მუსიკათერაპია და პიროვნების სოციალიზაცია
ლიანა სონღულაშვილი
თბილისის №215 საჯარო სკოლის მუსიკის მასწავლებელი
„ემპათია არის უნარი, დაინახო სხვისი თვალით, მოისმინო სხვისი ყურით და იგრძნო სხვისი გულით“ – ალფრედ ადლერი
ზემოთ აღნიშნული პროექტული თემის აქტუალობის გამო, გადავწყვიტე კოლეგებისთვის გამეზიარებინა მეათე კლასში განხორციელებული აქტივობები, რომლებიც მოსწავლეებისთვის მეტად საინტერესო და ნაყოფიერი აღმოჩნდა.
„მუსიკათერაპია და პიროვნების სოციალიზაცია“ – თემის სპეციფიკიდან გამომდინარე, თავიდანვე განვსაზღვრე, რომ აქტიური ურთიერთობა გვექნებოდა ამავე სკოლის სხვადასხვა სპექტრის სპეციალური საჭიროების მქონე მოსწავლეებთან. ამისათვის მივმართე სპეციალურ მასწავლებელს, გავაცანი პროექტის შინაარსი, მიზანი და შევთავაზე ერთობლივი სამუშაო გეგმა, რომელიც რამდენიმე ეტაპად განვახორციელეთ.
⇒ პროექტული სწავლების პროცესში წარმოდგენილი სასწავლო-სააღმზრდელო აქტივობების მიზანი გახლდათ სსსმ მოსწავლეებსა და პროექტის მონაწილეებს შორის აქტიური ურთიერთობა, მუსიკის გაკვეთილებზე ნასწავლი სახალისო, ამავე დროს, სააზროვნო აქტივობების მათთვის გაზიარება, ემპათიის, თანამშრომლობის უნარების განვითარება, გულისხმიერი დამოკიდებულება მათგან განსხვავებული შესაძლებლობების მქონე მოსწავლეების მიმართ და ურთიერთობისთვის ემოციური მზაობა.
⇒ განხორციელებული სასწავლო-სააღმზრდელო აქტივობების ეტაპები:
პროექტზე მუშაობის პირველი ეტაპი
მოსმენისა და დაკვირვების უნარ-ჩვევები
მხედველობაშია ლექციური ტიპის მუსიკის საგაკვეთილო პროცესი, რომლის დროსაც მოსწავლეები გაეცვნენ რესურსებს მუსიკათერაპიის არსის, ტიპებისა და მეთოდების შესახებ, ამ სფეროში მოღვაწე ცნობილი მეთოდისტების (კ. ორფი, ზ. კოდაი, ბენენზონი, ნორდოფ-რობინსი) სხვადასხვა სპექტრის მქონე სპეციალური საჭიროებების მქონე ადამიანებისთვის განკუთვნილ საინტერესო და სასარგებლო მიდგომებსა და აქტივობებს.
სპეციალურ მასწავლებელთან შეხვედრისას მოსწავლეებმა მოისმინეს ინფორმაცია აუტისტური სპექტრის შესახებ.
პროექტის მონაწილეებმა, მოსაუბრის მიმართ, აქტიური მოსმენის, აღქმის და გაგების უნარი გამოავლინეს, რომლის მეშვეობითაც, შემდგომ, მათთვის საინტერესო კითხვები დასვეს.
პროექტზე მუშაობის მეორე
ეტაპი თანამშრომლობის უნარ-ჩვევები
ერთობლივად დავგეგმეთ სპეციალური საჭიროების მოსწავლეებთან შეხვედრების განრიგი, რომლის დროსაც პროექტის მონაწილენი (საშუალო საფეხურის მოსწავლეები), სპეციალური მასწავლებელი, სსსმ მოსწავლეები და მუსიკის მასწავლებელი მრავალფეროვან სახალისო-სააზროვნო აქტივობებს, თამაშობებს წარმოვადგენდით.
ასეთი შეხვედრების დროს პროექტის მონაწილეებმა ერთმანეთის მოტივირებისა და გამხნევების, სასარგებლო ცოდნისა და გამოცდილების გაზიარების უნარები გამოავლინეს.
პროექტზე მუშაობის მესამე ეტაპი
კრიტიკული აზროვნების უნარი
პროექტში მონაწილე საშუალო საფეხურის მოსწავლეებთან ერთად, შევარჩიეთ სპეციალური საჭიროების მქონე მუსიკის სხვადასხვა ჟანრში მოღვაწე ცნობილი წარმატებული პიროვნებები, რომელთა შესახებაც ინფორმაციები მოსწავლეებმა დაგეგმილ კონფერენციაზე პრეზენტაციების სახით წარმოადგინეს.
პრეზენტაციაზე მუშაობის პროცესში მათ მოძიებული მასალის სისტემურად და ლოგიკურად გაანალიზების უნარი გამოავლინეს.
ვიზიტი თბილისის ვ. სარაჯიშვილის სახ.კონსერვატორიაში
მცირე დარბაზში დავესწარით კლასიკური მუსიკის ინკლუზიურ კონცერტს „მომავლის არტისტები“, აუტისტური სპექტრის მქონე მოსწავლეების მონაწილეობით.
პროექტის ბოლო ეტაპი
პრაქტიკული გაკვეთილი, სადაც პროექტის მონაწილეებმა, მოწვეული სტუმრების წინაშე, სპეციალურად შერჩეული მუსიკის ფონზე, საინტერესო სააზროვნო-გასართობი აქტივობები წარმოადგინეს.
