ქალაქ წყალტუბოს №2 საჯარო სკოლა, რომელიც მისი კურსდამთავრებულის, 2008 წლის აგვისტოს ომის გმირის – მამუკა სამაკაშვილის სახელს ატარებს, წყალტუბოს მუნიციპალიტეტში ყველაზე დიდი საგანმანათლებლო დაწესებულებაა (დირექტორი – ნარგიზ ფირცხალავა, დირექტორის მოადგილე – გიორგი ბენიძე). სკოლაში არაერთი საინტერესო და მნიშვნელოვანი ღონისძიება ტარდება. აქ ტრადიციად იქცა სახელოვან ადამიანებთან შეხვედრა, დისპუტებისა და პრეზენტაციების მოწყობა.
სკოლის ხელმძღვანელობა და პედაგოგები დროსა და ენერგიას არ იშურებენ, რათა აღსაზრდელებმა, ბეჯით სწავლასთან ერთად, შემოქმედებითად გამოიყენონ დრო. ამის დასტურად სკოლის დერეფნებში, საკლასო ოთახებსა თუ ცალკეული საგნების კაბინეტ-ლაბორატორიებში გამოფენილი უამრავი ნაშრომი გამოდგება.
სკოლაში აქტიურად მუშაობს USAID-ის სამოქალაქო განათლების პროგრამის ფარგლებში განხორციელებული პროექტი – „სუფთა გარემო“, რომლის ავტორია ახალგაზრდა პედაგოგი, ინგლისური ენის სპეციალისტი ეთერ გერაძე. განმახორციელებელ გუნდში, აღმზრდელებთან ერთად, ჩართული არიან სკოლის დაწყებითი, საბაზო და საშუალო საფეხურების მოსწავლეები. სამოქალაქო განათლების კლუბის ხელმძღვანელია ისტორიის პედაგოგი მზია მაისურაძე, ხოლო კონკრეტული პროექტის განხორციელებას ხელმძღვანელობს გეოგრაფიის მასწავლებელი მარინა გოლეთიანი. საინტერესოა ის ფაქტიც, რომ სამოქალაქო განათლების სწავლება ცალკე, განყენებულად არ მიმდინარეობს, არამედ ხდება მისი ინტეგრირება სხვა საგნებთან.
აპრილის ერთ მშვენიერ დღეს, სკოლის მიმზიდველად გაფორმებულ ფოიეში, თავი მოიყარეს კლუბის „ფენიქსი“ წევრებმა. შეკრება გახსნა პროექტის ხელმძღვანელმა, თავისი საგნის პროფესიონალმა, მარინა გოლეთიანმა, რომელიც ათეულობით წლებია გეოგრაფიის სიყვარულს უნერგავს მომავალ თაობას. გარდა საგაკვეთილო პროცესისა, იგი სხვა არაერთი საინტერესო შეხვედრის ორგანიზატორია.
ამ დღეს, მართლაც უჩვეულო ღონისძიებაზე, რომელსაც ლაიტმოტივად გასდევს: „ჩვენ შეგვიძლია დავიცვათ დედამიწა, ხმელეთი, ჰაერი, წყალი“, კიდევ ერთხელ გამოჩნდა, რომ ნარჩენებისგან შეიძლება დამზადდეს საჭირო ნივთები, რომელთა ნიმუშები წარმოდგენილი იყო ღონისძიებაზე.
აღსანიშნავია ისიც, რომ მოზარდები ზრუნავენ არა მარტო საკუთარი სკოლის ეზო-გარემოს კეთილმოწყობაზე, არამედ სისტემატურად მონაწილეობენ ქალაქ-კურორტის ბალნეოლოგიური პარკისა და მის ირგვლივ ჩამავალი არხის ნარჩენებისგან გაწმენდა-გასუფთავების საქემში.
ღონისძიებას სტუმრობდნენ მეგობრები და მშობლები, ხელოვნების დამფასებლები, საპატიო სტუმრები – ინტელექტუალური კლუბის გენერალური მდივანი, USAID-ის სამოქლაქო განათლების პროგრამის კოორდინატორი იმერეთის რეგიონში – ლანა თოთაძე და სამოქალაქო განათლების პროგრამის რეგიონული მენეჯერი – ნუგზარ კოხრეიძე. მოსწავლეებმა საკუთარი ნახატების, ნარჩენების გამოყენებით დამზადებული სხვადასხვა ფორმის ლარნაკების, საყვავილე ქოთნების, ყულაბების, ჭაღების პრეზენტაცია მოაწყვეს.
აღსანიშნავია იმ მოსწავლეთა შრომა და მონდომება, რომლებიც სკოლის დებატების კლუბისა და თვითმმართველობის საბჭოს წევრები არიან, აგრეთვე პედაგოგების: მედეა მოდებაძის (სახელმწიფო ენის კათედრა), ზუსტი და საბუნებისმეტყველო კათედრის წევრების: ნინელი კუხალაშვილის, თინათინ ჩიხლაძის, ნინო ჭურაძის, ნათელა კოღუაშვილის, ნინო კინწურაშვილის დიდი შრომა და ღვაწლი. ასე რომ, სკოლა, მოსწავლეები და მასწავლებლები ჩართულები არიან სამოქალაქო განათლების სწავლებისა და ცხოვრებაში განხორციელების პროცესში.
ღონისძიების დასასრულ, ქალბატონმა ლანამ და ბატონმა ნუგზარმა გამორჩეული მოსწავლეები დიპლომებითა და საპატიო სიგელებით დააჯილდოვეს; საქებარი სიტყვები არ დაიშურეს პედაგოგების, განსაკუთრებით კი ბუნების ნორჩი მოყვარულების მიმართ, რომლებიც ესოდენ საინტერესო და მეტად საჭირო საქმეს აკეთებენ.
სკოლის დირექტორის მოადგილემ, გიორგი ბენიძემ მადლობა გადაუხადა როგორც სტუმრებს, ასევე სკოლის მოსწავლეებს, პედაგოგებს და იმედი გამოთქვა, რომ საგნობრივ სწავლებასთან ერთად, კვლავ დიდი ყურადღება მიექცევა სამოქალაქო განათლებას.
ომარ ჭუმბურიძე
ვეტერანი მასწავლებელი
