7 ოქტომბერს ლაგოდეხის მუზეუმის საგამოფენო დარბაზში სოფელ ჰერეთისკარის საჯარო სკოლის სახვითი და გამოყენებითი ხელოვნების, დაწყებითი კლასების მასწავლებლის და სკოლის დირექტორის მარინა ნანდოშვილი-წიქარიშვილის ნამუშევრების პერსონალური გამოფენა გაიხსნა. ექსპოზიციაზე წარმოდგენილია მისი ბავშვობის დროინდელი და შემდგომი პერიოდის გრაფიკული და ფერწერული ნამუშევრები, ხელნაკეთი სანათი ნივთები, ნაქარგები, ფოტოსურათები და აქსესუარები. სალონურმა საღამომ დიდი დაინტერესება გამოიწვია.
„ხატვა, ქსოვა, ქარგვა, ზოგადად ხელსაქმე და ფიზიკური შრომა, ბავშვობის ასაკიდან დავიწყე, – ამბობს ქალბატონი მარინა, – მამა კოლმეურნეობის წევრი იყო და ბუნებრივია, ოჯახის წევრები ჩართულები ვიყავით საოჯახო მეურნეობაში. ბებიამ ქსოვა მასწავლა, დედა ჭრა-კერვის სპეციალისტია, მამა ხელმარჯვე პიროვნება იყო. აღმოჩნდა, რომ ოჯახის წევრების დამსახურებით მეც სხვადასხვა მიმართულებით ჩამომიყალიბდა შემოქმედებითი უნარები.“
ხატვის წრეზე მეხუთე კლასიდან დადიოდა. მისი მასწავლებელი, მაყვალა ქოროღლიშვილი აქტიურად იყო ჩართული კონკურსებში, მოსწავლეების ნამუშევრებს აგზავნიდა გამოფენებზე რაიონული და რესპუბლიკური მასშტაბით. მისი დამსახურებით, უკვე მეხუთეკლასელის ნამუშევრები დაიბეჭდა გაზეთ „ნორჩი ლენინელის“, „სოფლის ცხოვრების“, ჟურნალ „პიონერის“, საკავშირო ჟურნალ „ტურისტის“ ფურცლებზე. მისი ნამუშევრების გამოფენა სკოლის პერიოდშივე იმართებოდა.
„დავამთავრე არქიტექტურული ფაკულტეტი, ასევე – დაწყებითი კლასების პედაგოგიკის და მეთოდიკის ფაკულტეტი. დავბრუნდი ჩემს საყვარელ ლაგოდეხში, მოსწავლე ახალგაზრდობის რაიონულ სახლში ვიყავი არქიტექტურის წრის ხელმძღვანელი, პარალელურად – მესამე საჯარო სკოლის, სკოლა-ლიცეუმის სახვითი და გამოყენებითი ხელოვნების მასწავლებელი. ლექციებს ვკითხულობდი ლაგოდეხის სასწავლო-სამეცნიერო ინსტიტუტში, სახვითი ხელოვნების განხრით,“ – იხსენებს ქალბატონი მარინა.
2005-2010 სასწავლო წლებში მარინა ნანდოშვილი ობოლ და მზრუნველობამოკლებულ ბავშვთა სააღმზრდელო დაწესებულების დირექტორი იყო. 2011 წლიდან დღემდე, ლაგოდეხის მუნიციპალიტეტის სოფელ ჰერეთისკარის საჯარო სკოლის დირექტორია. „ვასწავლი სახვით და გამოყენებით ხელოვნებას. მოსწავლეებთან ურთიერთობა ჩემთვის უმნიშვნელოვანეს საქმედ იქცა. ვცდილობ, მათი შემოქმედებითი უნარების ჩამოყალიბებასა და მხატვრული ხედვის განვითარებაზე ვიზრუნო, რაც პიროვნული ზრდისათვის აუცილებელია“ – ამბობს ქალბატონი მარინა.
თავისუფალ დროს უთმობს ხატვას, ქსოვას, ქარგვას, ხის და სხვადასხვა მეორადი ნივთებით ნამუშევრების შექმნას, ამზადებს ჰერბარიუმებს, დაინტერესებულია ფოტოხელოვნებით, კერავს ტანსაცმელს და სხვადასხვა აქსესუარებს.
