გავიდა დრო და ამ პატარა ბიჭის ოცნება ახდა – ის მასწავლებელი გახდა. მასწავლებლობაზე მეოცნებე ბიჭი ვარ მე, ზვიად ფიფია, მარნეულის მუნიციპალიტეტის სოფელ კაჩაგანის N1 საჯარო სკოლის მენტორი მასწავლებელი. ამ სკოლაში პედაგოგიურ საქმიანობას 2010 წლიდან ვეწევი, არაქართულენოვან მოსწავლეებს ქართულ ენას ვასწავლი და ვაყვარებ. არა მხოლოდ მოსწავლეებს, ჩემი ამ სკოლაში მუშაობის პირველივე დღიდან მთელ თემს, კოლეგებს, მშობლებს, ყველა დაინტერესებულ პირს ვასწავლი სახელმწიფო ენას. ჩემი მოსწავლეებისთვის ვქმნი ადაპტირებულ რესურსებს, ერთობლივად ვგეგმავთ და ვახორციელებთ სხვადასხვა ღონისძიებას, რაც ხელს უწყობს ქართული ენის პოპულარიზაციას და ეთნიკური უმცირესობების ინტეგრირებას ქართულ საზოგადოებაში.
სასწავლო პროექტები, ექსკურსიები, ლიტერატურული კონკურსები, ქართული ენის თუ დამოუკიდებლობის დღისადმი მიძღვნილი და გარემოსდაცვითი ღონისძიებები, კალიგრაფიის კონკურსი – ეს იმ აქტივობათა არასრული ჩამონათვალია, რასაც ჩემს სკოლაში ვახორციელებ.
ჩემთვის ძალიან მნიშვნელოვანი და საამაყოა, რომ ჩემი იქ ჩასვლის შემდეგ გაიზარდა საქართველოს უმაღლეს სასწავლებლებში ჩაბარების მსურველთა რიცხვი კაჩაგანის სკოლიდან და დღეს ჩემი მოსწავლეები ჩემი კოლეგები არიან. ერთ-ერთი მათგანი ქართული ენის მასწავლებელია.
მართალია, არაქართულენოვან სკოლაში მუშაობის გამოცდილება მქონდა, მაგრამ რაიონული ცენტრიდან შორს მდებარე სოფელში სულ სხვა გამოწვევის წინაშე დავდექი – დამჭირდა საკუთარ თავზე მუშაობა, პროფესიული წინსვლისთვის მეტი ძალისხმევის დახარჯვა, ადაპტირებული სასწავლო რესურსების შექმნა ენობრივი კომპეტენციისა და შესაძლებლობების გათვალისწინებით. ვესწრებოდი მეორე ენის მიმართულებით მასწავლებლის სახლის მიერ შემოთავაზებულ ყველა ტრენინგს, დაგროვილ ცოდნას კი ჩემს კოლეგებს ვუზიარებდი, ვესწრებოდი და ვისწრებდი გაკვეთილებზე.
ჩემი, როგორც ქართულის, როგორც მეორე ენის მასწავლებლის მიზანია, ჩემს მოსწავლეებს ჩამოუყალიბდეს ქვეყნის მოქალაქეობის განცდა. ვცდილობ, შევაყვარო ქართული ენის სწავლის პროცესი და სამშობლოსა და მისი კულტურის მიმართ ჰქონდეთ პოზიტიური დამოკიდებულება.
პანდემიის დროს აფხაზეთის იმ პატარა ქალაქიდან ვატარებდი სახელმწიფო ენის გაკვეთილებს ეთნიკური აზერბაიჯანელი მოსწავლეებისთვის. ახლა ჩემი ოცნება გალის სკოლაში ქართული ენის გაკვეთილების ჩატარებაა.
ზვიად ფიფია
მარნეულის მუნიციპალიტეტის სოფელ კაჩაგანის №1 საჯარო სკოლის მენტორი მასწავლებელი
