პრემიერ-მინისტრის, გიორგი გახარიას განცხადებით, დღევანდელი ტენდენციები ფრთხილი ოპტიმიზმის საფუძველს იძლევა და თუ მსგავსი ტენდენცია უახლოესი ერთი კვირის განმავლობაში შენარჩუნდება, მთავრობამ შესაძლოა, თბილისში, ქუთაისსა და რუსთავში შეზღუდვების უფრო ადრე მოხსნასთან დაკავშირებითაც დაიწყოს მსჯელობა. მათ შორის, ეს შეეხება საგანმანათლებლო დაწესებულებებსა და საზოგადოებრივ ტრანსპორტსაც.
„დღეის მონაცემებით, შემიძლია გითხრათ, რომ 18 ათასი აღებული ტესტიდან, დადებითი მხოლოდ 723-ია, რაც, რა თქმა უნდა, კარგია, მაგრამ ეს ჩვენთვის მაინც დიდი რიცხვია, თუმცა, მიუახლოვდა 4%-ს. როცა დადებითობის მაჩვენებელი, 7 დღის განმავალობაში, გვექნება 4%, ჩვენ უფრო თამამად, ფრთხილად, გონივრულად შეგვეძლება ეკონომიკის გახსნა და როგორც ჩანს, დღვანდელი ტენდენციები გვაძლევს ფრთხილი ოპტიმიზმის საფუძველს.
დღეს ჩვენ უნდა დავიწყოთ მსჯელობა იმაზე, თუ მსგავსი ტენდენცია შევინარჩუნეთ, უახლოესი ერთი კვირის განმავლობაში, ისე როგორც გავაკეთეთ ზაფხულში, ეტაპობრივი გახსნა ცოტა უფრო ადრე დავიწყოთ. ეს ეხება თბილისს, ქუთაისსა და რუსთავს. პირველ რიგში, ეს ეხება საგანმანათლებლო დაწესებულებებს, რომ ჩვენს ბავშებს მივცეთ შესაძლებლობა, კლასებში დაიწყონ სწავლა. რა თქმა უნდა, ამას თან მუნიციპალური ტრანსპორტის ამოქმედებაც ერთვის და ამაზე უნდა ვიმსჯელოთ ეტაპობრივად, ისე, რომ რისკის ქვეშ არ დავაყენოთ ეპიდემიის მართვის ის მიღწევა, რომელიც გვაქვს. ყველაფერი უნდა გავაკეთოთ იმისთვის, რომ ეს მიღწევა სტაბილურად შევინარჩუნოთ, სანამ ეტაპობრივად და სრულად არ დავიწყებთ ტურიზმის გახსნას. ჩვენი საბოლოო მიზანი არის ის, რომ ეკონომიკის გახსნა იყოს მდგრადი, გონივრული და, რაც მთავარია, დაცული. 2,3,4 და 5 ათას ყოველდღიურ მაჩვენებლზე, უნდა გვესმოდეს, რომ ნორმალურ ეკონომიკურ საქმიანობაზე საუბარი არ და ვერ იქნება“, – განაცხადა პრემიერმა.
