ვლადიმერ გორგიშელი
სსიპ თელავის მუნიციპალიტეტის სოფელ კურდღელაურის საჯარო სკოლის გეოგრაფიის მასწავლებელი
მომავალი თაობის თანამედროვე ცხოვრებისთვის მოსამზადებლად, სასკოლო განათლებას უდიდესი მნიშვნელობა ენიჭება. პროექტზე დაფუძნებული სწავლების მეთოდი გულისხმობს კეთებით სწავლას, რაც ეხმარება მოსწავლეებს აქტიურად იყვნენ სწავლის პროცესში ჩართულნი. მოკლედ, შეგვიძლია ვთქვათ, „პროექტზე დაფუძნებული სწავლება აერთიანებს ცოდნას და კეთებას“, მოსწავლე იყენებს ცოდნას, რაც უკვე იცის და პროექტში მონაწილეებისგან სწავლობს ახალს, ცდილობს იპოვოს პრობლემის გადაჭრის გზები.
გეოგრაფიის შესწავლა მოსწავლეებს სწორედ პროექტების მეშვეობით უადვილდებათ, თან როდესაც საქმე ეხება თემის საჭიროებებს. მათთვის სახალისოა პროექტით გაწერილი აქტივობების განხორციელება. ჩემი აზრით ეს ის მთავარი ღირებულებაა, რაც საგანს საინტერესოს და მიმზიდველს ხდის, ასევე აადვილებს მის შესწავლას.
გიზიარებთ ჩემს გამოცდილებას პროექტული სწავლების უპირატესობაზე. პირველ რიგში, მოსწავლეებთან ერთად უნდა გადავწყვიტოთ რა თემაზე იქნება პროექტი, რას ემსახურება, როგორ გადავჭრათ პრობლემები და ა.შ. პროექტებზე დაფუძნებული სასწავლო გეგმა მოიცავს მნიშვნელოვან კითხვებს, რომლებიც საგნობრივ სტანდარტებსა და მაღალ სააზროვნო დონეს ცხოვრებისეულ მიზნებთან აკავშირებს. მოსწავლეებს უწევთ რეალური, ცხოვრებისეული როლების თამაში და მნიშვნელოვანი დავალებების შესრულება.
ჩემი პროექტი – „გვალვა, სკოლისა და სოფლის გამოწვევები“. კახეთის რეგიონისთვის პრობლემური თემაა, ამიტომ სკოლის მოსწავლეების ჩართულობა მნიშვნელოვანია, ინფორმაციის გაზიარებასა და საკითხის გადაჭრაში. ჩამოვაყალიბეთ თემის აქტუალურობა: ბუნების ექსტრემალურ მოვლენათა შორის მნიშვნელოვანი ადგილი გვალვას უკავია. გვალვა, თანამედროვე პირობებში, ზარალს აყენებს არა მხოლოდ სოფლის მეურნეობას, ართულებს და აჩერებს სამდინარო გადაზიდვებს, ამცირებს ელექტროენერგიის გამომუშავებას, აფერხებს საწარმოებს, რომლებიც წყლის დიდ რაოდენობას საჭიროებენ და ა.შ. გარდა ამისა, ხშირი გვალვები გაუდაბნოების მნიშვნელოვანი ხელშემწყობი ფაქტორია.
აღმოსავლეთ საქართველოს ბარისთვის გვალვა ხშირი მოვლენაა. ამ მხრივ, არც თელავის რაიონია გამონაკლისი, სადაც გვალვა ართულებს მოსახლეობის წყალმომარაგებას, მნიშვნელოვნად ზრდის ხანძარსაშიშროების დონეს და ზარალს აყენებს სოფლის მეურნეობას, ხოლო ძლიერი გვალვის პირობებში მინდვრის კულტურების მნიშვნელოვანი ნაწილი მთლიანად ნადგურდება.
ამის შემდეგ განვსაზღვრეთ აქტივობები:
პროექტის განხორციელების შემდეგ წარმოვაჩინეთ მისაღწევი შედეგები:
შეფასების ეტაპები – შეფასება მოხდა პროექტის სამივე ეტაპზე:
პირველ ეტაპზე შევაფასეთ მოსწავლეთა წინარე ცოდნა და ინტერესები; მეორე ეტაპზე შევაფასეთ ინფორმაციის მოძიების, დახარისხების, თანამშრომლობის, ინტერვიუს აღების, რაოდენობრივი კვლევის წარმოების უნარები; მესამეზე – მათი შემოქმედებითი და საპრეზენტაციო უნარები.
შეფასების ფორმა – განმავითარებელი კომენტარები.
ვფიქრობ, სწავლების ეს მეთოდი არის საინტერესო, შედეგზე ორიენტირებული, მოსწავლეთა ინტერესებზე გათვლილი. წლის განმავლობაში მასწავლებლის მიერ, მოსწავლეებთან ერთად, განხორციელებული თუნდაც ერთი პროექტი გაცილებით საინტერესოა სწავლა-სწავლებისთვის, ვიდრე ყოველდღიური რუტინული საგაკვეთილო პროცესები.
