მეშვიდე წელია, რაც გუდავაძე-პატარკაციშვილის ფონდი განათლების სფეროში, საქველმოქმედო მიმართულებით, მრავალფეროვან პროექტებს უჭერს მხარს ან საკუთარი ინიციატივით ახორციელებს. ფონდის მიზანი – ხელი შეუწყოს ჩვენი ქვეყნის განათლების სექტორის განვითარებას, საჯარო და კერძო პარტნიორობის ერთ-ერთი საუკეთესო მოდელია.
ფონდის მხარდაჭერილი პროექტებიდან, პირველ რიგში, გვახსენდება საგანმანათლებლო სივრცისთვის ერთ-ერთი მნიშვნელოვანი და, შეიძლება ითქვას, მაღალრეიტინგული პროექტი – „მასწავლებლის ეროვნული ჯილდო“, რომელმაც არაერთი საინტერესო მასწავლებელი აღმოაჩინა ქვეყნის სხვადასხვა კუთხეში, რომლებიც საკუთარი საქმიანობით მაგალითს აძლევენ როგორც ახალბედა პედაგოგებს, ისე დანარჩენ კოლეგებს. რაც მთავარია, ჯილდომ შეძლო მთავარი მისიის შესრულება – პედაგოგის პროფესიის პოპულარიზება და ახალგაზრდების მოზიდვა მასწავლებლის პროფესიაში. მომავალი პედაგოგების წასახალისებლად კი, გუდავაძე-პატარკაციშვილის ფონდმა, 2020 წელს, კიდევ ერთ მნიშვნელოვან ინიციატივას ჩაუყარა საფუძველი – მომავალი პედაგოგების წამახალისებელი სასტიპენდიო პროგრამის განხორციელება დაიწყო შვიდ პარტნიორ სახელმწიფო უნივერსიტეტთან, რითაც მაღალი აკადემიური მოსწრების აბიტურიენტების მოზიდვის მეტი შესაძლებლობა შექმნა.
პედაგოგებისა და მომავალი პედაგოგების მხარდამჭერ მრავალფეროვან და მნიშვნელოვან პროექტებს გუდავაძე-პატარკაციშვილის ფონდმა, გასულ წელს, კიდევ ერთი ინიციატივა დაამატა, რომელიც გულისხმობს სოციალურ-ემოციური უნარების სწავლებას დაწყებითი განათლების სტუდენტებისთვის.
ფონდის მიერ ინიცირებული და მხარდაჭერილი პროექტის ვრცელ ჩამონათვალში მნიშვნელოვან ადგილს იკავებს „დებატები უკეთესი განათლებისათვის“, რომლის ფარგლებშიც, ათეულობით მასწავლებელი და ასეულობით მოსწავლე ეუფლება დებატების კულტურას. პროექტში, მოსწავლეებთან ერთად, მომავალი პედაგოგი სტუდენტებიც ჩაერთვნენ.
ამჯერად, საზოგადოების ყურადღება გვინდა ერთ უმნიშვნელოვანეს პროექტზე შევაჩეროთ, რომელიც სკოლებში სახელმწიფო ენის სწავლების გაძლიერებას ემსახურება. უფრო დეტალურად, თუ რას გულისხმობს პროექტი და რა სიკეთის მოტანა შეუძლია მსგავსი ინიციატივების განხორციელებას როგორც თანამემამულე ეთნიკური უმცირესობებისთვის და ლტოლვილი უცხოელებისთვის, ისე სახელმწიფოსთვის, ამის შესახებ გვესაუბრება გუდავაძე-პატარკაციშვილის ფონდის დირექტორი ზურაბ კერვალიშვილი.
ზურაბ კერვალიშვილი:
„ქართლად ფრიადი ქუეყანაჲ აღირაცხების, რომელსაცა შინა ქართულითა ენითა ჟამი შეიწირვის“ – გიორგი მერჩულეს ეს სიტყვები ზუსტად გადმოსცემს ქართული ენის სწავლების მნიშვნელობას. ჩვენი ქვეყნის უნიკალურობის ერთ-ერთი განმსაზღვრელია ჩვენი სახელმწიფო ენა და ქართული ანბანი, ხოლო, რაც ყველასგან გამოგვარჩევს და რითაც შეგვიძლია ვიამაყოთ, ის არამატერიალური მემკვიდრეობაა, რომელიც ათასწლეულების წინ ჩვენმა წინაპრებმა შექმნეს, შეინარჩუნეს და ჩვენამდე მოიტანეს. ჩვენი ვალია, ქვეყანაში ქართული ენა სრულყოფილად ისწავლებოდეს როგორც ეთნიკური ქართველებისათვის, ისე თანამემამულე ეთნიკური უმცირესობებისთვის და ლტოლვილი უცხოელებისთვის. ამ უკანასკნელთათვის ენის ცოდნა საზოგადოებაში ჰარმონიული ინტეგრაციის საუკეთესო საშუალებაა. ამისათვის მნიშვნელოვანია: შეიქმნას ქართულის სწავლა-სწავლებისთვის საჭირო რესურსები; მომზადდნენ და გადამზადდნენ სპეციალისტები, სკოლის პედაგოგები; გატარდეს ისეთი ღონისძიებები, რომლებიც კიდევ უფრო გაუმარტივებს ლტოლვილ უცხოელებს ახალ გარემოსთან ადაპტაციას და ინტეგრაციას.
