პირველი ოქტომბრიდან თბილისში, რუსთავში, ქუთაისსა და ზუგდიდის სკოლებში სწავლა, პირველიდან მეექვსე კლასების ჩათვლით, საკლასო ოთახებში დაიწყო. განათლების მინისტრის განცხადებით, მშობლების სურვილის შემთხვევაში, შესაძლოა, შვილებმა სწავლა დისტანციურად გააგრძელონ, სასწავლო პროცესს სკოლა უზრუნველყოფს.
საინტერესოა, რამდენმა მოსწავლემ აირჩია დისტანციურ რეჟიმში სწავლა, რატომ აირჩიეს სწავლების ეს ფორმა და რას ასახელებენ მიზეზად. როგორ დაკომპლექტდება დისტანციური კლასები, აუნაზღაურდებათ თუ არა მასწავლებლებს დამატებით ჩატარებული დისტანციური გაკვეთილების საათები — ამ და სხვა შეკითხვებით იმ ოთხი ქალაქის სკოლების დირექტორებს მივმართეთ, სადაც სასწავლო პროცესი პირველი ოქტომბრიდან განახლდა.
მიხეილ გიორგაძე
ქუთაისის №30 საჯარო სკოლის დირექტორი:
დისტანციური სწავლების რეჟიმზე, 1 ოქტომბრის მონაცემებით, სკოლაში 18 განაცხადია დარეგისტრირებული, თუმცა რაოდენობა შეიძლება ყოველდღიურად შეიცვალოს და ვფიქრობთ, კლებისკენაც კი წავიდეს. მოტივად მშობლები, ძირითადად, კოვიდინფექციისადმი შიშს ასახელებენ. აღსანიშნავია, რომ მოსწავლეთა 95% სკოლაში დადის და უპირატესობას საკლასო ოთახებში მიღებულ განათლებას ანიჭებს. I-VI კლასებში, იმ მოსწავლეებს, რომლებმაც დისტანციური სწავლება აირჩიეს და მეორე ცვლაში არიან, გაკვეთილები დილით — 12-დან 14სთ-მდე — უტარდებათ, პირველი ცვლის პირველკლასელებს კი — 13-დან 15სთ-მდე. 18 განაცხადიდან, მხოლოდ 3-ია პირველკლასელთა მშობლებისგან, დანარჩენი III-V კლასებიდანაა.
დინსტანციური სწავლება საგაკვეთილო პროცესის დასრულების შემდეგ მიმდინარეობს. მასწავლებლები გაკვეთილს, დამატებით, ონლაინ, 30წთ-ის ხანგრძლივობით ატარებენ. მიუხედავად იმისა, რომ ჩვენს სკოლაში, საგაკვეთილო პროცესის პარალელურად, შესაძლებელია გაკვეთილის ონლაინ რეჟიმში ჩატარება (სკოლა სათანადო ტექნიკით სრულადაა აღჭურვილი), მაინც, ტექნიკური ხარვეზების თავიდან აცილების მიზნით, მასწავლებელთან პირისპირ და დისტანციურად გაკვეთილების განმხოლოებას და ცალ-ცალკე ჩატარებას ვირჩევთ. ჩვენ ყველანაირი გამოწვევისთვის მზად ვართ და სწავლების სწორედ იმ მეთოდს გამოვიყენებთ, რომელიც მოსწავლისთვის იქნება მოსახერხებელი. თუმცა, პარალელური სწავლებისკენ უფრო ვიხრებით (ონლაინ სწავლება და ფიზიკური სწავლების ერთობლიობა), რადგან ეს, ფინანსურად, ნაკლები დანახარჯიცაა სკოლისთვის და, რა თქმა უნდა, დისტანციურად მყოფი მოსწავლეც საგაკვეთილო პროცესში გაცილებით სრულყოფილად იგრძნობს თავს, ვიდრე ინდივიდუალურად.
