ეკა ღვინიაშვილი – ფსიქოლოგი, სპეციალური განათლების მაგისტრი
სპეციალური საგანმანათლებლო საჭიროების მქონე მოსწავლეებთან მუშაობა მასწავლებლისგან კრეატიულობასა და მრავალფეროვნებას მოითხოვს. მეც ვცდილობ, ჩემი ურთიერთობა მათთან საინტერესო გავხადო და შემეცნებითი, რა თქმა უნდა. „სწავლა კეთებით“ ერთ-ერთი ისეთი მიდგომაა, რომლის გამოყენებაც ნებისმიერ მოსწავლესთან ნაყოფიერად სრულდება.
ჯონ დიუის (1859-1952) განათლების კონცეფციის მიხედვით, განათლება უნდა ემყარებოდეს გამოცდილებას და არა ფაქტების დამახსოვრებას თუ სამსახურისთვის მოსამზადებელ წვრთნას. წარმატებული სწავლისთვის საუკეთესოა ცოდნის მიღება გამოცდილებით და სოციალური ინტერაქციით, ანუ „სწავლა კეთებით“.
შევეცდები გადმოგცეთ, როგორ დავამზადეთ მე და ჩემმა უსაყვარლესმა მოსწავლემ ხელნაკეთი წიგნი. ჩემი მიზანი იყო, კეთების პროცესში მოსწავლეს ესწავლა ახალი ტექსტის შექმნა და წიგნის სტრუქტურული ელემენტები (ყდა, თავფურცელი, გამომცემლობა, სათაური, ავტორი, ილუსტრაცია…). წიგნის გასაფორმებლად ორნამენტი დაგვჭირდა და ისიც დაუგეგმავად შემოგვესწავლა. ბოლოს კი, ეს იქნებოდა სასწავლო რესურსი, რომელიც რესურსოთახში დარჩებოდა და პატარა მოსწავლეებიც გამოიყენებდნენ.
და დავიწყეთ…
მე პირადად, ტექსტის შექმნა ყველაზე მეტად მერთულებოდა, მაგრამ რეალურს დავამატეთ ცოტა ფანტაზია და პატარა, მარტივი ზღაპარიც მზად გვქონდა, სათაურით — „ლეკუჩა“. სიმართლე გითხრათ, მე კატუნიაზე ვაპირებდი დაწერას, მაგრამ ჩემმა მოსწავლემ, მოდი, ლეკვზე დავწეროთო, მეც დავთანხმდი.
ტექსტის შემდეგ, ჯერი ილუსტრაციებზე მიდგა. შემდეგი შეხვედრისთვის ილუსტრაციების რამდენიმე ვერსია დავახვედრე მოსწავლეს და თავად აირჩია ტექსტის შესაბამისი ნახატი თითოეული გვერდისთვის.
როგორ მოვძებნოთ ინტერნეტში ჩვენთვის სასურველი ე.წ. გასაფერადებელი ნახატი? ინგლისურ ენაზე რომ უფრო ადვილად ვიპოვით ყველაფერს, ეს ამბავი ყველას მოგვეხსენება, ამიტომ, ჯერ ჩვენთვის სასურველ სიტყვას გადავთარგმნით https://translate.google.com/-ს მეშვეობით, მაგ. პატარა ძაღლი — Little dog. შემდეგ ამ სიტყვას ჩავწერთ გუგლის საძიებო ველში და დავამატებთ სიტყვას drawing (little dog drawing). ჩამოვტვირთავთ შერჩეულ სურათს, დავაკოპირებთ, გადავიტანთ ვორდის დოკუმენტში და ამოვბეჭდავთ. ვორდის დოკუმენტში გადიდება-დაპატარავება და ზედმეტი ადგილების მოჭრაც შეგვიძლია.
წიგნის შიდა ფურცლები ამ პრინციპით მოვამზადეთ, ყდა ბოლოსთვის შემოვიტოვეთ.
მუყაოს სქელი ქაღალდი სახლში ადვილად მოგვეპოვება, სკოლაშიც შეიძლება მოძიება. ეს მუყაო შეგვიძლია პირდაპირ მოვხატოთ ან ფერადი ფურცლებით გავაფორმოთ. ჩვენ ფარდის სქელი ნაჭერი გადავაკარით, ცხელი წებოს გამოყენებით. სხვათა შორის, რამდენიმე ნაჭრიდან, ჩემმა მოსწავლემ ეს კონკრეტული იმიტომ აარჩია, რომ ფუმფულა იყო და ლეკუჩასთან ასოცირდებოდა. ბოლოს ყდაც მოვარგეთ და ბანტით შევკარით.
წიგნზე მუშაობის პროცესში ჩემმა მოსწავლემ მკითხა — „შეიძლება კლასელებს ვაჩვენო?“ ეს იმას ნიშნავდა, რომ ძალიან ბედნიერი და ამაყი იყო საკუთარი მიღწევით და სხვისთვის გაზიარება მოუნდა. ჩემი ჩანაფიქრი გამართლდა…
