ხარაგაულის მუნიციპალიტეტის სოფელ ხევის საჯარო სკოლაში 115 მოსწავლე სწავლობს, მათ სწავლა-განათლებაზე 23 მასწავლებელი ზრუნავს. სკოლას, 2015 წლიდან, სკოლის ექიმი ჰყავს – თემურ შუბითიძე, პროფესიით ექიმი თერაპევტი, 2007 წლიდან ოჯახის ექიმად, ხოლო 2015 წლიდან სოფელ ხევის საჯარო სკოლის ექიმად მუშაობს.
მისი სამუშაო დღე სწავლის დაწყებამდე 10-15 წუთით ადრე იწყება და სასწავლო დღის დასრულებამდე გრძელდება. „ჩემი მოვალეობაა მოსწავლეების და სკოლის პერსონალის ჯანმრთელობასთან დაკავშირებულ პრობლემებზე ზრუნვა, გადაუდებელი სამედიცინო დახმარება, საჭიროების შემთხვევაში კი, სასწრაფო დახმარების ბრიგადის გამოძახება. ყოველდღიურად ვამოწმებ და ვაკონტროლებ სკოლის სანიტარიულ-ჰიგიენურ მდგომარეობას. ზედამხედველობას ვუწევ სასმელი წყლის და სურსათის უვნებლობის უზრუნველყოფასთან დაკავშირებული მოთხოვნების დაცვას. მოსწავლეებს ვესაუბრები ჯანსაღი ცხოვრების წესზე, მავნე ჩვევების დაძლევასა და პირად ჰიგიენასთან დაკავშირებულ საკითხებზე,“ – ამბობს სკოლის ექიმი.
ისევე როგორც ყველგან, ხევის საჯარო სკოლაშიც, მოსწავლეთა ჯანმრთელობის მდგომარეობის მონიტორინგი ეტაპობრივად ტარდება, რაც მოიცავს ანთროპომეტრიული მონაცემების ფიზიკური განვითარების დონის შეფასებას ასკის მიხედვით – სქოლიოზი, ბრტყელტერფიანობა და სხვა. ამასთანავე, მოწმდება მოზარდების მხედველობის მდგომარეობა. ბატონი თემური ამბობს, რომ მისი სკოლის ექიმად მუშაობის პერიოდში მოსწავლეებში სერიოზულ ჯანმრთელობის პრობლემებს, რაიმე სახის დაავადების აღმოჩენას ადგილი არ ჰქონია.
„ძირითადად, მოსწავლეები ჩემთან თავის, კბილის, ყურის ტკივილის ჩივილით ან მუცლის არეში დისკომფორტის გამო მოდიან. პრაქტიკაში მქონდა მწვავე აპენდიციტის რამდენიმე შემთხვევა. ასევე ხშირია სპორტული აქტივობებით გამოწვეული ჩივილები, მაგალითად, კუნთების და მყესების დაჭიმულობა, სახსრების ღრძობა, იყო კიდურის მოტეხილობის შემთხვევაც. ასევე ხშირია კანის ზედაპირული მცირე დაზიანებები; სხეულის ტემპერატურის ცვლილებით გამოწვეული რეაქციები, განსაკუთრებით სეზონური ინფექციების პერიოდში, – გვიამბობს სკოლის ექიმი და აღნიშნავს, რომ დღევანდელ მოსწავლეებში ხშირად მხედველობის, ჭარბი წონის, ქრონიკული ტონზილიტის, ჰიპოთირეოზის – ფარისებრი ჯირკვლის ფუნქციასთან დაკავშირებული სხვადასხვა სახის პრობლემები იკვეთება.
მოზარდი და კვება ერთ-ერთი პრობლემური საკითხია. ადრეულ ასაკში არარაციონალურმა და არასრულფასოვანმა კვებამ შესაძლოა შეაფერხოს სხეულის ზრდა, გონებრივი, ინტელექტუალური და მოტორული უნარების განვითარება, გაზარდოს ავადობისა და სიკვდილიანობის რისკი. ზრდასრულ ასაკში განვითარებული დაავადებების, მათ შორის — ქრონიკულის, ერთ-ერთი მიზეზი, ხშირად, სწორედ ადრეულ ასაკში არაჯანსაღი კვებაა. შეკითხვაზე, თუ რამდენად ჯანსაღად იკვებებიან ხევის საჯარო სკოლის მოსწავლეები, ბატონი თემური გვპასუხობს: „სწორი კვება არა მარტო მოზარდებში, არამედ, ზოგადად, ზრდასრულებშიც პრობლემური საკითხია. ჩემს მოსწავლეებს ვაძლევ რეკომენდაციას, რომ სკოლაში საუზმის გარეშე არ წამოვიდნენ. იკვებონ ჯანსაღად და დაბალანსებულად – ცილის, ცხიმის და ნახშირწყლების შემცველი პროდუქტებით, ხილით და ბოსტნეულით. სოფელში ბავშვები, მეტწილად, ატურალური პროდუქტებით იკვებებიან, რაც ძალზე მნიშვნელოვანია“.
