მაია ლაპიაშვილი, დედოფლისწყაროს №1 საჯარო სკოლის გეოგრაფიის და სამოქალაქო განათლების მასწავლებელი
ფინალისტობა ჩემთვის, უპირველეს ყოვლისა, აღიარების სიმბოლოა, რომელიც აჩვენებს, რომ ჩემი პროფესიული გამოცდილება, მოსწავლეებთან მუშაობის მეთოდები და ინოვაციური მიდგომები დაფასებულია. ეს სტატუსი მიძლიერებს პასუხისმგებლობის გრძნობას და ინსპირაციას მაძლევს, გავაგრძელო ინოვაციური, ემპათიური და მოსწავლეზე ორიენტირებული სწავლების პრაქტიკა, რომელიც ბავშვებს რეალურად ემსახურება. ჩემთვის მთავარი მაინც მოსწავლეების განვითარება, მათი დამოუკიდებლობა, შემოქმედებითი უნარებისა და კრიტიკული აზროვნების გაძლიერებაა, რაც ფინალისტობის პროცესში კიდევ უფრო ნათლად ჩანს.
ყველაზე დიდი გამარჯვება ჩემთვის არის იმ ნაყოფიერი შედეგების დანახვა, რაც მოსწავლეებთან ყოველდღიურ მუშაობაში მივიღეთ: მათი დამოუკიდებლობის, შემოქმედებითი უნარებისა და აქტიური, პასუხისმგებლიანი მოქალაქეების ფორმირება. თითოეული პროექტი, როლი, საველე სამუშაო ან დიზაინ-თინქინგის აქტივობა მათ შესაძლებლობებს აფართოებს და სწავლას რეალურ ცხოვრებას უკავშირებს. ჯილდოს ფინალისტობა განსაკუთრებულ მნიშვნელობას იძენს პროფესიული თანამოაზრეების თვალსაზრისითაც: ათეულის კლუბი აერთიანებს პროგრესულად მოაზროვნე მასწავლებლებს, რომლებიც ინოვაციურ, მაღალი ხარისხის და მოსწავლეზე ორიენტირებულ პრაქტიკას იყენებენ. მათი გამოცდილების გაზიარება და მხარდაჭერა საშუალებას გვაძლევს, მივიღოთ ახალი ხედვები, გავაუმჯობესოთ სწავლების მეთოდები და ჩვენი პროფესიის ეფექტი მაქსიმალურად გავზარდოთ. მოკლედ, მთავარი გამარჯვება არ არის ტიტული, არამედ ეს ყოველდღიური, პროფესიული „მიკროსამყაროს“ ცვლილებებია – მოსწავლეების განვითარება, პროფესიული თანამოაზრეების მხარდაჭერა და ინოვაციური სწავლების გაძლიერება.
ტიტული ან ჯილდო ჩემთვის მიზანი არაა – მთავარია შესაძლებლობა, გავზარდო და გავაძლიერო უკვე არსებული პროექტები, განსაკუთრებით ახალგაზრდული ჰაბი „ჩვენი სივრცე“, სადაც 14-18 წლის ახალგაზრდები მართავენ ბანაკებს, პროექტებსა და სტაჟირებებს. გამარჯვება მხოლოდ ზრდის ჩემს პასუხისმგებლობას, შევქმნა მეტი ისეთი სივრცე, სადაც ახალგაზრდები თავისუფლად, შემოქმედებითად და პასუხისმგებლობით შეძლებენ სწავლას, აქტიურობას და მოქალაქეობას. ამავდროულად, გავაძლიერებ კოლეგების პროფესიულ განვითარებას და ინოვაციური პრაქტიკის გაზიარების ხელშეწყობას, თანამშრომლობას მასწავლებლებს შორის და ხელს შევუწყობ სწავლების ხარისხისა და ინტერაქტიული მეთოდების გავრცელებას მთელ სასწავლო სისტემაში.
მასწავლებლის პროფესიისთვის, ჩემი გამოცდილებით, ყველაზე მნიშვნელოვანი თვისებებია ემპათია, მოთმინება, კომუნიკაციის უნარი, ინოვაციურობა და პასუხისმგებლობა. მოსწავლეებთან ურთიერთობა ვერ იქნება შედეგიანი, თუ მასწავლებელს არ შეუძლია სიყვარული, პატივისცემა და არ აქვს უნარი მოუსმინოს თითოეულ ბავშვს, აღმოაჩინოს მათი ინტერესები და შესაძლებლობები. სწორედ ეს უნარები ქმნის სწავლების პროცესის ხარისხს და მოსწავლეების პიროვნულ, აკადემიურ და მოქალაქეობრივ განვითარებას.