სწორედ ამიტომ, გუდავაძე-პატარკაციშვილის ფონდი, სხვა მნიშვნელოვან მიმართულებებთან ერთად, მხარდაჭერას უცხადებს ისეთ ინიციატივებს, რომელთა მიზანია სახელმწიფო ენის სწავლების ხარისხის გაუმჯობესება და ხელმისაწვდომობა. ასეთ პროექტებს შორისაა ფონდის მიერ 2022 წელს დაფინანსებული „მოსწავლეთა უნარებისა და წიგნიერების ხელშემწყობი პროექტი“, რომელიც მიზნად ისახავდა ტრენერების მომზადებას, სპეციალური სასწავლო რესურსების შექმნას და 165 არაქართულენოვანი სკოლისთვის ქართულის, როგორც მეორე ენის მასწავლებლების გადამზადებას. გპფ-ს მიერ დაფინანსებული კიდევ ერთი პროექტის – „ქართული ენის სწავლება ეთნიკური უმცირესობის მოსწავლეებისთვის“ მთავარ მიზანს წარმოადგენდა: უნივერსიტეტისა და სკოლის მჭიდრო ურთიერთობის მოდელის შექმნა; ასევე, სკოლის ბაზაზე სტუდენტის პრაქტიკის გავლის სახელმძღვანელოს შემუშავება; მონიტორინგის ინსტრუმენტებისა და საკვირაო სკოლებისათვის ქართულენოვანი პროგრამის შექმნა.
ფონდის მიდგომაა – ნებისმიერი პროექტი თანამოაზრეებთან, პროფესიონალებთან და განათლების ქომაგებთან ერთად დააფინანსოს. ჩვენთვის ძალზე სასიხარულოა, რომ პროექტი „საქართველოში მცხოვრები ლტოლვილი მოსწავლეებისთვის სახელმწიფო ენის სწავლებაზე ხელმისაწვდომობის მხარდაჭერა“, მასწავლებელთა პროფესიული განვითარების ეროვნული ცენტრის მიერ, საქართველოს განათლებისა და მეცნიერების სამინისტროს მხარდაჭერითა და საერთაშორისო ორგანიზაციების – UNHCR და World Vision – თანადაფინანსებით ხორციელდება, რისთვისაც ღრმა პატივისცემა გვინდა გამოვხატოთ ყველა მხარის მიმართ. ამ ინიციატივის მიზანია, ხელი შეუწყოს საქართველოში თავშესაფრის მაძიებელ და ლტოლვილ მოსწავლეებს, შეისწავლონ ქართული ენა და ეზიარონ ქართულ კულტურას. პროექტის ფარგლებში, პირველად შეიქმნა ფორმალური და არაფორმალური სასწავლო რესურსი – კურიკულუმი და ინტეგრირებული სახელმძღვანელო საფეხურების მიხედვით, რომელიც დაეხმარება მოსწავლეებს, დაჩქარებულად დაძლიონ საგნობრივი საფეხურებრივი ამოცანები და დავალებები. უნიკალური სასწავლო რესურსი თანაბრად სასიკეთოდ წაადგება როგორც პროექტში უკვე ჩართულ არაქართულენოვან ბავშვებსა და მოზარდებს, ასევე მათ, ვინც სამომავლოდ გადაწყვეტს ქართული ენის დაუფლებას, ასევე, ხელმისაწვდომი და სასარგებლო იქნება ქართული დიასპორის მოსწავლეებისთვისაც. ვიმედოვნებთ, აღნიშნული სახელმძღვანელო კარგ საფუძველს შექმნის, ამ მიმართულებით ხარისხიანი განათლების უზრუნველყოფისთვის, სხვა დამატებითი რესურსების მოსამზადებლად.
გუდავაძე-პატარკაციშვილის ფონდი (გპფ) მიესალმება და მოხარული იქნება, მხარი დაუჭიროს საშუალო და გრძელვადიან პერსპექტივაზე გათვლილ ყველა თანამიმდევრულ და მდგრად პროექტს, რომელიც ხელს შეუწყობს ქართულის, როგორც სახელმწიფო ენის სწავლების ხარისხის ამაღლებას. ვიმედოვნებთ, რომ სხვა ადგილობრივი და საერთაშორისო დონორებიც გახდებიან პროექტის არა მხოლოდ მხარდამჭერები, არამედ მსგავსი წამოწყებების დაფინანსების ინიციატორებიც.
◊◊◊
შეგახსენებთ, რომ გუდავაძე-პატარკაციშვილის საქველმოქმედო ფონდი, 2017 წელს, ქალბატონი ინნა გუდავაძის ინიციატივით დაარსდა და მისი მიზანია განათლების სისტემის განვითარების ხელშეწყობა და ისეთი პროექტების მხარდაჭერა, რომლებიც მიმართული იქნება ქვეყანაში განათლების ხარისხის გაუმჯობესებასა და ხელმისაწვდომობის ზრდაზე, რათა სკოლაში განათლებული, წარმატებული, თავისუფალი და პატრიოტი მოქალაქე აღიზარდოს. გპფ-ის ძირითადი მიმართულებებია სასკოლო და პროფესიული განათლება; უმაღლესი განათლების მიმართულება შემოიფარგლება მხოლოდ ფონდის ინვესტიციით რეგიონულ უნივერსიტეტებში, მომავალი პედაგოგების წახალისებისა და სასწავლო პროგრამებისა თუ პროცესების ხარისხის გაუმჯობესების მხარდაჭერის მიზნით. დღეისათვის გპფ-ს, ჯამში, 5 მილიონი ლარის 45-ზე მეტი საგანმანათლებლო გრანტი აქვს დაფინანსებული.
