ლულა ხვიჩავა
სსიპ ზუგდიდის მუნიციპალიტეტის სოფ. ჩხორიის საჯარო სკოლის დირექტორი, რუსული ენისა და ლიტერატურის მასწავლებელი
დღეს, თანამედროვე პედაგოგიკაში, აქტუალურია პროექტზე დაფუძნებული სწავლება, რომელიც ავითარებს მოსწავლეებში კრიტიკულ და შემოქმედებით აზროვნებას, პრობლემის გადაჭრის გზების ძიების უნარებს და ხელს უწყობს მათი მიდრეკილებების წარმოჩენა-განვითარებას, ბევრად სახალისოს და საინტერესოს ხდის სასკოლო ცხოვრებას.
ზუგდიდის მუნიციპალიტეტის სოფელ ჩხორიის საჯარო სკოლა, უკვე მეექვსე წელია, ჩართულია eTwinning-ის ქსელში, რომლის მიზანია, ინფორმაციულ-საკომუნიკაციო ტექნოლოგიების გამოყენებით, სხვადასხვა ქვეყნის სკოლებთან თანამშრომლობა, გამოცდილების გაზიარება, საკუთარი ტრადიციებისა და წეს-ჩვეულებების გაცნობა, ინგლისურ ენაში ლექსიკური მარაგის გამდიდრება.
2017 წლიდან დღემდე, ჩვენს სკოლაში, 40-მდე eTwinning პროექტი განხორციელდა. მათ შორის, 15-მდე ჩვენ მიერ ინიცირებული პროექტი, 25-მდე – უცხოელების მიერ.
მინდა გამოვყო ერთ-ერთი, უცხოელ კოლეგებთან ერთად განხორციელებული, პროექტი „ერთად… დაბინძურებისგან თავისუფალი გარემოსკენ!“ /ინიცირებული იორდანიელი მასწავლებლის მიერ/. პროექტზე მუშაობისას ჩვენი მიზანი იყო: კლიმატის ცვლილებებისა და მისი შედეგების შესახებ ინფორმირებულობის ამაღლება; სხვადასხვა ქვეყანაში ეკოლოგიური პრობლემების, კლიმატის ცვლილებებით გამოწვეული შედეგების შესწავლა მოსწავლეების მიერ და მათი გადაჭრის გზების ძიება, ნარჩენების დახარისხება-გადამუშავებაზე პრეზენტაციების მომზადება და ერთმანეთისთვის გაზიარება, ონლაინ ჩართვების საშუალებით; გამწვანებისა და დასუფთავების აქციების მოწყობა, კომპოსტის დამზადება სახლის პირობებში; შემოქმედებითობის, კრეატიულობის, სწავლის, გუნდური მუშაობისა და თანამშრომლობის უნარების განვითარება; პასუხისმგებლობების გაზიარება მუშაობის პროცესში; სხვადასხვა კომპიუტერულ პროგრამებში მუშაობა და ციფრული წიგნიერებისა და ისტ-ის უნარების განვითარება; ტოლერანტული გარემოს შექმნა.
პროექტში მონაწილე ბავშვებს უნდა შეექმნათ ინფორმაციული პლაკატები, ნახატები, პოსტერები, ვიდეოები, გადაეღოთ ფოტოები. თამაშის საშუალებით, პროექტმა სერიოზული სტიმული მისცა მოსწავლეებს, შედეგის მისაღწევად, გამოეყენებინათ სხვადასხვა თემები. მათ შეძლეს ახალი ცოდნის აგება წინარე ცოდნისა და გამოცდილების საფუძველზე, გაიუმჯობესეს წერის, კითხვისა და ლაპარაკის უნარები ინგლისურ ენაში; შეძლეს კომპიუტერული უნარების განვითარება, ინტერნეტის უსაფრთხო გამოყენება, სხვადასხვა პროგრამების შესწავლა, ფაილების გამოსახვითა და მომზადებით; გაეცნენ კლიმატის ცვლილებას და დედამიწაზე დაბინძურების გავლენას, აწარმოეს სოციალური კვლევები გარემოზე. პროექტში მონაწილე მოსწავლეებმა და მასწავლებლებმა, მითითებულ გვერდზე, განათავსეს ინფორმაცია თავიანთი საქმიანობის შესახებ; იმუშავეს პროექტის ლოგოს შექმნაზე, რომელიც ასახავდა პროექტის სახელწოდების – „ერთად… დაბინძურებისგან თავისუფალი გარემოსკენ!“ სიმბოლოს. აქტივობის ბოლოს შეირჩა საუკეთესო ნამუშევარი, რომელიც პროექტის მთავარი ლოგო გახდა.
