უცხოური ენის გამოცდით დაიწყო მორიგი სასესიო კვირა. აბიტურიენტები უცხოური ენების გამოცდას ორ სესიად აბარებენ, პირველ სესიაზე – ინგლისურ ენასა და რუსულ ენას, მეორე სესიაზე – ინგლისურ ენასა და გერმანულ ენას.
უცხოური ენების გამოცდის პირველ სესიაზე განაწილებულთაგან ტესტირებაზე 93%-ზე მეტი აბიტურიენტი გამოცხადდა, დაიგვიანა სამმა აბიტურიენტმა.
შეფასებისა და გამოცდების ეროვნული ცენტრის დირექტორი ნინო წერეთელი პროცესის მიმდინარეობას თბილისის 175-ე საჯარო სკოლაში გახსნილ საგამოცდო ცენტრებში დააკვირდა.
მეორე სესიისათვის რეგისტრაცია 14 საათზე დაიწყო. ამ წუთებში საგამოცდო ცენტრებში უცხოური ენების გამოცდის მეორე სესია მიმდინარეობს.
მეორე სესიაზე განაწილებული აბიტურიენტებიდან გამოცდაზე 94%-ზე მეტი გამოცხადდა, ამ დროის მონაცემებით დაიგვიანა ორმა აბიტურიენტმა.
ხვალ ერთიანი ეროვნული გამოცდები ისევ უცხოური ენების გამოცდით გაგრძელდება – აბიტურიენტები ინგლისურ და ფრანგულ ენებში გაივლიან ტესტირებას.
ასევე, 8 ივლისიდან გამოცდებში მასწავლებლები და მასწავლებლობის მსურველები ჩაერთვებიან – პირველ გამოცდას საბაზო და პროფესიულ უნარებში ჩააბარებენ.
გისურვებთ წარმატებას!
