21 სექტემბერს, თბილისის ზ. ფალიაშვილის სახელობის ოპერისა და ბალეტის სახელმწიფო თეატრში, 173-ე სეზონი ზაქარია ფალიაშვილის უკვდავი ოპერით „აბესალომ და ეთერი“ (რეჟისორი – გიზო ჟორდანია; სცენოგრაფია, კოსტიუმები და განათება – გიორგი ალექსი-მესხიშვილი) გაიხსნა.
დამსწრე საზოგადოებას სეზონის გახსნა მიულოცა სამხატვრო ხელმძღვანელმა, ბადრი მაისურაძემ და აღნიშნა, რომ სპექტაკლი ეძღვნება დამდგმელი რეჟისორის, გიზო ჟორდანიას 90 წლისთავს და დასძინა, რომ ყოველი ახალი სეზონი „აბესალომ და ეთერით“ გაიხსნებაო. შემდეგ სიტყვა გადასცა ოპერის ამაგდარ სოლისტს, ელდარ გეწაძეს: „გიზო ჟორდანია არა მხოლოდ დიდი რეჟისორი იყო, არამედ თითოეული ჩვენგანის დიდი მეგობარი…“
სპექტაკლის დამდგმელი დირიჟორი გახლდათ ზაზა აზმაიფარაშვილი, რომელიც სპექტაკლს თავად დირიჟორობდა და მსმენელის ხანგრძლივი ოვაცია დაიმსახურა. როგორც ყოველთვის, შეუდარებელი იყო თეატრის ორკესტრი, გუნდი, საბალეტო დასი და ქართული ნაციონალური ბალეტი „სუხიშვილები“.
წამყვან პარტიებს მღეროდნენ: აბიო მეფე – გოჩა დათუსანი, ნათელა – ირინა ალექსიძე, აბესალომი – არმაზ დარაშვილი, ეთერი – მაყვალა ასპანიძე, მურმანი – სულხან გველესიანი, მარიხი – მარიკა მაჩიტიძე.
სპექტაკლმა სრული ანშლაგით ჩაიარა. დასასრულს, მაყურებელმა ხანგრძლივი აპლოდისმენტებით დააჯილდოვა გამორჩეული ტენორი – არმაზ დარაშვილი, ბრწყინვალე სოპრანო – მაყვალა ასპანიძე, ასევე საბალეტო დასი და ქართული ნაციონალური ბალეტის – „სუხიშვილების“ მოცეკვავეები.
სპექტაკლს ესწრებოდა გიზო ჟორდანიას მეუღლე, ისტორიის მეცნიერებათა დოქტორი, პროფესორი ნათელა ვაჩნაძე.
მარიკა პოპიაშვილი
