ნანა ლომაია
ხობის მუნიციპალიტეტის სოფელ ხამისქურის საჯარო სკოლის ქართული ენისა და ლიტერატურის მასწავლებელი
სწავლა-სწავლების პროცესის მოსწავლეთა საუკეთესო ინტერესებზე მოსარგებად, ფორმალურ განათლებასთან ერთად, პრიორიტეტულია არაფორმალური განათლება, რომლის არაერთ მახასიათებელს შორის, ვფიქრობთ, ხელმისაწვდომობას, სწავლების თავისუფალ სტილს, შესაძლებლობების აღმოჩენასა თუ სკოლის კულტურის გამდიდრებას განსაკუთრებული ადგილი უკავია. სწორედ აღნიშნული მახასიათებლები იქნა იმ პროექტების ინიცირების საფუძველი, რომლის ფარგლებში, სხვადასხვა რეგიონის ათეულობით სკოლაა გაერთიანებული. მათ შორისაა მიმდინარე საგანმანათლებლო პროექტი „გვესაუბრეთ ლიტერატურაზე“, რომელშიც 50-ამდე სკოლაა ჩართული. პროექტის მიზნები სრულად შეესაბამება მესამე თაობის ეროვნულ სასწავლო გეგმასა და ზოგადი განათლების ეროვნულ მიზნებს. ისინი შემდეგი სახით იქნა ფორმულირებული:
◊ მოსწავლეთა ლიტერატურული გემოვნების დახვეწა;
◊ მოსწავლეებში ლიტერატურის პოპულარიზაცია, ინტერესის გაღრმავება და მათი ლიტერატურული ჰორიზონტის გაფართოება პროფესიონალებთან პირდაპირი ინტერაქციის გზით;
◊ არაფორმალური განათლების გამოყენებით მოსწავლეთა ცოდნის დონის გაუმჯობესება;
◊ გააზრებული კითხვის უნარების განვითარება და თვალსაწიერის გაფართოება;
◊ მოსწავლეთა წიგნიერების დონის ამაღლება;
◊ თანატოლებთან და უფროსებთან დადებითი, კონსტრუქციული ურთიერთობისა და გუნდური მუშაობის ხელშეწყობა;
◊ მოსწავლეებში შემოქმედებითი, კვლევითი და კრიტიკული უნარების აღმოჩენა და განვითარება;
◊ სკოლებს შორის აქტიური თანამშრომლობა;
◊ მოსწავლეებსა და პედაგოგებში გუნდური მუშაობის ხელშეწყობა.
შეხვედრების ციკლი შემდეგი ამოცანების შესაბამისად განხორციელდება:
• მოსწავლეებისთვის ლიტერატურის სხვადასხვა ასპექტის გაცნობა;
• კრიტიკული აზროვნებისა და ანალიზის უნარების განვითარება;
• ლიტერატურის სფეროს პროფესიონალებთან დიალოგის კულტურის ჩამოყალიბება;
• წერითი და ზეპირი კომუნიკაციის უნარების გაუმჯობესება;
• ლიტერატურული პროცესების შესახებ ცოდნის გაღრმავება.
პირველ შეხვედრაზე ლიტერატურაზე სასაუბროდ მოწვეული იყო ლიტერატურის სფეროს პროფესიონალი, ქართული ენისა და ლიტერატურის მენტორი მასწავლებელი, ეროვნული სასწავლო გეგმის საგნობრივი ექსპერტი, ბატონი როლანდ ხოჯანაშვილი, რომელმაც მოსწავლეებთან ისაუბრა ლიტერატურის სხვადასხვა ასპექტზე, დააფიქრა კარგი მკითხველის მახასიათებლებზე, საკითხავი ლიტერატურის შერჩევის ხერხებზე, პოეზიისა და პროზის უპირატესობებზე, ზოგადად, ლიტერატურის ღირებულებასა და როლზე. მოსწავლეებზე მამოტივირებელი გავლენა იქონია ბატონი როლანდის მოწოდებამ, ნუ იქნებიან თავშეკავებულნი ურთიერთშორის მოსაზრებებისა თუ ინიციატივების გაზიარებისას, ძლიერი მხარეების წარმოჩენისას, რადგან ამ გზით შეძლებენ გარკვეული დამოკიდებულებებისა თუ ღირებულებების განივითარებას, თანატოლებთან და უფროსებთან კონსტრუქციული ურთიერთობის, თანამშრომლობითი კულტურის ჩამოყალიბებას… მოსწავლეები აქტიურად ჩაერთნენ დიალოგში და პროექტის გარშემო საკუთარი მოსაზრებებიც გამოთქვეს.
პროექტის განსაკუთრებულ მნიშვნელობას უსვამს ხაზს საქართველოს პედაგოგთა და მეცნიერთა თავისუფალი პროფკავშირის პრეზიდენტის, ქალბატონ მაია კობახიძის დაინტერესება, რომელმაც უპირობო მხარდაჭერა გამოხატა ამ ინიციატივისადმი.
პროექტის სტარტი თანამშრომლობისა და მხარდაჭერის მზაობით გამოიხატა, რამაც ჩართულ სკოლებს წარმატებული შედეგის მოლოდინი დაგვიტოვა.
პროექტის ორგანიზატორები არიან:
ხათუნა ბერაძე – სსიპ ხარაგაულის მუნიციპალიტეტის სოფელ ხიდრის საჯარო სკოლის ქართული ენისა და ლიტერატურის მასწავლებელი;
ზაზა შულაია – სსიპ ხობის მუნიციპალიტეტის სოფელ საგვიჩიოს საჯარო სკოლის ქართული ენისა და ლიტერატურის მასწავლებელი.
პროექტის მხარდამჭერი:
მარიამ ჩაჩანიძე – ილიას სახელმწიფო უნივერსიტეტის მეცნიერებათა და ხელოვნების ფაკულტეტის სტუდენტი ქართული ფილოლოგიის მიმართულებით, საგანმანათლებლო პროექტების ავტორ-ორგანიზატორი, გაზეთ „ახალი განათლების“ მიერ გამოცხადებული კონკურსების სამგზის გამარჯვებული, საქართველოში პირველი მასშტაბური ურთიერთსწავლების პროექტის თანაავტორი, კონკურსის „ვწერ თავისუფალ თემას“ 2024 წლის ფინალისტი.
