5 ოქტომბერს, მასწავლებლის საერთაშორისო დღეს, 2021 წლის მასწავლებლის ეროვნული ჯილდოს გამარჯვებული გამოვლინდა. ჯილდოს მფლობელი ხათუნა რაზმაძე გახდა. ხათუნა წმ. გიორგის სახელობის საერთაშორისო სკოლის მათემატიკის მასწავლებელია. მას, ფულადი პრიზის სახით, კამპანიის გენერალურმა სპონსორმა, გუდავაძე-პატარკაციშვილის ფონდმა 10 000 ლარი გადასცა.
მასწავლებლის ეროვნული ჯილდო წელს იუბილარია, 2021-ის დაჯილდოების ცერემონიალზე პროექტის გუნდი ერთგვარი შეჯამებით წარდგა საზოგადოების წინაშე. საინტერესო ხუთწლიანი ისტორია, ხუთი გამორჩეული მასწავლებლით, „ათეულთა კლუბი“ 50 საუკეთესო მასწავლებლით, რომელიც წლიდან წლამდე ბევრი საინტერესო აქტივობის ინიციატორია და კოლეგებისთვის საუკეთესო „მეგზური“ პროფესიულ საქმიანობაში, ერთ მთავარ მიზანს – მასწავლებლის პროფესიის პოპულარიზებას – ემსახურება. განათლების კოალიციის გამგეობის თავმჯდომარე ირინა ხანთაძე იხსენებს, რაოდენ რთულად წარმოსადგენი იყო მათთვის, ხუთი წლის წინ, რომ ეს კამპანია ასეთი წარმატებული იქნებოდა – „ჩვენ ავირჩიეთ განათლება სწორედ იმიტომ, რომ გვჯერა, კარგი განათლების გარეშე წარმატებული განვითარება შეუძლებელია. ჩვენი საქმე დავინახეთ სწორედ ერთ-ერთი მნიშვნელოვანი მიმართულებით – მასწავლებლის პროფესიის პრესტიჟის გაზრდის ხელშეწყობა და მისი პოპულარიზაცია საზოგადოებაში. ძალიან ბევრმა ადამიანმა თუ ორგანიზციამ აიტაცა, ჩვენთან ერთად, ეს იდეა და ვფიქრობ, იმ მომენტში გუდავაძე-პატარკაციშვილის ფონდის გამოჩენა და გადაწყვეტილება, როგორც სპონსორები ჩართულიყვნენ ამ პროცესში, იყო კრიტიკულად მნიშვნელოვანი. განვლილ ხუთ წელიწადში მოვახერხეთ ის, რომ თავად კამპანია გავხადეთ პოპულარული და ცნობადი იმისთვის, რომ მასწავლებლის პროფესიაში მეტ ახალგაზრდას მოუნდეს ჩართვა.“
გუდავაძე-პატარკაციშვილის ფონდის დირექტორი ზურა კერვალიშვილი ამბობს, რომ ფონდმა და ჯილდომ ერთად დაიწყეს მოღვაწეობა. ეს იყო მათი პირველი პროექტი, რომელიც დასაფინანსებლად აირჩიეს. „ჩვენი თანამშრომლობა შედგა და გვიხარია, რომ ფეხბედნიერიც აღმოჩნდა ეროვნული ჯილდო. წლიდან წლამდე არათუ ნელდება ინტერესი, უფრო და უფრო ძლიერდება. მასწავლებლები მართლა დიდი ემოციით და ინტერესით ელიან ჯილდოს ყველა ღონისძიებას, იქნება ეს ყოველწლიური გახსნის ცერემონია, ფინალისტების დასახელება თუ საბოლოო დაჯილდოება. ეს კიდევ ერთხელ მიანიშნებს, რომ წარმატებული პროექტია. მადლობა ამისთვის განათლების კოალიციას და მადლობა ძალიან კომპეტენტურ ჟიურის, რომლის პროფესიონალიზმსა და ობიექტურობაში ეჭვი არასდროს შეუტანია ვინმეს. ზოგადად, ასეთი კონკურსები ძალიან მნიშვნელოვანია მასწავლებლებისთვის, ფონდისთვის კი – მასწავლებელი. ის არის უმთავრესი რგოლი, რომელიც ხარისხიან განათლებას განსაზღვრავს. ამიტომ ამ რთულ პროფესიის ადამიანებს დიდი პატივისცემა ეკუთვნის საზოგადოებისგან, ჩვენი მხრიდან კი, ეს არის მოკრძალებული მცდელობა, მადლობა გადავუხადოთ პროფესიული საქმიანობისთვის. ამავე დროს, ძალიან მნიშვნელოვანია სისტემაში ახალი თაობის შემოსვლა, ახალგაზრდებს უნდა გაუჩნდეთ მეტი მოტივაცია და სურვილი. ჯილდოს ერთ-ერთი დანიშნულებაც სწორედ ეს არის – დავანახოთ ახალგაზრდებს, მომავალ თაობას მასწავლებლის პროფესიის ხიბლი და საჭიროება, რომ ამ პროფესიასაც აქვს საზოგადოების მხრიდან დაფასებაც და მხარდაჭერაც და რომ ამ პროფესიაშიც შეიძლება იყო ძალიან წარმატებული.“
ჯილდოს მფლობელი მასწავლებელი ემოციებს გვიზიარებს და თავს უბედნიერეს ადამიანად მიიჩნევს, რადგან ახლა უფრო თამამად და ლაღად შეძლებს მთავარი მიზნის – დღის ცენტრის გახსნას იმპლანტირებული ბავშვებისთვის, მისი კონკურსში მონაწილეობის მთავარი მოტივაციაც სწორედ ეს გახდა.
