დღეს ჩვენს რუბრიკაში ქობულეთის მუნიციპალიტეტის რესურსცენტრს წარმოგიდგენთ, რომელიც პანდემიით გამოწვეულმა კრიზისმა ისეთივე სირთულეების წინაშე დააყენა, როგორც დანარჩენი რესურსცენტრები. მათაც მოუხდათ დისტანციურ სწავლებაზე გადასვლა, სკოლების დროებით მიტოვება და, ფაქტობრივად, „ახალი ველოსიპედის გამოგონება“, რადგან სრულიად ახალ რეალობაში გააგრძელეს მუშაობა. თუმცა სირთულეებს თავი გაართვეს და ისევ დაუბრუნდნენ საკლასო ოთახებს.
პარალელურად, რესურსცენტრი განათლების სფეროში მიმდინარე პროცესებსაც უწყობს ფეხს და ყველაფერს აკეთებს სიახლეთა დასანერგად, მასწავლებელთა მხარდასაჭერად. მით უფრო, სკოლების რიცხვიც ბევრია, მასწავლებელთა და მოსწავლეთა რაოდენობაც, ანუ საქმე ბევრია. ამ თემებზე გვესაუბრება ქობულეთის რესურსცენტრის ხელმძღვანელი მადონა გოგიტიძე.
– რამდენი სკოლაა თქვენს მუნიციპალიტეტში და როგორია მოსწავლე-მასწავლებელთა კონტინგენტი?
– ქობულეთის მუნიციპალიტეტში 49 სკოლაა, აქედან 46 საჯაროა და 3 – კერძო. მიმდინარე სასწავლო წელს საჯარო და კერძო სკოლებში 11848 მოსწავლე და 1201 მასწავლებელია, აქედან 9 – მენტორი მასწავლებელი, 133 – წამყვანი, 849 – უფროსი, 184 – პრაქტიკოსი და 26 – მაძიებელი.
– რას აკეთებს რესურსცენტრი მასწავლებელთა პროფესიული განვითარებისთვის?
– მუნიციპალიტეტის სკოლებში დასაქმებული პედაგოგებისთვის საქართველოს განათლებისა და მეცნიერების სამინისტროს ან მასწავლებელთა პროფესიული განვითარების ეროვნული ცენტრის მიერ დაგეგმილი ტრენინგების, სემინარების (ვებინარების) ჩატარების მიზნით, რესურსცენტრს რეგულარულად უწევს საორგანიზაციო საკითხების მოგვარება, ყოველწლიურად ტარდება მასწავლებელთა მუნიციპალური კონფერენცია, მუდმივ რეჟიმში მიმდინარეობს მასწავლებელთათვის კონსულტაციები სასერტიფიკაციო გამოცდების მსვლელობასთან და მათზე რეგისტრაციასთან დაკავშირებით; მოთხოვნის შემთხვევაში, სკოლებში, ადგილებზე გასვლით ხდება მათთვის კონსულტაციების გაწევა სასწავლო პროცესის ხარისხიანად წარმართვის, ეროვნული სასწავლო გეგმის ცალკეული საკითხების განხილვის მიზნით და კიდევ სხვა მრავალი ღონისძიება.
– არაფორმალური და სამოქალაქო განათლების კუთხით რა მდგომარეობაა?
– რაც შეეხება არაფორმალურ განათლებას, რესურსცენტრი, ამ მხრივაც, ხშირად ხელს უწყობს სხვადასხვა სამთავრობო თუ არასამთავრობო ორგანიზაციების მიერ მოწოდებული ინფორმაციის გავრცელებას მოსწავლეთა კონკურსების, ოლიმპიადების შესახებ. სასკოლო კლუბების მუშაობის ხელშეწყობის მიზნით, რესურსცენტრი თანამშრომლობს ადგილობრივ თვითმმართველობასთან, მშობლებთან, დაინტერესებულ თემთან.
ასევე, რესურსცენტრის ორგანიზებით, არაერთხელ დაიგეგმა ღონისძიებები არაფორმალური და სამოქალაქო განათლების ხარისხის ასამაღლებლად, მაგალითად, მოსწავლეთა ვიზიტები სახელმწიფო ორგანიზაციებში, დოკუმენტური თუ მხატვრული ფილმების ჩვენება და მათი განხილვა, სასწავლო-შემოქმედებითი შეხვედრები სხვადასხვა სკოლების თანატოლ მოსწავლეებთან და სხვა.
– რა მიღწევები გაქვთ მოსწავლეთა სასკოლო თუ საზოგადოებრივ აქტივობებში?
– ჩვენი მოსწავლეები აქტიურად არიან ჩართული ეროვნულ სასწავლო ოლიმპიადებსა და აჭარის ავტონომიური რესპუბლიკის განათლების, კულტურისა და სპორტის სამინისტროს მიერ გამოცხადებულ საგნობრივ ოლიმპიადებსა და სხვადასხვა კონკურსებში. მიმდინარე სასწავლო წელს გამარჯვებულებიც გვყავს, მოსწავლეები მონაწილეობენ და იმარჯვებენ ეროვნულ ინტელექტუალურ ჩემპიონატში „ეტალონი“.