დაბადების 60 წლის იუბილეს პერსონალური გამოფენით შეხვდა: „გამოფენამ დიდი ინტერესი გამოიწვია საზოგადოებაში. სალონურ საღამოზე მოწვეული სტუმრებიდან განსაკუთრებით ემოციური იყო ჩემი პირველი ხატვის მაყვალა მასწავლებელთან შეხვედრა. გამოფენაზე მოწვეულ სტუმრებს შორის იყვნენ განათლების სფეროს წარმომადგენლები, მასწავლებლები, კოლეგები, ადგილობრივი ხელისუფლების წარმომადგენლები და სხვა დაინტერესებული პირები.“
სტუმრებმა სამახსოვრო ჩანაწერები დატოვეს შთაბეჭდილებების წიგნში.
ხათუნა შუბითიძე, მასწავლებელი: „პირველი, რაც მახსენდება, ჩემი ბავშვობის მოგონებებია. ჯერ კიდევ მრავალი წლის წინ, როდესაც სკოლის მოსწავლე ვიყავი, მარინა ნანდოშვილი მასწავლიდა ხატვა-ხაზვას. საოცრად დახვეწილი, ელეგანტური ჩაცმულობით გამოირჩეოდა. ძნელი იყო არ მიგექცია ყურადღება მისი გარეგნობისთვის, მაკიაჟისთვის. ხელოვნების ნიჭი ყველაფერში გამოსჭვიოდა: საკუთარი ხელით შეკერილი კაბები, მოქსოვილი ლაბადები… ყველაფერი ეს მართლაც ხელოვნების ნიმუშებს ჰგავდა. დღეს კოლეგები ვართ. ახლაც, როგორც დიდი ხნის წინ, ისეთივე სიყვარულით ეპყრობა თითოეულ ნამუშევარს, იქნება ეს ნახატი, ნაქარგი, ნაქსოვი თუ ხელოვნების სხვა ნიმუში. მის მიერ შექმნილ კომპოზიციებში თითქოს ყველაფერი ცოცხალია და ავტორის ხასიათს, ემოციებს გამოხატავს. მჯერა, თუ ხელოვნების მოტრფიალე არ ხარ, ასეთ ნამუშევრებს ვერ შექმნი. ამის დასტურია მისი პერსონალური გამოფენაც, რომელმაც თითოეული მნახველის აღფრთოვანება გამოიწვია.“
მანანა კუპრაშვილი, მასწავლებელი: „ქალბატონმა მარინამ, რომელიც შემოქმედებითი ნიჭით გამოირჩევა და შთამბეჭდავ ნამუშევრებს ქმნის, შვიდ ოქტომბერს გამართა პერსონალური გამოფენა, სადაც წარმოდგენილი იყო არაჩვეულებრივი ნახატები, ნაქარგები და ხის სანათები, ფოტოსურათები, რომელშიც ნათლად იგრძნობოდა ავტორის შრომა, სულიერი მდგომარეობა და შემოქმედებითი მიდგომა. მთელი ღონისძიება სილამაზით და სითბოთი იყო გაჟღენთილი, ვიოლინოს და ფორტეპიანოს მშვიდი ფონი განსაკუთრებულად ამაღლებულ განწყობას ქმნიდა, თითქოს თითოეულ ნახატს თავისი მელოდია ჰქონდა, მაყურებელს ფაქიზი ემოციებით ავსებდა. ეს საღამო ნამდვილად განსაკუთრებული იყო. იგი არა მარტო ხელოვნების სიყვარულს გვაჩვენებდა, არამედ გვასწავლიდა როგორ უნდა დავაფასოთ შრომა, ნიჭი და გულით გაკეთებული საქმე.“
გამოფენა ლაგოდეხის მუზეუმში ერთი თვის განმავლობაში გაგრძელდება და დაინტერესებულ დამთვალიერებლებს მარინა ნანდოშვილი თავად უმასპინძლებს, მუზეუმის ადმინისტრაციასთან ერთად.