⏩ ქალბატონო ხათუნა გილოცავთ. რა შეგრძნებაა საუკეთესო ფინალისტებს შორის გახდე რჩეული მასწავლებელი და რას ნიშნავს ეროვნული ჯილდო თქვენთვის?
⏩ საოცარი შეგრძნებაა, ეს არის ემოციათა ზღვა, ნაკადი, რომელსაც ერთი კონკრეტული სახელდება არ აქვს. ეს ის ბედნიერი წუთებია, როცა მართლა შემიძლია ვთქვა – „შეჩერდი წამო!“. როცა გინდა, ბედნიერებით გავსებდეს და გილამაზებდეს ეს წუთები მთელ ცხოვრებას. მასწავლებლის ეროვნულ ჯილდოში მონაწილეობა ორ უდიდეს მიზანს ემსახურებოდა. პირველ რიგში, მეამაყება, რომ მასწავლებელი ვარ, ყველა მასწავლებელს ვუსურვებ წინსვლას და წარმატებას პროფესიულ საქმიანობაში; მეორე – ძალიან დიდი სურვილი მაქვს, ჩემი ბარბარესა და მისი მეგობრებისთვის გავაკეთო არაფორმალური განათლების ცენტრი, რომელიც მოემსახურება არა ყრუ ბავშვებს, არამედ იმპლანტირებულ ბავშვებს, რომლებსაც ჩვენგან ძალიან სჭირდებათ თანადგომა. ჯილდოს აღებაც სწორედ ამ მიზნის განსახორციელებლად მინდოდა. იმპლანტირებული ბავშვები რეალურად ზედაპირულ სივრცეში არიან, არც ყრუთა საზოგადოებას მიეკუთვნებიან და არც ჩვეულებრივ საზოგადოებას. ამიტომ მათი თანადგომა და გაძლიერება, ვფიქრობ, უმნიშვნელოვანესია. თუ არა განათლებას, სხვას რას შეუძლია ამ საქმის გაკეთება. მინდა, ჩემი პროფესიონალიზმი, ენთუზიაზმი და მონდომება ახლა ამ ინიციატივას დავუკავშირო.
ვფიქრობ, მათთვის გახსნილი დღის ცენტრი წიგნიერების, მათემატიკის წიგნიერებისა და ეკოლოგიური მიმართულებით წავიყვანო. ცხადია, ეს იქნება დამოუკიდებელი ცენტრი და არა სკოლასთან არსებული, სადაც ბავშვები გაკვეთილების შემდეგ მოვლენ და აქ იპოვიან საკუთარ თავს, მოახერხებენ საკუთარი შესაძლებლობების რეალიზებას. აუცილებლად დასჭირდებათ ჟესტური ენის თარჯიმანი; ასევე მინდა, ცენტრში შექმნან ხელნაკეთი ნივთები, მაგალითად, სამკაულები, ქოთნებში დარგონ ყვავილების ჩითილები, მოუარონ მცენარეებს და ცოტა კულინარიაც შეისწავლონ.
რაც მთავარია, ჩემი ოცნების რეალიზების შესაძლებლობას ახლა ეროვნული ჯილდოს გამარჯვება მომცემს. მართლა ქარბორბალასავით დატრიალდა ჩემს თავს ყველაფერი, ზღაპარივითაა, სადაც ოცნებები ხდება და მიზანიც გამართლებულია. ჯილდოს წყალობით, ახლა უფრო თამამად და ლაღად გამოვიყენებ ჩემს პროფესიას არაფორმალური ინკლუზიური განათლების მიმართულებით, რაც მნიშვნელოვანწილად განაპიროებებს ჩემი შვილის და, არა მხოლოდ ჩემი შვილის, მომავალს.
