ქვემო ქართლის რეგიონში საქართველოს მთავრობის, ბულგარეთის საელჩოსა და ევროკავშირის მხარდაჭერით, „საერთაშორისო საგანმანათლებლო ცენტრის“ მიერ ქართულენოვანი კერძო სკოლა „მომავალი“ და საბავშვო ბაღი დაფუძნდა.
26 ოქტომბერს, ქალაქ მარნეულში, სკოლის გახსნის ღონისძიებას ესწრებოდნენ: განათლების, მეცნიერების, კულტურისა და სპორტის მინისტრი მიხეილ ბატიაშვილი, ქვემო ქართლში სახელმწიფო რწმუნებული-გუბერნატორი შოთა რეხვიაშვილი, საქართველოში აზერბაიჯანის საგანგებო და სრულუფლებიანი ელჩი დურსუნ ჰასანოვი, ბულგარეთის რესპუბლიკის ელჩი დესისლავა ივანოვა, პარლამენტში მარნეულის მაჟორიტარი დეპუტატი და ადგილობრივი თვითმმართველობის ხელმძღვანელი პირები. სტუმრებმა სკოლის ინფრსტრუქტურა დაათვალიერეს და პედაგოგებს, მოსწავლეებს და მშობლებს გაესაუბრნენ.
საგანმანათლებლო დაწესებულებაში მაღალი აკადემიური სტანდარტის, სასწავლო-სააღმზრდელო გარემოა შექმნილი, სკოლაში ქართული და ინგლისური ენების გაძლიერებული სწავლება მიმდინარეობს. შოთა რეხვიაშვილმა, სკოლის ადმინისტრაციას გაწეული საქმიანობისთვის მადლობა გადაუხადა და ყურადღება გაამახვილა სახელმწიფო ენის ცოდნის აუცილებლობასა და ასევე, საერთაშორისო-საკომუნიკაციო ენის შესწავლის საჭიროებაზე. მისივე თქმით, ეთნიკურად მრავალფეროვანი რეგიონის ახალგაზრდებისთვის განსაკუთრებით მნიშვნელოვანი და პრიორიტეტულია სკოლაში არსებული სწავლების მეთოდი, რომელიც სრულფასოვანი ინტეგრაციის დამატებით შესაძლებლობას ქმნის.
სკოლაში სწავლა ქართულ ენაზე მიმდინარეობს და სწავლებაში ახალგაზრდა პედაგოგები არიან ჩართული. მიხეილ ბატიაშვილმა მადლობა გადაუხადა დონორებს და კერძო სექტორის წარმომადგენლებს წარმატებული პროექტის მხარდაჭერისთვის და აღნიშნა, რომ „მარნეულის მულტიეთნიკურ გარემოში ქართულენოვანი განათლების კერას სახელმწიფო მნიშვნელობა აქვს“.
შოთა რეხვიაშვილი, ქვემო ქართლის გუბერნატორი: „მინდა, პირველ რიგში, ძალიან დიდი მადლობა გადავუხადო საერთაშორისო საგანმანათლებლო ცენტრს იმ ინვესტიციისთვის, რის შედეგსაც ჩვენ ახლა ვხედავთ. ეს ძალიან დიდი საჩუქარია მარნეულისთვის. აქ ყველა პირობა და სათანადო გარემოა იმისთვის, რომ ბავშვებმა ხარისხიანი განათლება მიიღონ. ამ რეგიონისთვის სპეციფიკური და უპირველესი საჭიროებაა სახელმწიფო ენის სრულყოფილი ფლობა და ზუსტად ამ მიზნით, ამ მიმართულებითაა გაასკეცებული ენერგია ჩადებული სასკოლო პროგრამაში, რომ თაობებმა ისწავლონ სახელმწიფო ენა და შემდგომ გზა გაეხსნათ სახელმწიფოს საზოგადოებრივ-პოლიტიკურ ცხოვრებაში. ასევე მნიშვნელოვანია საერთაშორისო საკომუნიკაციო ენის პრიორიტეტულად წარმოჩენა, ინგლისური ენის გაძლიერებული სწავლება. ყველა მიმართულებით საინტერესო პროგრამებია. იმედი მაქვს, რომ გაამართლებს ამ სასწავლებლის სახელი — „მომავალი“ და სწორედ აქ შეიქმნება ჩვენი ბავშვებისთვის და ახალგაზრდა თაობისთვის სასურველი მომავალი, რაც მათ შემდგომი განათლებისთვის გაუხსნის გზას.“
სკოლაში, სწავლების სამივე საფეხურისთვის, თანამედროვე მაღალი აკადემიური სტანდარტის სასწავლო-სააღმზრდელო გარემოა შექმნილი. პედკოლექტივი დაკომპლექტებულია ადგილობრივი და დედაქალაქიდან მოწვეული ახალგაზრდა და გამოცდილი პედაგოგებით. ამ ეტაპზე, სკოლას 150-მდე მოსწავლე ჰყავს, რომელთა ძირითადი ნაწილი ეთნიკური აზერბაიჯანელია. 500 მოსწავლეზე გათვლილი სკოლა ახალი სასწავლო წლიდან შეუდგა ფუნქციონირებას.
