15 ივლისს, მეორე სესიაზე, აბიტურიენტები გეოგრაფიის გამოცდას აბარებენ. საქართველოს განათლების, მეცნიერებისა და ახალგაზრდობის მინისტრი გივი მიქანაძე ქუთაისის მე-17 და ზუგდიდის მე-4 საჯარო სკოლებში გახსნილ საგამოცდო ცენტრებს ეწვია და საგამოცდო პროცესს ადგილზე გაეცნო.
მინისტრმა საგამოცდო სივრცეები დაათვალიერა და აპლიკანტებს წარმატებები უსურვა: „ქვეყნის მასშტაბით საგამოცდო პროცესი შესაბამისი სტანდარტების დაცვით, მშვიდ გარემოში მიმდინარეობს. ყველა ჩართული მხარე მობილიზებულია და უზრუნველყოფილია ისეთი გარემო, სადაც გამოცდაზე მისულ თითოეულ აბიტურიენტსა თუ პედაგოგს აქვს შესაძლებლობა, საკუთარი ცოდნა და პოტენციალი გამოავლინოს.
ეს საყოველთაოდ მნიშვნელოვანი პროცესია. ჩვენ მაქსიმალურად ვცდილობთ, გამოცდაზე მოსული თითოეული აბიტურიენტი და პედაგოგი წავახალისოთ, გავამხნეოთ, ვაჩვენოთ, რომ ჩვენ მათ ვგულშემატკივრობთ.
აბიტურიენტების, პედაგოგებისა და ყველა გამოსაცდელის წარმატება თითოეული ჩვენგანისა და ჩვენი ქვეყნის წარმატებაა. საბოლოოდ, ეს ჩვენი ქვეყნის პროგრესზე, დინამიკასა და წინსვლაზე აისახება. სწორედ ამიტომ, საგამოცდო პროცესის მშვიდ გარემოში გამართულად მიმდინარეობაზე, ყოველთვის განსაკუთრებულ აქცენტს ვაკეთებთ“.
ხვალ, 16 ივლისს, აბიტურიენტები სამოქალაქო განათლების გამოცდას (პირველი სესია) ჩააბარებენ.
შეგახსენებთ შეფასებისა და გამოცდების ეროვნული ცენტრის სამოქალაქო განათლების ჯგუფის ხელმძღვანელის, ირმა ხომერიკის რჩევებს:
⇔ პირველ რიგში, რა თქმა უნდა, ყურადღებით უნდა გაეცნოთ თითოეული დავალების ინსტრუქციას, მოთხოვნებს. ძალიან კარგად უნდა გაიაზროთ შემოთავაზებული მასალა და მხოლოდ ამის შემდეგ გადახვიდეთ კითხვაზე.
მნიშვნელოვანია, რომ თქვენს პასუხებში კარგად ჩანდეს საპროგრამო მასალით გათვალისწინებული საკითხების ცოდნა, მოვლენათა ანალიზის უნარი, დემოკრატიულ ღირებულებებზე დაფუძნებული არგუმენტაციის უნარი.
⇔ განსაკუთრებით მნიშვნელოვანია, მაქსიმალური ყურადღებით იმუშაოთ ღია დავალებებზე, რადგან ქულათა უმრავლესობა სწორედ ღია დავალებებზეა გადანაწილებული. არანაკლებ მნიშვნელოვანია ყურადღებით მუშაობა პასუხების ფურცელზე. თუ შავი სამუშაოსთვის დამხმარე ფურცლებს იყენებთ (ჩემი რჩევა იქნება, რომ ღია დავალებებისთვის ჯერ სწორედ შავი ფურცლები გამოიყენოთ), მაშინ ძალიან ყურადღებით უნდა იყოთ გადატანის დროს პასუხების ფურცელზე.
სასურველია, წინასწარ შეისწავლოთ პასუხების ფურცელი და ნახოთ რამდენი ადგილი ეთმობა თითოეულ დავალებას, შემდეგ დაიწყოთ ამ დავალებაზე მუშაობა და რა თქმა უნდა, მიაქციეთ ყურადღება კალიგრაფიას, თქვენი ნაწერი გარკვევით უნდა იკითხებოდეს. ამ პირობების დაუცველობის შემთხვევაში, დავალება სრულყოფილად ვერ შეფასდება.
წარმატებებს გისურვებთ!