⏩ რა არის ის მაქსიმუმი, რისი გაკეთებაც შესაძლებელია თქვენს პროფესიაში?
⏩ ვფიქრობ, ჩემს პროფესიაში მაქსიმუმი ჯერ არ გამიკეთებია, წინ კიდევ ბევრი მნიშვნელოვანი საქმე მაქვს გასაკეთებელი. თითოეული კარგი მასწავლებლის უკან ბევრი ძალიან წარმატებული მოსწავლე დგას და მეც, რა თქმა უნდა, ვრჩები სკოლაში იმ მიზნით, რომ კიდევ არაერთი თაობა აღვზარდო. ახლა კიდევ უფრო სხვაგვარად დავანახებ ბავშვებს მასწავლებლის პროფესიას — რომ მასწავლებლობა ძალიან საინტერესოა, მზის სხივივით განათებული პროფესიაა. აქტიურად გავუწევ პოპულარიზაციას ჩვენს პროფესიას.
⏩ მოგვიყევით რა გამოცდილება გაქვთ ინკლუზიური განათლების მიმართულებით?
⏩ ამ მიმართულებით საკმაოდ დიდი გამოცდილება დამიგროვდა. ოთხი წელია, რაც ვთანამშრომლობ ორგანიზაციასთან „ბავშვი, ოჯახი, საზოგადოება“. ინკლუზიური განათლებისთვის, სასკოლო სივრცეში, ერთობლივად ბევრ საინტერესო აქტივობებსა და ღონისძიებებს ვატარებთ, რომელიც ორიენტირებულია ყველა მოსწავლეზე – საგაკვეთილო პროცესში ყველა თანაბრად უნდა იყოს ჩართული. საერთოდ, ამ ორგანიზაციაში ჩემი მისვლაც სწორედ ჩემი შვილის მდგომარეობამ განაპირობა. დასაწყისისთვის სულ ვამბობდი, რომ არანაირი ცოდნა არ მქონდა ამ სფეროში. ბოლო სამი-ოთხი წელი კი დავიწყე ინტენსიური სწავლა, დაკვირვება. სულ სხვაგვარად დავინახე თითოეული მოსწავლის შესაძლებლობა საგაკვეთილო სივრცეში; მივხვდი რამდენად მნიშვნელოვანია თითოეულის ჩართულობა, ინკლუზიური განათლებაც ხომ ამას გულისხმობს – განათლება ყველასთვის. რაც დრო გადის, მინდა კიდევ უფრო ღრმად შევიხედო, მეტი ვისწავლო და გავაკეთო ამ სფეროში.
⏩ დაბოლოს, მასწავლებლის პროფესია რას ნიშნავს თქვენთვის?
⏩ მასწავლებლის პროფესია ჩემთვის ცხოვრებაა – საოცარი განცდაა, როცა თვალს გადავავლებ იმ 22-წლიან პერიოდს, რომელიც სკოლაში, მოსწავლეებთან ერთად, გავატარე. ეს არის სიკეთის, სიყვარულის, ერთგულების, თანამშრომლობის, პროფესიული ზრდის წლები. სულ ვამბობ, რომ ყოველ ჯერზე ვსწავლობ ჩემი მოსწავლეებისგან რაღაც ახალს. როცა გამარჯვებულად გამომაცხადეს, მათი ხმები ჩამესმოდა – „მასწ. გაიმარჯვეთ რააა“. ბედნიერი ვარ, რომ ხვალ სკოლაში მისული მათ ამ გამარჯვებას მივულოცავ.
წუხელ 77 მადლობა დავწერე. ეს რიცხვი რომ ჩემთვის სიმბოლურია, ამ დღეებში, ჩემმა ყოფილმა მოსწავლემ, ათი წლის შემდეგ შემახსენა, რომელიც შემთხვევით შემხვდა. მადლობების გრძელი სიის ჩამონათვალის ინსპირაციაც მისი სიტყვები იქცა. თუმცა, ახლა 77 მადლობიდან რამდენიმეს გამოვყოფ. პირველ რიგში, რა თქმა უნდა, მადლობა განათლების კოალიციას, იმიტომ რომ 5 წლის წინ, ასეთი მნიშვნელოვანი პროექტი წამოიწყო; ასევე, დიდი მადლობა მინდა გადავუხადო ჯილდოს მთავარ სპონსორს, გუდავაძე-პატარკაციშვილის ფონდს და მხარდამჭერს – „ლიბერთი ბანკს“. დაბოლოს, განსაკუთრებული მადლობა ყველა იმ ადამიანს, ვისაც ჩემი გამარჯვების სჯეროდა. ამ გამარჯვებასაც მათ ვუძღვნი.
ესაუბრა ლალი ჯელაძე