რაც შეეხება მასწავლებლის ანაზღაურებას, ბუნებრივია, საგაკვეთილო პროცესის პარალელურ რეჟიმში ჩატარების დროს, პედაგოგს დამატებითი ანაზღაურება არ მიეცემა. თუკი, მათ დამატებით მოუწევთ ონლაინ გაკვეთილების ჩატარება, მზად ვართ, მათთვის გავცეთ ანაზღაურება.
მურად ჯიშკარიანი
ქუთაისის №2 საჯარო სკოლის დირექტორი:
2 ოქტომბრის მონაცემებით, სკოლაში, თავდაპირველად, 5 განაცხადი შემოვიდა, აქედან ერთი უკან გაიწვია მშობელმა და, ამ ეტაპზე, დაწყებით კლასებში, დისტანციური სწავლების მსურველი 4 მოსწავლე გვყავს. ორი მეოთხეკლასელი, პარალელურ რეჟიმში, ერთვება საგაკვეთილო პროცესში, დანარჩენ ორს კი — გაკვეთილები დილის საათებში ინდივიდუალურად უტარდებათ.
მზია კიწმარიშვილი
რუსთავის №23 საჯარო სკოლა:
28 სექტემბრის მონაცემებით, დისტანციურ სწავლებაში ჩართვასთან დაკავშირებით, სკოლაში არავის მოუმართავს. თუმცა, ამ ეტაპზე, ვმსჯელობთ და განვიხილავთ სხვადასხვა ალტერნატიულ გზებს, როგორ განხორციელდეს დისტანციური სწავლის მსურველთა ჩართვა საგაკვეთილო პროცესში. იმ შემთხვევაში, თუ მშობელი ონლაინ სწავლების მოთხოვნით მოგვმართავს განცხადებით, სკოლა, კლასების მიხედვით, დააჯგუფებს ონლაინ სწავლების მსურველ მოსწავლეებს, შეადგენს ონლაინ გაკვეთილების ცხრილს და საგნის მასწავლებლები, მათი საგაკვეთილო განრიგის გათვალისწინებით, ჩაატარებენ აღნიშნულ გაკვეთილებს, ვინაიდან სკოლის უპირატესი მოვალეობა მოსწავლეთა ინტერესების გათვალისწინებაა. ქრონიკული დაავადების მქონე მოსწავლეების მშობლებს, ვთხოვთ, მოარიდონ შვილები საკლასო სივრცეს, მათ დისტანციურად მოვემსახურებით.
მამუკა ხამხაძე
რუსთავის №4 საჯარო სკოლის დირექტორი:
ჯერ კიდევ ბევრი რამ გვაქვს დასაზუსტებელი, მასწავლებლებთან ერთად ვმსჯელობთ და განვიხილავთ ამ საკითხს. საგაკვეთილო პროცესის დროს დისტანციურად მყოფ მოსწავლეს, ტექნიკურად, რა თქმა უნდა, ჩართვის შესაძლებლობა ექნება, მაგრამ რამდენად გამართლებული იქნება პარალელური სწავლების ასეთი მეთოდი, ეს ცალკე საკითხი და ცალკე მსჯელობის თემაა. მოგეხსენებათ, გაკვეთილის ვირტუალურად და საკლასო ოთახში ჩატარება სხვადასხვა პროცესია და არ მგონია, ასეთი მეთოდი გამართლებული იყოს. ამ ეტაპზე, რამდენიმე განაცხადია შემოსული. თუმცა, დეტალებს ჯერ ისევ განვიხილავთ. მონაცემების მოგროვების შემდეგ გვეცოდინება ტექნიკური საკითხები, თუ რა მეთოდით წარიმართება სასწავლო პროცესი ონლაინ სწავლების მსურველთათვის.
ლიანა ფუტკარაძე
თბილისია №133 საჯარო სკოლის დირექტორი:
ვინაიდან ჩვენი სკოლა ჩართულია „ახალი სკოლის მოდელში“, საშუალება გვეძლევა, ყველანაირი გამოწვევისთვის ვიყოთ მზად. 2 ოქტომბრისთვის, სკოლაში, 52 განაცხადი შემოვიდა — ყველა კლასიდან 3-4 მოსწავლის მშობელი ითხოვს შვილის დისტანციურ სწავლებაში ჩართვას, მიზეზად ვირუსის შიში სახელდება. ამ ეტაპზე, საგაკვეთილო პროცესში მოსწავლეები დისტანციურად, პარალელურ რეჟიმში, არიან ჩართული. თუმცა, უახლოეს დღეებში, კლასებად დავაკომპლექტებთ და დისტანციური სწავლება გაკვეთილების შემდეგ წარიმართება.
