ილიას სახელმწიფო უნივერსიტეტის მოწვეულმა მკვლევარმა, გიორგი ბიძინაშვილმა, არქეოლოგთა საერთაშორისო ჯგუფთან ერთად, ოროზმანში ადრეპალეოლითური ეპოქის კულტურულ ფენას მიაკვლია. ბოლო თვეების განმავლობაში ეს მეორე უმნიშვნელოვანესი აღმოჩენაა, რომელიც მეცნიერებას პირველყოფილი ადამიანის შესახებ ახალ ინფორმაციას აწვდის. პირველი იყო, ასევე დმანისის მუნიციპალიტეტში, სოფელ ქვემო ოროზმანის ტერიტორიაზე არსებულ არქეოლოგიურ ობიექტზე 1,8 მილიონი წლით დათარიღებულ ფენაში ადამიანის ქვედა ყბის აღმოჩენა, რომელიც, სავარაუდოდ, ადრეულ Homo erectus-ს ეკუთვნის
ოროზმანის არქეოლოგიურ გათხრებს აწარმოებენ საქართველოს არქეოლოგიისა და პრეისტორიის კვლევითი ცენტრისა და ჰელსინკის უნივერსიტეტის დედამიწის შემსწავლელი დეპარტამენტის პროფესორები და დოქტორანტები, პროცესში მონაწილეობენ ილიას სახელმწიფო უნივერსიტეტის, ასევე ევროპის სხვადასხვა ქვეყნისა და აშშ-ის უნივერსიტეტების სტუდენტები.
ცოტა ხნის წინ ბოლნისის, დმანისისა და ოროზმანის არქეოლოგიურ ძეგლებს ეწვია საქართველოში საფრანგეთის საელჩოს საქმეთა რწმუნებული ბატონი რიშარ რეკენა, რათა ადგილზე არქეოლოგიურ ჯგუფებს შეხვედროდა.
ვიზიტის დროს, იგი გაესაუბრა პროფესორ გიორგი ბიძინაშვილს, რომელიც ხელმძღვანელობს გათხრებს.
ახალი აღმოჩენები აძლიერებს საქართველოს პოზიციას, როგორც აფრიკიდან ადრეული ადამიანების მიგრაციის შესწავლის მთავარ ადგილს. საფრანგეთის სამეცნიერო კვლევების ეროვნულ ცენტრთან (CNRS) აფილირებული კლიმატისა და გარემოსდაცვითი მეცნიერებების ლაბორატორიის მიერ ჩატარებული მიმდინარე დათარიღების ანალიზები მომდევნო თვეებში ნათელს მოჰფენს ამ ნაშთებს.
ოროზმანის აღმოჩენა მნიშვნელოვანი ახალი ფურცელია ადამიანის ევოლუციის კვლევისთის და კიდევ მრავალ სიახლეს გვპირდება.