Linoit-ის ბმულზე ერთმანეთს გავუზიარეთ წინადადებები და იდეები ინტერნეტის უსაფრთხო გამოყენების წესების შესახებ; მონაწილე სკოლებმა შექმნეს პროექტის რუკა, წარადგინეს სკოლები, ქვეყნები, ციფრული ტექნოლოგიების დახმარებით დაამზადეს პოსტერები, პარტნიორი სკოლის მოსწავლეებმა და მასწავლებლებმა ასევე შექმნეს ონლაინ თამაშები, რომელსაც ყველა სიამოვნებით შეუერთდა. იყო ონლაინ ჩართვები, შეხვედრები ჩატში. ჩვენი მოსწავლეები ხალისით ჩაერთვნენ და ითამაშეს კაჰუტი. მოსწავლეებმა შექმნეს ვიდეოები კლიმატის ცვლილებების შესახებ, კომპოსტის დამზადებაზე, ნარჩენების გადამუშავებაზე. რადგან eTwinning მიზნად ისახავდა მედიაწიგნიერების პოპულარიზაციას და ხაზს უსვამდა კრიტიკული აზროვნების უნარის მნიშვნელობას, შექმნეს პოსტერები აღნიშნულ თემაზე და განათავსეს მითითებულ გვერდზე.
ჩემმა მოსწავლეებმა მოახდინეს პროექტში მონაწილე ქვეყნების დროშების კოდირება. მიიღეს მონაწილეობა, ასევე, Code Week ივენთში „ერთად… დაბინძურებისგან თავისუფალი გარემოსკენ!“, დასუფთავების აქციებში, სოფლის მეურნეობის საქმიანობაში. შექმნეს საგანმანათლებლო თამაშები გლობალურ დათბობაზე, ბუნებრივ კატასტროფებზე.
თანამშრომლობით შეიქმნა:
- ინტერნაციონალური გუნდი
თითოეულმა გუნდმა აირჩია სახელწოდება და დაწერა კანონები etwinning ეთიკის შესახებ, საკუთარი გუნდის სახელით.
- ჩატარდა მოსწავლეთა კონფერენცია
მოსწავლეებმა შექმნეს ელექტრონული პრეზენტაციები, ვიდეორგოლები, ფოტოსლაიდები, სურათები და პლაკატები ქალაქზე, სოფელზე, ქვეყანაზე, მეგობრობაზე, eTwinning-ის დღეზე, ინტერნეტის უსაფრთხოებაზე. მათი გამოფენა გაიმართა სკოლაში, ასევე, გამოქვეყნდა სოციალურ ქსელში, განთავსდა ბლოგზე. მოსწავლეებს განუვითარდათ ჯგუფური მუშაობის, კომუნიკაციისა და შემოქმედებითი უნარები, უკეთ დაეუფლნენ ICT ტექნოლოგიებს. პროექტმა მიიღო ეროვნული და ევროპული ხარისხის ნიშანი.
