თამარ ქადაგიშვილი
გურჯაანის №4 საჯარო სკოლის ინგლისური ენის მასწავლებელი
15 წელია, გურამ ჭილაშვილის სახელობის №4 საჯარო სკოლაში ვასწავლი ინგლისურ ენას, ვარ წამყვანი პედაგოგი და მე-9 კლასის დამრიგებელი, სადაც 29 მოსწავლე სწავლობს.
როგორც დამრიგებელს, გადამწყვეტი როლი მაკისრია მოსწავლის საგანმანათლებლო და აღმზრდელობით საკითხებში. კლასის დამრიგებლის ფუნქციები მოიცავს როგორც საგანმანათლებლო, ისე ორგანიზაციულ და საკომუნიკაციო პასუხისმგებლობებს. დამრიგებლის უმთავრესი მოვალეობაა თითოეულ მოსწავლეზე ზრუნვა. ჩვენ ყველაზე კარგად ვიცნობთ მოსწავლის შინაგან სამყაროს, მისწრაფებებსა და შესაძლებლობებს, მაქსიმალურად ვცდილობ, დავეხმარო მას საკუთარი შესაძლებლობების უკეთ წარმოჩენაში.
✅ დამრიგებლის უფლება-მოვალეობები და საჭიროებები
მოგეხსენებათ, რამდენად შრომატევადია, რაოდენ დიდი პასუხისმგებლობაა იყო კლასის დამრიგებელი. ფასდაუდებელია დამრიგებლის შრომა, მას მრავალი ფუნქცია აქვს შეთავსებული: კლასის მართვა და ორგანიზება, სასწავლო პროცესის მონიტორინგი და შეფასება; კლასის ყოველდღიური საქმეების მართვა, შეხვედრებისა და აქტივობების დაგეგმვა; სასწავლო პროცესის ხარისხიანად წარმართვა და დისციპლინის დაცვა; მოსწავლეებთან ინდივიდუალური მუშაობა, მათი საჭიროებების იდენტიფიცირება და დახმარება, აკადემიური და პიროვნული განვითარების ხელშეწყობა; სასწავლო პროცესში მხარდაჭერა და მოტივაციის გაზრდა. ყოველივე ზემოაღნიშნულიდან გამომდინარე, კარგი იქნებოდა თუ დამრიგებლის ანაზღაურება შესაბამისი იქნებოდა გაწეულ შრომასა და პასუხისმგებლობასთან. მართალია, დამრიგებელი მოწოდებით უნდა იყოს მასწავლებელი და არა ფინანსური დაინტერესებისთვის, მაგრამ, მოტივაციისა და წახალისებისთვის, ვფიქრობ, სათანადო ანაზღაურება საჭიროა.
✅ მშობელთა კრება
სასიცოცხლოდ მნიშვნელოვანია კომუნიკაცია მშობლებთან, რეგულარული შეხვედრები და ინფორმაციის გაცვლა, ბავშვის წარმატებების, პრობლემებისა და პროგრესის შესახებ მათი ინფორმირება, ასევე, სასკოლო ღონისძიებების კოორდინაცია ერთობლივად; მშობლების ჩართულობა როგორც სკოლის კულტურულ, სპორტულ და საგანმანათლებლო ღონისძიებებში, ასევე ექსკურსიებისა და კლასგარეშე აქტივობების ორგანიზებასა და განხორციელებაში აქტიური მონაწილეობა, დამრიგებელთან და მოსწავლეებთან ერთად.
✅ კონფლიქტების მართვა
ჩემთვის დიდი გამოწვევაა მოსწავლეთათვის ემოციური და ფსიქოლოგიური მხარდაჭერის გაწევა. ხშირად საჭირო ხდება კონფლიქტების მართვა, რათა უზრუნველვყოთ მშვიდი სასწავლო გარემო.
მოგეხსენებათ, გარდატეხის ასაკი გარკვეულ სირთულეებთანაა დაკავშირებული, ხშირად თავს იჩენს მავნე ჩვევებისკენ მიდრეკილება. მშობლები ცდილობენ რადიკალურად მკაცრი ზომების გატარებას და ბავშვებს პროტესტისა და უსამართლობის განცდა უჩნდებათ. არის მცდელობა, აღარ შემოვიდნენ გაკვეთილზე, რითაც აპროტესტებენ მშობლის მკაცრ რეაქციას. სწორედ ასეთ დროს მნიშვნელოვანია დამრიგებლის აქტიური ჩართულობა და გარკვეული ფსიქოლოგიური დახმარება.
კლასში მუდმივად ვატარებ ბულინგისა და სწავლის დემოტივაციის პრევენციულ ღონისძიებებს ისეთი აქტივობებით, როგორიცაა როლური თამაშები, დისკუსიები და ფილმების ჩვენება.
✅ ინკლუზიური განათლება
ინკლუზიური განათლების პროცესში დამრიგებელს მნიშვნელოვანი და მრავალმხრივი როლი აკისრია, რადგან ის პასუხისმგებელია ისეთი გარემოს შექმნაზე, სადაც ყველა მოსწავლე შეძლებს სასწავლო პროცესში ჩართვას, საკუთარი შესაძლებლობების და პოტენციალის გამოვლენას.
დამრიგებელმა კლასში ისეთი ატმოსფერო უნდა შექმნას, სადაც ყველა მოსწავლე თავს კომფორტულად და თანასწორად იგრძნობს. საჭიროა მასწავლებელთან და სპეციალისტებთან კოორდინაცია, სწავლების მრავალფეროვანი მეთოდების გამოყენება.
✅ სახელმძღვანელოები
რაც შეეხება სასკოლო სახელმძღვანელოებს, არ უნდა დაგვავიწყდეს, რომ დღეს გვყავს საკმაოდ განვითარებული, ერუდირებული თაობა, ციფრული ტექნოლოგიების გამოყენების მაღალი უნარებით. შესაბამისად, კარგი იქნებოდა სახელმძღვანელოების მუდმივი განახლება და გადახალისება, რაც თავისთავად გაზრდის საგნისადმი ინტერესსა და მოტივაციას. მოგეხსენებათ, დიდია მოსწავლეთა ინტერესი ინგლისური ენის მიმართ. კარგი იქნებოდა, რომ სკოლის სახელმძღვანელო და მასში წარმოდგენილი თემები უფრო მეტად პასუხობდეს თანამედროვე მოსწავლის მოთხოვნებს, ინტერესებს, იყოს უფრო კომპლექსური.