შორენა ღუდუშაური
თბილისის №61 საჯარო სკოლის დირექტორი:
განაცხადების მიხედვით, მშობლები დისტანციურ სწავლებას, ძირითადად, შიშის გამო ირჩევენ, ზოგი ქალაქიდან არის გასული, გვყავს ბათუმში მყოფი მოსწავლეები, რომლებიც თბილისში ჩამოსვლას ვერ ახერხებენ. ამ ეტაპზე, მასწავლებლები გაკვეთილების შემდეგ უტარებენ მოსწავლეებს გაკვეთილებს. ვმუშაობთ კლასების შექმნაზე, სადაც სხვა მასწავლებელი ჩაატარებს გაკვეთილს. დარეგისტრირებულია 173 განაცხადი, თუმცა აქედან 50 მოსწავლე, სავარაუდოდ, გააუქმებს რეგისტრაციას, ვინაიდან ისინი დღეს სკოლაში მოვიდნენ და საგაკვეთილო პროცესს საკლასო ოთახში ესწრებიან. სიტუაციიდან გამომდინარე, რასაკვირველია, მონაცემები შესაძლებელია ყოველდღიურად შეიცვალოს.
ხათუნა ნებიერიძე
თბილისის №179 საჯარო სკოლის დირექტორი:
დისტანციურად სწავლის მსურველები, მეორე და მეოთხე კლასებიდან, თითო-თითო ბავშვი გვყავს. სამწუხაროდ, აქედან ერთს კორონავირუსი დაუდასტურდა და სათანადო მკურნალობას ამჟამად სახლის პირობებში გადის.
მესამე კლასის 23-ივე მოსწავლის მშობელმა გამოთქვა სურვილი, პანდემიის პირობებში საშიშროების თავიდან არიდების მიზნით, მათმა შვილებმა დისტანციურად გააგრძელონ სწავლა. სავარაუდოდ, მონაცემები შესაძლოა შეიცვალოს.
მანანა კიკაჩეიშვილი
თბილისის №72 საჯარო სკოლის დირექტორი:
28 სექტემბრისთვის კლასის დამრიგებლებისგან უკვე გვქონდა ინფორმაცია თუ რამდენ მოსწავლეს სურდა დისტანციურ პროცესში ჩართვა. მინდა გითხრათ, რომ ამ მოსწავლეების სასწავლო პროცესში ჩართულობა, პარალელურად, ვერ მოხერხდება, რადგან სკოლაში სათანადო ტექნიკით აღჭურვილი მხოლოდ რამდენიმე კლასია.
2 ოქტომბრის მონაცემებით, 15 განაცხადია შემოსული, I-VI კლასების ჩათვლით. აღსანიშნავია, რომ დისტანციურ სწავლებაში ჩართვას, ძირითადად, ქრონიკული დაავადებების მქონე მოსწავლეები და შესაბამისად, მათი მშობლები ითხოვენ. აქედან სამი მშობელი შიშის ფაქტორს ასახელებს. რაც შეეხება სწავლებას, მასწავლებლებს დამატებითი დატვირთვა მივეცით და, გაკვეთილების შემდეგ, ამ მოსწავლეებს ონლაინ გაკვეთილებს ჩაუტარებენ, შესაბამისად, დამატებით ანაზღაურებასაც მიიღებენ. თუმცა, ამ საკითხებთან დაკავშირებით, ჯერ კიდევ ძალიან ბევრი რამ გასარკვევია, შესათანხმებელი და დასალაგებელი.