ასევე, გამოვყოფდი ჩემ მიერ ინიცირებულ პროექტს, უკრაინელ კოლეგასთან, სვეტლანა ლინარსკაიასთან ერთად (ჩერკასი, კოლეჯი ბერეჰინია) – „მოდი, ერთად აღვნიშნოთ აღდგომა!“, რომლის მიზანი იყო სხვადასხვა ქვეყნების სააღდგომო ტრადიციებისა და ადათ-წესების გაცნობა. პროექტის ფარგლებში, ევროპის სხვადასხვა ქვეყნის მოსწავლეებს მივაწოდეთ ინფორმაცია საქართველოს სააღდგომო ტრადიციებისა და ადათ-წესების შესახებ. განსაკუთრებით იხალისეს ბავშვებმა სკოლის ეზოში კვერცხების შეღებვით, რომელიც სოციალურად დაუცველებს გადასცეს. მათვე დაამზადეს სააღდგომო მისალოცი ბარათები და გაუგზავნეს უკრაინელ თანატოლებს. პროექტის მონაწილეების თანამშრომლობით შეიქმნა ელექტრონული სააღდგომო რეცეპტების წიგნი, რაც განსაკუთრებით საინტერესო აღმოჩნდა მოსწავლეებისთვის. პროექტმა ეროვნული და ევროპული ხარისხის ნიშანი მიიღო.
პროექტის „წყალი სიცოცხლეა!“ ფარგლებში, რომელიც ემსახურებოდა მდგრადი განვითარების მე-6 მიზანს – სუფთა წყალი და სანიტარია, ჩატარდა გამოკითხვები. პროექტში მონაწილე სკოლების მოსწავლეებმა შეისწავლეს წყლის დაბინძურების პრობლემები, გაიმართა მსჯელობა სასმელი წყლის დეფიციტით გამოწვეულ საფრთხეებზე, მათი გადაჭრის გზებზე. ჩატარდა ონლაინ კონფერენცია თემაზე – „წყალი – სიცოცხლის ელექსირი!“ მოსწავლეებმა მოიძიეს ინფორმაცია საქართველოში არსებულ მინერალურ წყლებზე და პრეზენტაციები განათავსეს პადლეტის დაფაზე. წყლის საერთაშორისო დღესთან დაკავშირებით, საცხოვრებელ ადგილებთან არსებული წყაროები და მდინარის ნაპირები დაასუფთავეს.
მოსწავლეებმა CODE WEEK აქტივობებშიც მიიღეს მონაწილეობა და შექმნეს ელექტრონული თამაშები წყალზე, მის თვისებებზე, დაამზადეს პოსტერები, საინფორმაციო ბუკლეტები და გაავრცელეს თემში, შექმნეს ონლაინ თამაშები პარტნიორი სკოლებისთვის (KAHOOT: LEARNINGAPP, Word wall.net და სხვ.). პროექტმა ეროვნული ხარისხის ნიშანი მიიღო.
eTwinning პროექტმა ხელი შეუწყო მოსწავლეთა ჩართულობას სასკოლო ცხოვრებაში, დაუმეგობრდნენ უცხოელ თანატოლებს, განუვითარდათ ინგლისური ენისა და ისტ ტექნოლოგიების ფლობის უნარ-ჩვევები. ბავშვები აქტიურად თანამშრომლობენ პარტნიორ სკოლებთან, მონაწილეობენ საერთაშორისო კონფერენციებში, Code Week აქტივობებში, Kahoot-ის თამაშებში.
eTwinning-მა ნამდვილად უფრო საინტერესო გახადა სკოლის ცხოვრება. მასწავლებლებმა გავიღრმავეთ ცოდნა სწავლისა და სწავლების თანამედროვე მეთოდებისა და აქტივობების შესახებ, მოსწავლეები კი უფრო ფართოდ და თავისუფლად მოაზროვნეები გახდნენ. პროექტის შედეგად მიღებული გვაქვს 40-მდე ეროვნული და 30-მდე ევროპული ხარისხის ნიშანი /მათ შორის ჩემი – 15 ეროვნული და 12 ევროპული ხარისხის ნიშანი/.
2021-2022 სასწავლო წელს ჩვენს სკოლას „eTwinning სკოლის“ ტიტული მიენიჭა, რაც იმის დასტურია, რომ ჩვენი მოსწავლეების საქმიანობა ევროპულ დონეზეა აღიარებული.