინდური ტრადიციული შთამბეჭდავი საზეიმო ცერემონიით.
დღის ბოლოს, პროგრამის დელეგატებმა ზიმბაბვედან, საქართველოდან, აზერბაიჯანიდან, რუმინეთიდან, აშშ-დან, ლიბანიდან და ინდოეთის სხვადასხვა რეგიონიდან, თავიანთი ქვეყნების ტრადიციული სიმღერები და ცეკვები წარმოადგინეს.
27 ივლისს გაიმართა დამფუძნებლის, ბატონი პეეუშ პანდიტის დაბადების დღისადმი მიძღვნილი გრანდიოზული ღონისძიება, სადაც მოწვეული იყვნენ სტუმრები ინდოეთის სხვადასხვა რეგიონიდან. ჯეიმსის საერთაშორისო სკოლის მოსწავლეებმა დელეგატებს წარმოგვიდგინეს ინოვაციური ნამუშევრები, რომლებიც სხვადასხვა პროექტის ფარგლებში შეასრულეს. მოსწავლეთა ნამუშევრების პრეზენტაციამ დელეგატების და დამსწრე საზოგადოების მოწონება დაიმსახურა. მოსწავლეებმა, აგრეთვე, შეასრულეს ტრადიციული ინდური ცეკვები და სიმღერები. ბატონმა პეეუშ პანდიტმა დელეგატები საპატიო ჯილდოებით და სერტიფიკატებით დაგვაჯილდოვა. ქართველი დელეგატები ღონისძიებას ქართული ტრადიციული სამოსით დავესწარით, წარმატებით ვიასპარეზეთ პანელურ დისკუსიაში. ბატონ პეეუშ პანდიტთან ერთად, გაიმართა პრესკონფერენცია, სადაც მოწვეული იყვნენ სხვადასხვა მედიასაშუალებების წარმომადგენლები.
28 ივლისს ვეწვიეთ კუნდას კომპიუტერულ ინსტიტუტს, სადაც 200-მდე სტუდენტი სწავლობს. გავეცანით, როგორ ეუფლებიან თანამედროვე ტენოლოგიებს; ვესტუმრეთ აშუ ოჟას სკოლას, მოსწავლეებმა წარმოადგინეს ინდური ტრადიციული სიმღერები; მოვინახულეთ საავადმყოფო, სადაც შევხვდით პაციენტებსა და საავადმყოფოს პერსონალს.
დღის ბოლოს ვიზიტი გვქონდა ბჰაქტი დამ მანგარჰის ცნობილ ტაძარში, რომელიც 108 ფუტის სიმაღლეზეა აშენებული ვარდისფერი ქვიშაქვით, თეთრი მარმარილოთი და შავი გრანიტით.
სოფელ კუნდადან ქალაქ აგრაში გავემგზავრეთ, მნიშვნელოვანი დღე იყო, რადგან საოცნებო ტაჯ მაჰალს ვესტუმრეთ. მომეცა შესაძლებლობა რეალურად მენახა ტაძარი, სადაც ხელოვნების გაკვეთილებზე, ჩემს მოსწავლეებთან ერთად, ვირტუალურად, ხშირად ვმოგზაურობდი, ვუყვებოდი მისი შექმნის საოცარ სიყვარულის ისტორიას, ვესაუბრებოდი არქიტექტურაზე, ახლა კი საშუალება მაქვს, მისი ნახვით გამოწვეულ შთაბეჭდილებებზე ვესაუბრო.
