9-16 თებერვალს, საქართველომ, ევროპის ზამთრის XVII ოლიმპიურ ფესტივალს უმასპინძლა და შეიძლება ითქვას – წარმატებითაც! „ბაკურიანი-2025“ ოფიციალურ მასპინძლად დაბა ბაკურიანი მიიჩნეოდა და ძირითადი შეჯიბრებები მართლაც იქ ჩატარდა, თუმცა რამდენიმე სახეობას თბილისმა და ბათუმმაც უმასპინძლეს. ამ ღონისძიების ფარგლებში, საქართველოს ევროპის 45 ქვეყნის 1000-მდე სპორტსმენი ესტუმრა, რასაც ოფიციალური სტუმრები თუ გუნდების სამედიცინო, ტექნიკური თუ სხვა სახის წევრებიც ემატებოდნენ. იყვნენ უცხოელი ქომაგებიც. საბედნიეროდ, მონაწილეებს ამინდმაც გაუმართლა და ბაკურიანში, სადაც ღია ცის ქვეშ გასამართი სახეობები ტარდებოდა, მთელი კვირის განმავლობაში, ისეთი თოვლიანი და ცივი ამინდი იყო, უკეთეს ვერ ინატრებდნენ.
ფესტივალის პროგრამაში სპორტის 8 სახეობა შედიოდა: ფიგურული ციგურაობა, თავისუფალი სრიალი, სამთო თხილამურობა, ბიატლონი, ყინულის ჰოკეი, შორტ ტრეკი, თხილამურებით რბოლა, სნოუბორდი. საქართველო ფესტივალზე 8 სპორტსმენით იყო წარმოდგენილი 3 სახეობაში: ბიატლონი, ფიგურული ციგურაობა და სამთო თხილამურობა.
ფესტივალის ოფიციალური მასპინძელი ბაკურიანი კი იყო, თუმცა, ღონისძიების ერთადერთი და თანაც ისტორიული წარმატება მისგან შორს, ბათუმში, მოვიპოვეთ, სადაც ფიგურულად მოციგურავე ინგა გურგენიძემ ოქროს მედალი მოიპოვა. მოკლე პროგრამის შემდეგ ის მესამე აგდილზე იყო და თავისუფალში 109 ქულამდე სჭირდებოდა გამარჯვების მოსაპოვებლად. იმის მიუხედავად, რომ დასაწყისში, ერთ-ერთ ნახტომზე, წონასწორობა დაკარგა და ლამის დაეცა, დანარჩენი ნაწილი უშეცდომოდ შეასრულა და 128 ქულაზე მეტი მიიღო, რითაც კარიერის რეკორდიც გააუმჯობესა, ჩვენ კი ისტორიული ოქრო მოგვიტანა – ამ ფესტივალების ისტორიაში მედლები კი გვქონდა, მაგრამ ოქრო პირველად მოვიპოვეთ.
როგორც გითხარით, ეს ჩვენი ერთადერთი მედალი აღმოჩნდა, თუმცა ზამთრის ფესტივალისგან ბევრს არც ველოდით, რადგან სპორტის ამ სახეობებში სათანადო პირობები არ გვაქვს. სამთო მოთხილამურეებიდან, ჩვენგან, ყველაზე კარგად ირაკლი ხერგიანი გამოვიდა – 29-ე ადგილი. გოგა გულედანი 36-ზე გავიდა, იასონ ვეზდენმა და გიორგი ჯაფარიძემ კი ტრასა ვერ დაასრულეს. ამავე დისციპლინაში, გოგონებში, ანასტასია მირიანაშვილი და ნელი უსტიმენკო 50-ეულში შევიდნენ, ბიათლონში 12.5-კილომეტრიან ტრასაზე შიო ქუჩუკიანი 64-ე იყო, 7.5-კილომეტრიანში კი – 62-ზე.
მედლები ვერ მოვიპოვეთ, თუმცა ამ ფესტივალმა მაინც დიდი დივიდენდი მოგვცა სპორტული ბაზების კუთხით, საორგანიზაციო თუ სხვა სახის გამოცდილებაზე რომ არაფერი ვთქვათ. სპეციალურად ამ ფესტივალისთვის ბაკურიანში თანამედროვე სტანდარტგების შესაბამისი ტრასა აშენდა ბიათლონისა და სათხულამურო დისციპლინებისთვის, თბილისში – 700 მაყურებელზე გათვლილი მულტიფუნქციური სპორტის სასახლე, სადაც ვარჯიში და ასპარეზობა ერთბაშად რამდენიმე სახეობაშია შესაძლებელი; გარემონტდა და მოეწყო ბათუმის ყინულის სასახლე… იმედია, ეს ყველაფერი ბიძგს მისცემს სპორტის ზამთრის სახეობების განვითარებას საქართველოში…
