ქართული ენა ჩვენი წინაპრების მემკვიდრეობაა, რომელიც თაობიდან თაობას გადაეცემა. ბუნებრივია, უძვირფასესი საგანძურის გაფრთხილება ჩვენი მოვალეობაა, განსაკუთრებით დღევანდელ ყოფაში, რადგან უცხო ენიდან შემოჭრილმა სიტყვებმა ან გადატანითი მნიშვნელობით ნათქვამმა იდიომებმა შეიძლება დაარღვიოს ენის სტრუქტურული მთლიანობა ან შეცვალოს მისი შინაარსობრივი მხარე. სწორედ ენობრივი კულტურის ამაღლებას ემსახურება მიმდინარე ეროვნულ-საგანმანათლებლო პროექტი “ძალიან გავრცელებული, მაგრამ არასწორი” (პროექტის ორგანიზატორები: ზაზა შულაია – ხობის მუნიციპალიტეტის სოფელ საგვიჩიოს საჯარო სკოლის ქართული ენისა და ლიტერატურის მასწავლებელი; ნანა ლომაია – ხობის მუნიციპალიტეტის სოფელ ხამისქურის საჯარო სკოლის ქართული ენისა და ლიტერატურის მასწავლებელი).
პროექტის ფარგლებში, მორიგ შეხვედრაზე, მოსწავლეებთან ისაუბრა რუსთავის საჯარო სკოლის ქართული ენისა და ლიტერატურის მასწავლებელმა, ნანა კუჭუხიძემ. მოსწავლეთა ჩართულობით, მან დამაჯერებლად ახსნა, თუ როგორ აზიანებს ჟარგონების ხშირი გამოყენება ქართული ენის სიწმინდეს. ამ მხრივ, რამდენიმე სოციალური ჯგუფი თუ გარემო გამოყო. ეს კლასიფიკაცია კი შესაბამისი დასათაურებით წარმოგვიდგინა და აღნიშნა, რომ სხვადასხვა სფერო, ყოველღიურ მეტყველებაში, საკუთარ ჟარგონს იყენებს, მაგალითად: ახალგაზრდული ჟარგონი, მედიცინა, იურიდიული სფერო, კრიმინალური ჟარგონი, ინტერნეტ და სოციალური ქსელები, სპორტული, მუსიკალური და ხელოვნების სფეროები.
ქალბატონმა ნანამ აუხსნა მოსწავლეებს, რომ ენა ცოცხალი, დინამიური ორგანიზმია და ჟარგონების გამოყენება გარდაუვალია, თუმცა ბალანსი მნიშვნელოვანია, რადგან მისმა გადაჭარბებულმა გამოყენებამ შეიძლება გაუგებრობა და ენის დანაგვიანება გამოიწვიოს.
ქართული ენა ერთ-ერთი უძველესი და უმდიდრესი ენათაგანია, რომელსაც უნიკალური სისტემა, ლექსიკა და გრამატიკული სტრუქტურა აქვს. მისი განსაკუთრებულობა ნათლად ჩანს არა მხოლოდ მდიდარ ლიტერატურულ მემკვიდრეობაში, არამედ ყოველდღიურ მეტყველებაშიც. განსაკუთრებით აღსანიშნავია ქართული ფრაზეოლოგიზმები, რომლებიც ენის ხატოვნებასა და მრავალფეროვნებას განაპირობებს.
ქართული ფრაზეოლოგიზმების შესახებ პრეზენტაცია გამართა სსიპ ხობის მუნიციპალიტეტის სოფელ ნოჯიხევის №1 საჯარო სკოლის ქართული ენისა და ლიტერატურის მასწავლებელმა, ინგა ხვიჩიამ. მან განსაკუთრებული ყურადღება გაამახვილა ქართული ენის სილამაზესა და მდიდარ ლექსიკურ შესაძლებლობებზე.
პრეზენტაციის დასაწყისში მასწავლებელმა, ნიკო მარის ციტატით, შეახსენა მოსწავლეებს, რომ ქართული ენა განსაკუთრებული სიმდიდრით გამოირჩევა და შეუძლია ნებისმიერი აზრის ზუსტად და ხატოვნად გადმოცემა.
შემდეგ პრეზენტატორმა აუდიტორიას გააცნო ქართული ფრაზეოლოგიზმების მნიშვნელობა და მათი სწორად გამოყენების აუცილებლობა. სხვადასხვა მაგალითების საშუალებით დაგვანახვა, როგორ შეიძლება ფრაზეოლოგიზმები ხატოვან ხასიათს ანიჭებდეს მეტყველებას და როგორ ხდება მათი არასწორი გამოყენება, ზოგიერთ შემთხვევაში. განსაკუთრებით საინტერესო იყო პრაქტიკული ნაწილი, სადაც მოსწავლეებმა ფრაზეოლოგიზმების ამოცნობა და განმარტება სცადეს.
პრეზენტაციის ბოლოს, მასწავლებელმა აღნიშნა, რომ ქართული ენის დაცვა თითოეული ჩვენგანის პასუხისმგებლობაა და მოუწოდა მოსწავლეებს, მეტი ყურადღება მიაქციონ მშობლიური ენის სიწმინდესა და სიზუსტეს.
საჭიროა სწორი ენობრივი ფორმების დამკვიდრების ხელშეწყობა და ენის სიწმინდის დასაცავად შესაბამისი ზომების მიღება. თანამედროვე ტექნოლოგიების ეპოქაში ეს განსაკუთრებით აქტუალურია, რადგან სოციალური მედია და ინტერნეტი გავლენას ახდენს მეტყველების სტილზე.