ტაჯ მაჰალი ულამაზესი მავზოლეუმია, მსოფლიოში ერთ-ერთი უდიდესი არქიტექტურული შედევრი, რომელიც ინდოელების სულთნის, შაჰ ჯაჰანის ბრძანებით ააგეს. შაჰმა ეს ნაგებობა მეუღლის, მუმთაზ მაჰალის, პატივსაცემად ააგო. თურმე შაჰს ძალიან უყვარდა მეუღლე და როცა ის გარდაიცვალა, ქვეყანაში გლოვა გამოაცხადა, ყველანაირი ზეიმი აკრძალა. ცოტა ხანში, ქალაქ აგრაში, მუმთაზ მაჰალის საფლავზე უზარმაზარი ტაძრის აგება დააწყებინა. ამ ტაძრის ასაგებად 20.000-ზე მეტი მუშა მუშაობდა, ბევრი არქიტექტორი იყო მოწვეული აზიის სხვადასხვა ქვეყნიდან და მშენებლობა, დაახლოებით, 20 წლის შემდეგ დასრულდა. ტაჯ მაჰალის კედლები თეთრი მარმარილოსია, რომელიც საღამოს, მზის ჩასვლისას, ოქროსფრად მოჩანს. თეთრი მარმარილო ძვირფასი თვლებითაა მოჩუქურთმებული. ტაჯ მაჰალის აგებისას 28 სახეობის ძვირფასი და ნახევრადძვირფასი ქვა გამოუყენებიათ. ტაძრის სიმაღლე 58 მეტრია, სიგანე – 56 მეტრი. ეზოში ყვავილებით სავსე თვალუწვდენელი მინდვრებია, ტაძრის წინ – აუზები და შადრევნები, იქვე კვიპაროსებია დარგული. ტაჯ მაჰალი იუნესკოს კულტურული მემკვიდრეობის ძეგლთა სიაშია შეტანილი.
პროგრამის დასასრულს გამოსამშვიდობებელი სიტყვა წარმოთქვა ბატონმა პეეუშ პანდიტმა – საუბრის თემა იყო „რატომ ვართ ადამიანები“. თავისი გამოსვლა მან დამაფიქრებელი ციტატით დაასრულა: „მსოფლიოს შეცვლა ან რაიმე ახლის შექმნა დაიწყე საკუთარი თავით“, რითაც ხაზი გაუსვა თვითზრუნვის ძირითად საკითხებს: თვითპატივისცემას, თვითკმარობას, თვითგაუმჯობესებას, თვითინოვაციასა და თვითშემეცნებას, როგორც ეფექტური ლიდერობის ქვაკუთხედს. მისი აზრით, პიროვნებამ უნდა იტვირთოს საკუთარი ბედის კაპიტნის როლი, რაზეც, რა თქმა უნდა, ზეგავლენას ახდენენ მშობლები, ოჯახი, საზოგადოება ან თუნდაც ქვეყანა. ბატონი პანდიტის სიტყვებმა გვაგრძნობინა, რომ გლობალური ოჯახის ნაწილი ვართ, მიუხედავად ჩვენი წარმომავლობისა და კულტურული მრავალფეროვნებისა. ეს იყო დამაჯერებელი მოწოდება კრეატიულობისა და ინოვაციისკენ. დელეგატებს გვირჩია, ვაღიაროთ ლატენტური პოტენციალი და საკუთარი თავში ახალი უნარები და შესაძლებლობები აღმოვაჩინოთ. სესიის დასასრულს მონაწილეებმა ჩვენი მხარდაჭერა გამოვხატეთ მსოფლიო განათლების პოლიტიკის მიმართ — განათლების თანაბარი ხელმისაწვდომობა ყველასთვის, მსოფლიოს მასშტაბით.
აღნიშნული პროექტი შესანიშნავი შესაძლებლობა იყო დელეგატებისთვის, გავცნობოდით ინდოეთის საგანმანათლებლო პროგრამებს, კულტურულ მემკვიდრეობასა და ისტორიას, ინტერაქტიულ რეჟიმში გაგვეცვალა გამოცდილება სამეცნიერო ცოდნის, საგანმანათლებლო საქმიანობის, კულტურული მემკვიდრეობისა და ტრადიციების შესახებ. ჩვენს პროფესიულ საქმიანობაში აუცილებლად ჰპოვებს ასახვას სანსკრიტული ფრაზა — „სამყარო არის ოჯახი“ („Vasudhaiva Kutumbakam“) — სახელმძღვანელო პრინციპი, რომელიც ხაზს უსვამს გლობალურ პერსპექტივას, გლობალური სოლიდარობისა დაპასუხისმგებლობის ხელშეწყობის მნიშვნელობას, განსაკუთრებით ისეთი საკითხების მოგვარებაში, როგორიცაა: კლიმატის ცვლილება, მდგრადი განვითარება, მშვიდობა და განსხვავებულის მიმართ შემწყნარებლობა.
გამოყენებული ლიტერატურა:
- International Internship University – IIU https://www.facebook.com/theiiuniversity
- BIKEP-Biggest Interactive Knowledge Exchange Program –https://www.facebook.com/profile.php?id=100092618853601
- Iiu Social-Media – https://www.facebook.com/profile.php?id=100074651303409
