ვინი პუჰის ამბავი ხომ გაგიგიათ?!
წიგნში წაიკითხეთ თუ მულტფილმი ნახეთ? მე პირადად მულტფილმი – მხოლოდ ზრდასრულ ასაკში. ახლა წიგნიდან შევეხები ერთ ეპიზოდს, რომელსაც ჰქვია, „პუჰის პირველი დღე სკოლაში“ („ეს მე ვარ ვინი პუჰი“, ალან ალექსანდრ მილნი, გამომცემლობა პალიტრა L, 2021).
ვინი პუჰის მეგობარი ბიჭუნასავით, ალბათ თქვენი მოსწავლეებიც პირველად მიდიან სკოლაში, „სკოლის პირველი დღე კი შეიძლება რთული იყოს“ – ამიტომ საუკეთესოდ ვემზადებით ხოლმე. განსაკუთრებით სპეციალური საგანმანათლებლო საჭიროების მქონე მოსწავლეებისთვის, მაგრამ მთავარია – დარწმუნებული იყო, რომ შენი მოსწავლე „წერა-კითხვას ისწავლის“.
იცით რა გააკეთა ვინი პუჰის მეგობარმა, კრისტოფერ რობინმა ამისთვის?
„კრისტოფერ რობინმა ფურცლები და ფანქრები დააწყო მაგიდაზე.
– მოდი, ჩვენ-ჩვენი პორტრეტები დავხატოთ.
– კი მაგრამ, ეს რა შუაშია ანბანის სწავლასთან? – იკითხა ვეფხვმა.
– ანბანში საუკეთესოა ის ასოები, რომლებითაც შენი სახელი იწერება, – უთხრა კრისტოფერ რობინმა, როდესაც ჩვენს პორტრეტებს დავხატავთ, მერე ქვეშ სახელები მივაწეროთ.“
მე მგონი თქვენი მოსწავლეებიც შეძლებენ ამ დავალების შესრულებას, არა?
შემდეგი ამბავიც დათვზეა
ოღონდ „ყველაზე კეთილი დათვის ცხოვრებიდან“ („გაიცანი პადინგტონი“, მაიკლ ბონდი, ბაკურ სულაკაურის გამომცემლობა, 2022). მას პადინგტონი ჰქვია. ისე, ცოტა რთული სახელია, არა?!
პადინგტონის თავგადასავლებით სავსე ცხოვრება თუ დააინტერესებს თქვენს მოსწავლეებს, შეგიძლიათ წიგნიც ურჩიოთ და ფილმიც. მე მხოლოდ პატარა ეპიზოდზე მოგიყვებით, „პადინგტონი კარნავალზე“ – აი, ზუსტად ამ თავიდან.
„ერთხელ პადინგტონი მისტერ გრუბერმა ექსკურსიაზე წაიყვანა“. ღონისძიების განრიგის გაცნობის შემდეგ მისტერ გრუბერმა შესთავაზა „ბზუილა ბუზის კვალდაკვალ მოგზაურობა“ როგორ მოგწონს? „ბ“ – ასოზე დაწყებული სიტყვების მოძებნა მოგიწევს.
და დაიწყო კონკურსი. შენი აზრით პადინგტონი გაიმარჯვებს? მე კი უკვე ვიცი რომ გაიმარჯვებს და ჯილდოდ ნავზე მეგობართან ერთად გასეირნებასაც დაიმსახურებს.
პადინგტონმა „ბ“ ასოზე დაწყებული უამრავი სიტყვა იპოვა და ფურცელზე ჩამოწერა.
„ბაზარში, ბოძზე, ბანერი მიეკრათ. იქვე სოსისებს წვავდნენ და ბოლი იდგა. აქა-იქ ფერადი ბუშტები ფრიალებდა; სანაპიროზე ბიჭი იჯდა; ხილისა და ბოსტნეულის გამყიდველი ბანანს წონიდა. ბავშვი დედას სახლისკენ ექაჩებოდა“.
„ბზუილა ბუზის კვალდაკვალ კონკურსის დღესაც, როგორც ყოველთვის, უამრავი რაღაც შეემთხვა, მაგრამ მე მხოლოდ იმას გეტყვით, რომ პადინგტონმა 39 სიტყვა მოაგროვა. რა თქმა უნდა, ყველა „ბ“ ასოზე იწყებოდა. ნეტავ თქვენი მოსწავლეები რამდენ სიტყვას მოაგროვებენ? მეც გამიზიარეთ. ეს „თამაშ-თამაში“ თუ მოეწონებათ შემდეგ შეგიძლიათ ნებისმიერი სხვა ასო-ბგერა შესთავაზოთ.
და აი მესამე ამბავი, რომელსაც მეც დიდი ხანი ველოდი
„ძილგუდა ტოტოს ზამთარს“ იპოვით ლელა ცუცქირიძის წიგნში „უუუ კულელე და სხვა მოთხრობები“ (ბაკურ სულაკაურის გამომცემლობა, 2023). ყველა მოთხრობა უსაყვარლესია: ზოგი სასაცილო, ზოგი ცოტათი საშიშიც კია, ერთი სული მაქვს ყველა წავიკითხო…
პატარა ძილგუდა ტოტომ არ იცოდა, როგორი იყო ზამთარი, რადგან შემოდგომით, ოქტომბრის დადგომისთანავე, იძინებდა და ზაფხულში, ივნისის თვეში, იღვიძებდა. მთელი ზაფხული დახტოდა ტოტიდან ტოტზე და მხიარულად ატარებდა დროს. მაგრამ მისი დედიკო ნერვიულობდა, რადგან ტოტომ მიმატება-გამოკლება არ იცოდა და გადაწყვიტა, ტოტო ქალბატონი თაგვისთვის მიებარებინა მათემატიკის შესასწავლად. ქალბატონი თაგვი „ფრიად განათლებული გახლდათ, სულ ენციკლოპედიებში იქექებოდა. პატარა ძილგუდა მაშინვე თავის შვილს, თაგუნა სუსუს მიუსვა გვერდით მათემატიკის შესასწავლად“.
ისინი უცებ დამეგობრდნენ! მათმა მეგობრობამ ჯადოსნური ამბები დაატრიალა, რომელსაც წიგნის ბოლო ფურცლებზე წაიკითხავთ.
დავალება კი ასეთია: გაასწორე შეცდომები და დასვი შესაბამისი სასვენი ნიშნები.
ძილგუდა ტოტოს წერილი თაგუნა სუსუს
ჩემო თაგუმია ხუხუ ამ წერირს შენმა დედიკომ რომ ფარანანი მაწუქა იმის შუქზე გშერ
დიდი მადრობა შნ რო არრა ზამთრას ვერ ვნახდი რა რამაზი ყოფილა თოვრიც ახარი
წერიც და ყვერაფერიც ფუმფურა თაგუნა რო მაწუქე, იმასთან ერთად უნდა დავიხინო
ზაფხურწი კი ისევ გნახავ და თოვრის პაპამ რო მანქნა მაწუქა იმით ვითამშოთ.
წენი მეგუბარი ძირგუდ
ხვრიი
ხვრიი
ხვრიი
ეკა ღვინიაშვილი
№82 საჯარო სკოლის სპეციალური მასწავლებელი, „კატოს სკოლის“ დამფუძნებელი