აჭარის ავტონომიური რესპუბლიკის სპორტისა და ახალგაზრდობის საქმეთა დეპარტამენტის პროგრამის „ახალგაზრდულ საქმეთა სფეროს ხელშეწყობის“ ფარგლებში, ინტელექტუალური თამაშები „რა? სად? როდის?“ ტარდება. აჭარაში სასკოლო ჩემპიონატს, საქართველოს კლუბის „რა? სად? როდის?“ მიერ მინიჭებული ექსკლუზიური უფლებით, ა(ა)იპ „აჭარის ინტელექტ კლუბი“ ახორციელებს. შესაბამისად, აქაც გვყავს გამარჯვებული გუნდები.
– დაგვისახელეთ ამ მხრივ გამორჩეული სკოლები და ის სფეროები, სადაც მათ მიაღწიეს წარმატებებს?
– მუნიციპალიტეტში, ისე როგორც მთლიანად ქვეყანაში, გვყავს ძალიან ნიჭიერი ახალგაზრდები, წარმატებული მოსწავლეები სხვადასხვა მიმართულებით: ჰუმანიტარულ, საზოგადოებრივ, ზუსტ და საბუნებისმეტყველო საგნებში, შემოქმედებით სფეროში, სპორტში. ასეთი მოსწავლეები თითქმის ყველა სკოლაში გვყავს და ამიტომ ცალკეული სკოლების დასახელებისგან თავს შევიკავებ.
– რა პრობლემებია მუნიციპალიტეტის სკოლებში, გაქვთ თუ არა ახალი შენობების ან რემონტის საჭიროება, ინფრასტრუქტურის მხრივ ხომ არაა სირთულეები?
– გეთანხმებით, თქვენ მიერ ჩამოთვლილი გამოწვევები ჩვენი მუნიციპალიტეტის სკოლებსაც ეხება, თუმცა, სარეაბილიტაციო საკითხების, ინფრასტრუქტურისა და ტექნიკური აღჭურვილობის მოწესრიგების კუთხით, აჭარის ავტონომიური რესპუბლიკის განათლების, კულტურისა და სპორტის სამინისტროსა და საქართველოს განათლებისა და მეცნიერების სამინისტროს მხრიდან არაერთი პრობლემა მოგვარდა.
– რა პრობლემები შეგიქმნათ პანდემიამ და დისტანციურმა სწავლებამ, რამდენად შეძელით ყველა სკოლაში სასწავლო პროცესის შეუფერხებლად წარმართვა და რაიმე მიზეზით ხომ არ დარჩა რომელიმე მოსწავლე სასწავლო პროცესის მიღმა?
– პანდემიის და დისტანციური სწავლებისას არაერთი საკითხი დარჩა მოსაგვარებელი, ყველა ცდილობდა, მოსწავლეთა და მშობელთა წინაშე მდგარი პრობლემების გადაჭრაში წვლილი შეეტანა. გვქონდა განათლებისა და მეცნიერების სამინისტროს მხრიდან შემოთავაზებული სხვადასხვა ალტერნატივა: „ტელესკოლა“, სხვადასხვა ელექტრონული პლატფორმები, სკოლების ადმინისტრაციის მხრიდან შეთავაზებული დახმარება კომპიუტერული ტექნიკის გამოყენების მხრივ, მასწავლებელთა მხრიდან მუდმივი ჩართულობა მოსწავლეთა სასწავლო პროცესში ჩართვის მიზნით და სხვ.
– თავად სისტემამაც აღიარა, რომ დისტანციურმა სწავლებამ გარკვეული ჩამორჩენა გამოიწვია. ზაფხულში თუ იგეგმება რაიმე ამ ჩამორჩენის აღმოსაფხვრელად?
– სამწუხაროდ, პანდემია სახელმწიფოთა ცხოვრების ყველა სფეროს შეეხო, მათზე გარკვეული ზემოქმედებაც იქონია. ვფიქრობ, განათლების სფერო ერთ-ერთი ყველაზე მგრძნობიარე აღმოჩნდა მათ შორის, ვინაიდან მრავალი სირთულისა თუ გამოწვევის მიუხედავად, შეძლო დისტანციურ სწავლებაზე გადასვლა და ადაპტირება. ჩვენ მოსწავლეებთან, მასწავლებლებთან, სკოლების ადმინისტრაციასთან, მშობლებთან და მთელ საზოგადოებასთან ერთად შევძელით საკუთარ თავში ახალი ძალების, უნარებისა და მისწრაფებების აღმოჩენა ისე, რომ სასწავლო პროცესის უწყვეტი მსვლელობა, განათლებისკენ სწრაფვა არ შეგვიჩერებია. ვფიქრობ, ეს არ იყო მარტივი, თუმცა გამოსავლის ძიების პროცესი საკმაოდ საინტერესო იყო. საზაფხულო და ზოგადად სამომავლო გეგმებიც, სამწუხაროდ, ჯერ კიდევ ვირუსის გავრცელებასა და საერთო მდგომარეობაზეა დამოკიდებული.
ირაკლი თავაძე
