ნინო სეთური
ლაგოდეხის მუნიციპალიტეტის სოფ. თამარიანის საჯარო სკოლის ბიოლოგიის წამყვანი მასწავლებელი
დღესდღეობით ყველაზე მწვავე თემა, რაზეც კაცობრიობა დავობს და ხმამაღლა საუბრობს, „გლობალური დათბობაა“, რაც კლიმატის ცვლილებით გამოიხატება. როდესაც ატმოსფეროში აღწევენ ნარჩენი აირები, ხდება ატმოსფეროს შედგენილობის ცვლა, რასაც, საბოლოოდ, მოჰყვება რადიაციულ-აქტიური აირებისა და აეროზოლების ზრდა ატმოსფეროში. უკანასკნელი ორი პროცესი აძლიერებს სათბურის ეფექტს.
„გლობალური დათბობა“ ხშირად გამხდარა გარემოს დაცვითი სხვადასხვა მოძრაობის მოტივატორი. სამწუხაროდ, ჯერ კიდევ არსებობენ ისეთი ადამიანები, რომლებიც არ აღიარებენ გარემოს დაცვის დიდ მნიშვნელობას, ზოგიერთი კი თვლის, რომ აღნიშნულით არ მოგვარდება პრობლემა და ძალიან ცოტაა ისეთი, ვინც სვამს კითხვას: შეუძლია თუ არა ადამიანს, გარკვეული ღონისძიებების გატარებით, შეაფერხოს კლიმატის ცვლილება და რამდენად მნიშვნელოვანია კლიმატის ცვლილების წინააღმდეგ გატარებული ღონისძიებები?
კლიმატის ცვლილების პრევენციაში თითოეულ ადამიანს შეუძლია წვლილის შეტანა, მათ შორის, სკოლებსაც შეგვიძლია გავხდეთ „კლიმატის ცვლილების“ ინიციატორი.
თამარიანის საჯარო სკოლის თითქმის ყველა მოსწავლე ცდილობს, ჩაერთოს და თუნდაც მცირე წვლილი შეიტანოს ამ უდიდესი პრობლემის მოგვარებაში. მდგრადობის შენარჩუნების მიზნით, სასწავლო პროცესის პარალელურად, ვახორციელებთ შემდეგ აქტივობებს – აღნიშნულ პრობლემასთან დაკავშირებით მოსწავლეები ამუშავებენ თემებს, მეზობელ სკოლებთან ვატარებთ კონფერენციებს ინფორმაციისა და გამოცდილების გაზიარების მიზნით:
◊ თელავის იაკობ გოგებაშვილის სახელობის სახელმწიფო უნივერსიტეტში მოსწავლეები, ყოველწლიურად, წარადგენენ საკონფერენციო თემებს;
◊ თითქმის ყოველ წელს აღვნიშნავთ „დედამიწის დღეს“;
◊ მოსწავლეები აკეთებენ პრეზენტაციებს თემაზე – „სუფთა წყალი ჩვენი უფლებაა, მისი დაცვა კი – ჩვენი მოვალეობა“;
◊ ბუნების დაცვის თემაზე, მოსწავლეები უშვებენ კედლის გაზეთს და ამზადებენ ბუკლეტებს, რასაც შემდეგ თემში არიგებენ;
◊ ეწყობა დასუფთავების დღეები, მოსწავლეები და მასწავლებლები, ერთად, ხალისით ერთვებიან აქტივობაში, რაც შემდგომში მოსწავლეებს სურვილს უჩენს, თავიანთი სახლის შემოგარენიც დაასუფთაონ;
◊ სკოლის ნაკვეთში ითესება თხილისა და კაკლის თესლი, მოსწავლეები უვლიან და გაზრდილი ნერგების ნაწილს სკოლის ტერიტორიაზე რგავენ, ნაწილს კი თემში არიგებენ;
◊ აღნიშნულ თემასთან დაკავშირებით, დაწყებითი საფეხურის მოსწავლეებთან, ზემოთ სკოლაში მოვიწვიეთ ლაგოდეხის დაცული ტერიტორიების მენეჯერი და მასწავლებელი დავით გელაშვილი, გაიმართა საინტერესო დისკუსია. ზოგიერთმა მოსწავლემ მიზნად დაისახა, მომავალში პროფესიად რეინჯერობა აირჩიოს;
◊ რეგულარულად ეწყობა ექსკურსიები ლაგოდეხის მუნიციპალიტეტის დაცულ ტერიტორიებზე.
შედეგი:
ზემოთ ჩამოთვლილი აქტივობები მოსწავლეებს უვითარებს: ლიდერობის, თავდაჯერებულობის, კომუნიკაბელურობის, გუნდური მუშაობის, პრეზენტაციის, ტრანსფერის და პროექტებზე მუშაობის უნარებს. მათ შეუძლიათ: სწავლა-სწავლების პროცესში ინტერესისა და ცნობისმოყვარეობის გამოვლენა; ახალი აქტივობების, მიდგომების, შესაძლებლობების ძიება და განხორციელება, სწავლის გაუმჯობესების მიზნით. მოსწავლეები მზად არიან მდგრადობის შესანარჩუნებლად და გაბედული ნაბიჯების გადასადგმელად, რაც, ვფიქრობ, საბოლოოდ, დადებითად აისახება კლიმატის ცვლილებაზე.