სკოლის ექიმს ორი ძირითადი ფუნქცია აქვს – პირველადი დახმარების გამწევის და, ასევე, განმანათლებლის. კერძოდ, მოსწავლეების, მშობლების, მასწავლებლების ცნობიერების ამაღლებისკენ მიმართული საქმიანობა ჯანმრთელობასთან დაკავშირებულ ისეთ საკითხებზე, როგორიცაა: ცხოვრების ჯანსაღი წესი, მავნე ჩვევების დაძლევა, პირადი ჰიგიენა, ჯანმრთელობის ხელშეწყობა, მათ შორის, მოზარდთა რეპროდუქციული ჯანმრთელობა, ნაადრევი ქორწინების რისკები და სხვა. ჩვენთან საუბარში ბატონი თემური ამბობს, რომ ყველაზე ხშირად მოსწავლეებთან ცხოვრების ჯანსაღი წესის შესახებ, ჰიგიენის დაცვის საკითხებზე, სწორი კვების მნიშვნელობასა და აუცილებლობაზე, მავნე ჩვევების დაძლევასა და ნაადრევი ქორწინების უარყოფით შედეგებზე საუბრობს. ამბობს, რომ იმუნიზაციის ტენდენციამ სკოლა 100%-ით მოიცვა, მშობლებიც და მოზარდებიც გაგებით ეკიდებიან ამ მეტად მიშვნელოვან საკითხს.
„ჩვენს სკოლაში თბილი მეგობრული გარემოა, მოსწავლეები ერთმანეთს პატივისცემით ეპყრობიან. არასოდეს ყოფილა ძალადობის ან არასათანადო მოპყრობის შემთხვევა. სკოლის ექიმის კაბინეტი აღჭურვილია სტანდარტების შესაბამისად. მუდმივად ვცდილობ პროფესიულ განვითარებას, აქტიურად ვესწრები სათანადო ტრენინგებსა თუ სემინარებს თერაპიაში, ოჯახის ექიმის საქმიანობასა თუ სასწრაფო-გადაუდებელ დახმარებაში, პულმონოლოგიაში, ვირუსულ ინფექციებში. ოჯახის ექიმის კუთხით, მაქვს შესაბამისი სერტიფიკატები.“
მანანა ტაბატაძე, ხევის საჯარო სკოლის მასწავლებელი: „ყველა სკოლაში ექიმის კაბინეტის მოწყობა და ექიმის ყოფნა უმნიშვნელოვანესია. მოსწავლები ასე უფრო დაცულად გრძნობენ თავს. ჩვენი სკოლის ექიმი, ბატონი თემური მოვალეობას პირნათლად ასრულებს. მუდამ მზადაა, სამედიცინო დახმარება გაუწიოს მოსწავლეებს და სკოლის თანამშრომლებს. ის სისტემატურად საუბრობს მოსწავლეებთან მათთვის საჭირო და აქტუალურ თემებზე, როგორიცაა: ჯანსაღი ცხოვრების წესი, სწორი კვება, პირადი ჰიგიენის დაცვა, მავნე ჩვევების დაძლევა, ნაადრევი ქორწინების უარყოფითი შედეგები და მრავალი სხვა. საჭიროების შემთხვევაში, მოსწავლეებს უტარებს პირველად სამედიცინო დახმარებას. ბატონ თემურს სკოლის თანამშრომლებთან, მოსწავლეებთან და მშობლებთან თბილი, მეგობრული დამოკიდებულება აქვს. სკოლაში ექიმის ყოფნით თავს ყველანი უსაფრთხოდ და დაცულად ვგრძნობთ“.
ლიკა ხაჩიძე, ხევის საჯარო სკოლის მოსწავლე: „ჩემი აზრით, მნიშვნელოვანია, ყველა სკოლაში იყოს სათანადოდ აღჭურვილი ექიმის კაბინეტი. კვალიფიციური ექიმი ძალიან დიდი ფუფუნებაა. მოხარული ვარ, რომ გვყავს ჩვენზე მზრუნველი და ჩვენი უფროსი მეგობარი, საუკეთესო ექიმი, ბატონი თემური“.
მარიამ კახიძე, ხევის საჯარო სკოლის მოსწავლე: „ჩვენი სკოლის ექიმი გამოირჩევა თავისი საქმის სიყვარულით. არის მოწესრიგებული პიროვნება და პროფესიონალი ექიმი. მისი სკოლაში ყოფნა ჩვენთვის ძალიან მნიშვნელოვანია. მის კაბინეტში შესულები ვგრძნობთ დიდ ყურადღებას, მეგობრულ დამოკიდებულებას. მისგან ვისმენთ საჭირო რჩევებს არა მხოლოდ ჯანმრთელობის, არამედ პირად საკითხებზეც. ვისურვებდი, ყველა სკოლაში იყოს ისეთი სკოლის ექიმი, როგორიც ბატონი თემურია“.
მოამზადა მაკა ყიფიანმა
