„მსოფლიო საფოსტო კავშირის“ (Universal Postal Union) წერილის წერის საერთაშორისო კონკურსი, „საქართველოს ფოსტის“ ორგანიზებითა და საქართველოს ეკონომიკისა და მდგრადი განვითარების სამინისტროს, ასევე, საქართველოს განათლებისა და მეცნიერების და გარემოს დაცვისა და სოფლის მეურნეობის სამინისტროების მხარდაჭერით, მიმდინარე წელს, მეცხრედ გაიმართება.
„საერთაშორისო საფოსტო კავშირის“ წერილის წერის საერთაშორისო კონკურსს საფუძველი 1971 წელს ჩაეყარა, „მსოფლიო საფოსტო კავშირის“ ტოკიოს კონგრესზე. „მსოფლიო საფოსტო კავშირის“ წევრ 192 ქვეყანაში კონკურსს ეროვნული ოპერატორები მართავენ. ყოველწლიურად, მსოფლიო მასშტაბით, კონკურსში მილიონობით მოზარდი მონაწილეობს. სხვადასხვა ქვეყნებში გამოვლენილი გამარჯვებულები საერთაშორისო მასშტაბით განაგრძობენ შეჯიბრს. გამარჯვებულ ქვეყანას „მსოფლიო საფოსტო კავშირის“ ჟიური გამოავლენს.
დაჯილდოვდება ყველა მონაწილე. გამოვლინდება საუკეთესო სამეული, პირველი ადგილის მფლობელის ნამუშევარი გაიგზავნება „მსოფლიო საფოსტო კავშირში“ და საერთაშორისო საკონკურსო პროგრამაში ჩაერთვება.
2022 წლის საკონკურსო თემა გახლავთ „მიწერე წერილი გავლენიან ადამიანს თუ რატომ და როგორ უნდა მიიღონ ზომები კლიმატის ცვლილებასთან დაკავშირებით“ („Write a letter to an influential person about why and how to take action on climate change“). კონკურსის მიზანია, თანამედროვე ტექნოლოგიების ეპოქაში, წერილის წერის ტრადიციის პოპულარიზება.
„მსოფლიო საფოსტო კავშირის“ საერთაშორისო კონკურსში გამარჯვებული წერილის ავტორის დაჯილდოების ცერემონია გაიმართება 2022 წლის 9 ოქტომბერს, ფოსტის საერთაშორისო დღეს, ქალაქ ბერნში, შვეიცარია.
კონკურსში მონაწილეობა შეუძლიათ 9-15 წლამდე ასაკის მოზარდებს. ნამუშევარში აუცილებელია შემდეგი მოთხოვნების გათვალისწინება:
♦ სავალდებულოა, ნაშრომში შენარჩუნებული იყოს წერილის ფორმა.
♦ სავალდებულოა, წერილი იწყებოდეს მისალმებით.
♦ სავალდებულოა, მითითებული იყოს როგორც გამგზავნის, ასევე მიმღების მონაცემები.
♦ სავალდებულოა, წერილი სრულდებოდეს გამგზავნის ხელმოწერითა და თარიღით.
♦ სავალდებულოა, ნამუშევრის შინაარსი პასუხობდეს კონკურსის თემატიკას.
♦ კონკურსში მონაწილეობამდე ნამუშევარი არ უნდა იყოს გამოყენებული, გამოქვეყნებული.
♦ სავალდებულოა, წერილში სიტყვათა რაოდენობა 1000 ერთეულს არ აღემატებოდეს.
♦ წერილი, შესაძლებელია, შესრულებული იყოს ქართულ, არაბულ, ინგლისურ, ფრანგულ, პორტუგალიურ, რუსულ ან ესპანურ ენებზე.
♦ მონაწილე ვალდებულია, წარმოადგინოს როგორც ხელნაწერი ნაშრომი, ასევე მისი ელექტრონული ვერსია. ელექტრონული ვერსია და მონაწილის საკონტაქტო ინფორმაცია (სახელი, გვარი, ასაკი, ტელეფონის ნომერი, მისამართი) უნდა გაიგზავნოს მისამართზე: letter@gpost.ge
♦ მხოლოდ ნამუშევრის ელექტრონული ფოსტით მიწოდების შემდგომ, მოხდება მონაწილეობის მსურველის კონკურსში რეგისტრაცია. წერილის ელექტრონული ვერსიის გამოგზავნიდან არაუგვიანეს 5 სამუშაო დღისა, მონაწილემ უნდა წარმოადგინოს ნაშრომის დედანი, წინააღმდეგ შემთხვევაში, კანდიდატი ავტომატურად მოიხსნება კონკურსიდან.
♦ აპლიკანტი ვალდებულია, ნაშრომი წარმოადგინოს დალუქული კონვერტით და კონვერტზე დატანილ იქნეს შემდეგი წარწერა: „წერილის წერის საერთაშორისო კონკურსი 2022“. სხვა ნებისმიერი: სახელი, გვარი, ზედმეტსახელი, პირობითი სახელის ან მაიდენტიფიცირებელი ნიშნის და/ან რაიმე სიმბოლოს დატანა იკრძალება.
♦ კონკურსანტს შეუძლია, ისარგებლოს ახლომდებარე საფოსტო სერვისცენტრის მომსახურებით საქართველოს მთელ ტერიტორიაზე ან განათავსოს ნაშრომი „საქართველოს ფოსტის“ საფოსტო შემკრებ ყუთში. მომსახურება უფასოა.
♦ ელექტრონული რეგისტრაციის გავლის შემდეგ, აპლიკანტი ვალდებულია, 5 დღის ვადაში, ისარგებლოს საფოსტო მომსახურებით და გაგზავნოს ნაშრომის დედანი (სასურველია ხელნაწერი).
♦ კონკურსის პირობიდან გამომდინარე, ნაშრომი შესრულებული უნდა იყოს მოსწავლის და არა მშობლის, ან პედაგოგის, ან სხვა მესამე პირის მიერ.
♦ წერილის ავტორი აცხადებს თანხმობას, რომ საქართველოს ფოსტა:
დაამუშავებს მის პერსონალურ მონაცემებს, მოქმედი კანონმდებლობის შესაბამისად.
საჯაროდ გამოაქვეყნებს წერილის შინაარსს, წერილის ავტორის დამატებითი ინფორმირებისა და თანხმობის გარეშე.
ნამუშევრების მიღება 2022 წლის 2 მარტიდან დაიწყო.
საკონკურსო ნამუშევრის ელფოსტაზე და საფოსტო სერვისცენტრში
მიღების საბოლოო თარიღია 2022 წლის 13 აპრილი.
ნამუშევრები უნდა გამოიგზავნოს შემდეგ მისამართზე:
შპს „საქართველოს ფოსტა“
ქ. თბილისი, სადგურის მოედანი 2
0100 თბილისი, საქართველო
ტელ: +995 32 2240909 ელექტრონული ფოსტა: letter@gpost.ge