გიორგი გარსიძე
თბილისის №154 საჯარო სკოლის დირექტორი:
2 ოქტომბრის მონაცემებით, სკოლაში არც ერთი განაცხადი არ შემოსულა. ასე რომ, დღეის მდგომარეობით, I-VI კლასებში მოსწავლეთა სრული დასწრებაა.
ირმა ჩარტია
თბილისის №29 საჯარო სკოლის დირექტორი:
ვინაიდან ჩვენი სკოლა ჩართულია „ახალი სკოლის მოდელში“, დისტანციური სწავლების მსურველებისთვის ყველანაირი პირობის შექმნა შეგვიძლია. თუმცა, იმ მოსწავლეებისთვის, რომლებმაც დისტანციური სწავლება აირჩიეს, ასეთი სულ 33-ია, სპეციალურად შედგა ცხრილი და პედაგოგები განსაზღვრულ დროში უტარებენ გაკვეთილს.
ნინო ბულია
ზუგდიდის №2 საჯარო სკოლის დირექტორი:
„ჩვენს სკოლაში 1280 მოსწავლეა. დისტანციურ სწავლებაზე განაცხადი 12 მოსწავლის მშობელმა გააკეთა, მიზეზი ვირუსისადმი შიშია. ჩვენთან დისტანციური სწავლება, თიმსის პლატფორმით, წარმატებულად მიმდინარეობს. განვიხილავთ სწავლების რამდენიმე ვარიანტს. დისტანციური სასწავლო პროცესი საგაკვეთილო პროცესის პარალელურ რეჟიმში ვერ წარიმართება, რადგან სკოლა სათანადო ტექნიკით აღჭურვილი არ არის. მოსწავლეებისთვის დისტანციური სწავლება გაკვეთილების შემდეგ წარიმართება. რამდენიმე დღეში საბოლოო გადაწყვეტილება იქნება მიღებული და, რაც მთავარია, არც ერთი მოსწავლე სასწავლო პროცესის მიღმა არ დარჩება.
ნანა ხიდეშელი
თბილისის №77 საჯარო სკოლის დირექტორი:
დისტანციური სწავლების მსურველთა მშობლები ინფორმაციას, თავიდან, მეილის საშუალებით გვაწვდიდნენ. მაგალითად, ერთი მშობელი ითხოვდა, მის შვილს დისტანციურად ესწავლა, რადგან ხელი ჰქონდა მოტეხილი; მეორე მშობელმა, რომელსაც არ აქვს ბავშვის სკოლაში ტარების საშუალება, მოგვმართა თხოვნით, მივცეთ უფლება, მისი შვილი ბებიასთან (რომელიც ვერ გადაადგილდება) ერთად ჩაერთოს საგაკვეთილო პროცესში. 2 ოქტომბრის მონაცემებით, 30 განაცხადი დარეგისტრირდა. ჩვენს სკოლას აქვს იმის საშუალება, როგორც პირისპირ, ისე ონლაინ, პარალელურ რეჟიმში, ჩატარდეს გაკვეთილები. თუ მოსწავლეთა დიდი რაოდენობა მოიყრის თავს, მაშინ პარალელური კლასიდან გამოვყოფთ მასწავლებელს, რომელიც დისტანციურად გაუძღვება სწავლებას, დანარჩენი მასწავლებლები კი — პირისპირ. ვფიქრობ, დისტანციური სწავლების მსურველი სკოლაში ძალიან ცოტა გვეყოლება.
დოდო ცქვიტაია
ზუგდიდის №5 საჯარო სკოლის დირექტორი:
2 ოქტომბრის მონაცემებით, ჩვენს სკოლაში დისტანციური სწავლის მსურველთა 136 განაცხადი დარეგისტრირდა, I-VI კლასებიდან. კლასის დამრიგებლები, მშობლებთან სატელეფონო გასაუბრებისას, ძირითადად, ვირუსისადმი შიშს ასახელებენ. ამ ეტაპზე, ვმუშაობთ ონლაინ გაკვეთილების ცხრილზე და, უახლოეს დღეებში, გვეცოდინება რა პრინციპით ჩავატარებთ გაკვეთილებს.
