მოვლუდ მეხრაბოვი – ბოლნისის მუნიციპალიტეტის სოფ. მამხუტის საჯარო სკოლის დამხმარე მასწავლებელი
ქვემო ქართლში, კერძოდ, ბოლნისის მუნიციპალიტეტის სოფელ მამხუტის საჯარო სკოლაში, მასწავლებელთა სახლის პროექტის – „არაქართულენოვანი სკოლების მხარდაჭერა“ – ორენოვანი დამხმარე მასწავლებელი და უფროსი მასწავლებელი ვარ. ოთხი წელია ვასწავლი ქართულს, როგორც მეორე ენას. პროფესიითაც ქართული ენისა და ლიტერატურის სპეციალისტი ვარ, ფილოლოგი, ქართველური ენათმეცნიერების მიმართულების დოქტორანტი. როგორც ორენოვანი დამხმარე მასწავლებელი, ჩემი ფუნქციაა ქართულის, როგორც მეორე ენის მასწავლებლებთან – ქიარამ ბადალოვთან და ჰამზა გუსეინოვთან ერთად, გაკვეთილის დაგეგმვა და ჩატარება. ვაანალიზებთ მოსწავლეების საჭიროებებს, ასევე, ვთანამშრომლობთ პროგრამის კონსულტანტ-მასწავლებელთან, მაია რეხვიაშვილთან.
ადგილობრივ მასწავლებლებს ვეხმარები პროფესიულ განვითარებაში, კოლეგებისგან ეფექტური უკუკავშირის მისაღებად მონაწილეობას ვიღებ სამუშაო შეხვედრებში, როგორც საგნის მასწავლებელი და ორენოვანი დამხმარე მასწავლებელი. ვმსჯელობთ შეფასების კრიტერიუმების დახვეწაზე, სასწავლო პროცესში წარმოქმნილ სირთულეებზე. პრობლემაზე ორიენტირებული სწავლების გასაუმჯობესებლად, მოსწავლეებთან ერთად, ვქმნით ახალ ონლაინ რესურსებს, ვიყენებ ისეთ აქტივობებს, როგორებიცაა: პროექტი, დისკუსია, პრეზენტაცია, ასევე, ვქმნით თვითშეფასების ცხრილს, რაც ხარვეზების აღმოფხვრაში გვეხმარება.
ერთად ბევრი პროექტი, აქტივობა თუ ღონისძიება განვახორციელეთ: პროექტი „ქალთა უფლებების დაცვა“ – მის მომზადებაში ჩართული იყვნენ მაღალი კლასების მოსწავლეები: აიშაგიულ ნაზაროვა, გიული ბადალოვა, მინარა ზეინალოვა, ფარიდა ჟვანია, ნიჯათ მუსაევი, ჯავიდან ტანირვერდიევი, ელმირა ემინოვა და სხვ.; პროექტი „ჩხირკედელა“ ახლა მიმდინარეობს. მოსწავლეები კეთებით სწავლობენ სხვადასხვა საგანს: მათემატიკას, ქიმიას, ფიზიკას, ბიოლოგიას, ქართულ ენასა და სხვა.
სკოლაში ჩავატარეთ შემეცნებით-გასართობი ვიქტორინა, რომლის მომზადებაში დახმარება გაგვიწიეს: კონსულტანტ-მასწავლებელმა, მაია რეხვიაშვილმა, ქართული ენის მასწავლებლებთან ერთად, სკოლის დირექტორმა, გიას ბადალოვმა და მოადგილემ, ილიაზ ორუჩოვმა. მრავალფეროვანი აქტივობებით სკოლის 50-ზე მეტი მოსწავლე შეეჯიბრა ერთმანეთს, გამარჯვებული გუნდი მადლობის სიგელებით და წიგნებით დაჯილდოვდა.
მამხუტის საჯარო სკოლაში, ქართული ენის დღისადმი მიძღვნილი კვირეულის ფარგლებში, კალიგრაფიის კონკურსი ჩავატარეთ, მოსწავლეებმა ქართული ენის ყველა ასოზე ლექსები წაიკითხეს, მონაწილეები სიგელებით დაჯილდოვდნენ.
თავადაც მამხუტის საჯარო სკოლა მაქვს დამთავრებული. მე-9 კლასამდე ქართულს მასწავლიდა ქიარამ ბადალოვი, მე-9 კლასში ახალი ქართული ენის მასწავლებელი თეიმურაზ შალამბერიძე მოვიდა თბილისიდან, ერთად ძალიან საინტერესო გაკვეთილებს ატარებდნენ, იმ დროიდან გამიჩნდა სიყვარული ქართული ენის მიმართ. ჯერ კიდევ სკოლის პერიოდში გადავწყვიტე, ქართული ენის მასწავლებელი გავმხდარიყავი. მადლობა ღმერთს, ოცნება შემისრულდა, ბაკალავრიატის დამთავრების შემდეგ დავბრუნდი ჩემს სოფელში, როგორც მასწავლებელი.
