მარნეულის მუნიციპალიტეტის მარადისის საჯარო სკოლის გარემოსდაცვითი კლუბის ინიციატივით, სოფელ მარადისში ჩატარდა საქველმოქმედო ფესტივალი. მოწვეული იყვნენ სკოლები და ის სამთავრობო თუ არასამთავრობო ორგანიზაციები, რომლებიც კლუბის პარტნიორები არიან.
ლამარა ბოლქვაძე, მარადისის საჯარო სკოლის ქართული ენისა და ლიტერატურის მასწავლებელი: „ხუთი წელია, რაც მარადისის საჯარო სკოლის ეკოკლუბს ვხელმძღვანელობ და მოსწავლეებთან ერთად ვახორციელებ გარემოს მდგრადი განვითარების 17 მიზნის შესაბამის აქტივობებს. საქველმოქმედო ფესტივალის ჩატარების იდეა სამი წლის წინ გაგვიჩნდა. წელიწადში ორჯერ (გაზაფხული, შემოდგომა), მე და ჩემი მოსწავლეები, ვმართავთ ფესტივალს, რომელშიც უამრავი ადამიანი მონაწილეობს. ფესტივალი უკვე მეხუთედ გაიმართა და გარდა საქველმოქმედო მიზნისა, მისი დანიშნულება ისიცაა, რომ მოსწავლეები არაფორმალურ გარემოში თანადგომას, თანამშრომლობას, მდგრადი განვითარების მიზნებისა და იდეების მოფიქრება-განხორციელებას სწავლობენ.“
ყვავილები, ჩანთები, ხელნაკეთი ნივთები, მეორეული ნივთებისაგან დამზადებული ახალი ნივთები, ჩურჩხელები, ტყლაპი, ჩირი – ყველაფერი საკუთარი ხელით დაამზადეს მოსწავლეებმა. ფესტივალზე გამოიფინა, აგრეთვე, სკოლის მოსწავლეების მიერ სათბურში მოყვანილი ბოსტნეულიც.
ფესტივალში მთელი სოფელი მონაწილეობდა (ფესტივალის დაწყებამდე მოეწყო დასუფთავების აქციაც). ეკოკლუბელთა მშობლებმა ხაჭაპურები, ლობიანები, ფახლავა და სხვა ტკბილეული გამოიტანეს გასაყიდად, ხოლო ადგილობრივმა მეწარმე ქალებმა — ხილი და ბოსტნეული.
მოსწავლეებმა სერტიფიკატები გადასცეს დეკორატიული მცენარეების ასოციაციას, ფერმერთა ასოციაციას, მომავლის ფერმერს, რუსთავის ინოვაციების ჰაბს, ფონდ „ტასოს“, ევროპის ფონდს, მარნეულის ტელევიზიას, ორგანიზაცია „CENN“-ს, ორგანიზაციას „ტურიზმი და რეალობა“, მეწარმე ქალთა გაერთიანებას, მარნეულის რესურსცენტრს, მარნეულის ქალთა ოთახს, მარნეულის მერიას და მადლობა გადაუხადეს იდეების დაფინანსებისათვის.
ფესტივალზე 1200 ლარი შეგროვდა. 600 ლარი გარემოსდაცვითი კლუბის წევრებმა მარნეულელ ახალგაზრდას გადასცეს, რომელსაც ორივე ხელი ამპუტირებული აქვს და ხანგრძლივ მკურნალობას საჭიროებს, 400 ლარი — მარტოხელა დედას, რომელსაც ხერხემალი აქვს დაზიანებული, 100 ლარი — სოციალურად დაუცველ ოჯახს.
მოსწავლეები საქველმოქმედო აქციას გაზაფხულზეც გეგმავენ.