ბოლო 5 წლის განმავლობაში ჩვენი სოფლიდან სტუდენტების რაოდენობა გაიზარდა, ყოველ წელს, დამამთავრებელი კლასის თითქმის ყველა მოსწავლე აბარებს ერთიან ეროვნულ გამოცდებს და მათგან 80%-ზე მეტი საქართველოს სხვადასხვა უნივერსიტეტის სტუდენტი ხდება. 2021 წელს, მე-12 კლასის 8 მოსწავლიდან, ხუთმა საქართველოს სხვადასხვა სახელმწიფო უნივერსიტეტში ჩააბარა: შაჰნაზ მუსტაფაევმა – სამედიცინო უნივერსიტეტში 100%-იანი გრანტით; ელვინ ბაირამოვმა და ალი რამაზანოვმა – თბილისის სახელმწიფო უნივერსიტეტში; სახიბ მამედოვმა და სამირ ემინოვმა, 1+4 პროგრამით, აკაკი წერეთლის სახელმწიფო უნივერსიტეტში (ქუთაისში). დღეს ჩვენ 50-ამდე სტუდენტი გვყავს, რომლებიც უმაღლეს სასწავლებლებში სხვადასხვა სპეციალობაზე სწავლობენ და სურვილი აქვთ, უნივერსიტეტის დამთავრების მერე, თავიანთ მხარეში დაბრუნდნენ.
ჩემი პედაგოგიური საქმიანობის მეოთხე სასწავლო წელი სრულდება. ეს არის უწყვეტი ზრუნვა პროფესიულ განვითარებაზე, სწავლების ინოვაციური მეთოდების დანერგვაზე და, რა თქმა უნდა, სიახლეებზე ორიენტირება, არაერთი გამოწვევის წინაშე აღმოჩენა და მათი დაძლევა… ეს წლები საკმაოდ შედეგიანი გამოდგა პროფესიული ზრდის თვალსაზრისით, უამრავი მნიშვნელოვანი ტრენინგი, საინტერესო ადამიანებთან შეხვედრა, მათი გამოცდილების გაზიარება, საკუთარი საჭიროებების დადგენის მიზნით, საკუთარი შესაძლებლობების ობიექტური შეფასება, კოლეგების უკუკავშირი და მათთან ერთად, მათი დახმარებით, პრობლემების გადალახვა. ყოველივე ეს, ჩემი პროფესიული საქმიანობის გაუმჯობესებისა და წინსვლისთვის, საკმაოდ მყარი ბერკეტი აღმოჩნდა. ამას დაერთო ტრენინგები, რაც ყველაზე ეფექტური რესურსია პროფესიული განვითარებისთვის, მხოლოდ რამდენიმეს დავასახელებ: „ინკლუზიური განათლება“; „ბილინგვიზმი“; „ბულინგი“; „ქართული, როგორც მეორე ენის საგნის სწავლება“; „კითხვის უნარის განვითარება“; „მოსმენის უნარის განვითარება“; „eTwinning-ის პორტალზე ნავიგაცია და პროექტების ინიცირება“; „ლიდერი მასწავლებელი“; „არაფორმალური განათლება“; „მედიაწიგნიერება“; ტრენინგ-კურსი „სამოქალაქო ჩართულობა, ადვოკატირება“ და სხვა. გავეცანი მსოფლიოში აპრობირებულ საგანმანათლებლო სიახლეებს, პედაგოგიურ მიდგომებს, მეთოდებსა და სტრატეგიებს. მიღებულ ცოდნას ვიყენებ ჩემს პედაგოგიურ პრაქტიკაში და, რა თქმა უნდა, ვუზიარებ კოლეგებს.
მოსწავლეებთან და კოლეგებთან ჯანსაღი, საქმიანი ურთიერთობა მაქვს. ჩვენ ერთმანეთს ვეხმარებით პროფესიულ წინსვლაში, სტატუსის ამაღლებაში… ძალიან მიყვარს ჩემი მოსწავლეები, მათთან მუშაობისას არასოდეს ვიღლები, პირიქით, ძალას ვიკრებ, რომ ყოველი მომდევნო გაკვეთილი, თითოეული მათგანისთვის, წინაზე საინტერესო იყოს.
