ლელა სულეიმანიშვილი
სსიპ ზუგდიდის მუნიციპალიტეტის სოფ. ანაკლიის საჯარო სკოლის ინგლისური ენის წამყვანი მასწავლებელი
გრძელვადიანი მიზნის მისაღწევად საჭიროა სასწავლო პროცესის შუალედურ სასწავლო მიზნებად დაყოფა. განსხვავებით გრძელვადიანი მიზნებისგან (რომელიც უკვე განსაზღვრულია ეროვნული სასწავლო გეგმით), შუალედურ სასწავლო მიზანს სკოლა განსაზღვრავს, საჭიროებებისა და შესაძლებლობების შესაბამისად. მის ჩამოყალიბებაში საგნობრივი კათედრები იღებენ გადაწყვეტილებებს.
შუალედურ მიზანს აქვს სამი ძირითადი კომპონენტი, რომელთა ეტაპობრივად განხორციელების შემდეგ, ითვლება იგი მიღწეულად. შუალედური მიზნის კომპონენტებია:
⇒ პროდუქტი რომელსაც ქმნის მოსწავლე (მაგალითად: პოსტერი, კომიქსი, მცირე ზომის თხრობითი ტექსტი, ანალიტიკური ნაშრომი და სხვ.);
⇒ ძირითადი საკითხი, რომელსაც შეეხება კომპლექსური დავალება;
⇒ შეფასების კრიტერიუმები, რომლებიც მიემართება სამიზნე ცნების მკვიდრ წარმოდგენებს.
პირველ კომპონენტს მოიცავს პროდუქტი, რომელსაც ქმნის მოსწავლე. ეს ავტონომიური ნამუშევარია და მისი შექმნის პროცესში შეუძლია სხვისი მხარდაჭერაც გამოიყენოს, რაც არ გულისხმობს პროდუქტის შექმნას სხვის მიერ.
მეორე კომპონენტია ძირითადი საკითხი, რომელსაც უშუალოდ შეეხება კომპლექსური დავალება. ძირითადი საკითხის გარეშე კომპლექსური დავალების შექმნა შეუძლებელია, ვინაიდან ეს საკითხი მოიცავს კომპლექსური დავალების მთავარ თემას.
შეფასების კრიტერიუმები მიემართება სამიზნე ცნების მკვიდრ წარმოდგენებს და სრულ კორელაციაშია მკვიდრ წარმოდგენებთან.
გრძელვადიანი მიზნების საფუძველზე შუალედური მიზნების გამოსაყოფად, უპირველეს ყოვლისა, აუცილებელია სასწავლო თემის, როგორც სტრუქტურული ერთეულის, მნიშვნელობის გააზრება. ეროვნული სასწავლო გეგმის მოთხოვნების მიხედვით, თემა წარმოადგენს კონტექსტს, რომლის ფარგლებშიც, უნდა დამუშავდეს ეროვნული სასწავლო გეგმის ყველა შედეგი და სამიზნე ცნება. თემას, როგორც საბაზისო ერთეულს, სასიცოცხლო მნიშვნელობა აქვს სწავლა-სწავლების პროცესში და კონსტრუქტივისტული მიდგომების განხორციელება მის გარეშე წარმოუდგენელია.
შუალედური სასწავლო მიზნების რაოდენობა ეროვნულ სასწავლო გეგმაში სავალდებულოდაა განსაზღვრული. მათი რაოდენობა და მოცულობა დამოკიდებულია კონკრეტული სკოლის/კლასის მოცემულობაზე. მაგალითად, შეიძლება ჩამოყალიბდეს შუალედური მიზანი:
⇒ რომელიც ერთ საკითხს და ერთ სამიზნე ცნებას შეეხება;
⇒ რომელიც, ერთი საკითხის გამოყენებით, 2-3 სამიზნე ცნების დამუშავებას გულისხმობს;
⇒ შუალედური მიზანი, რომლის საფუძველზეც, თემის ფარგლებში, ყველა სამიზნე ცნება და მასთან დაკავშირებული საკითხები ერთობლივად დამუშავდება.
კომპლექსური დავალების პირველ ეტაპზე ყველა მოსწავლემ უნდა მიიღოს დავალება და შეათანხმოს, რა ფორმით წარმოადგენს მას. შესაძლებელია კომპლექსური დავალების პირობის ადაპტირება მოსწავლის საჭიროებების მიხედვით.
მეორე ეტაპზე, მასწავლებელი და მოსწავლეები კომპლექსური დავალების შესრულებაზე მუშაობენ. სასწავლო პროცესში:
⇒ ეცნობიან და განიხილავენ დავალებასთან დაკავშირებულ რესურსებს;
⇒ ხორციელდება შესაბამისი საკლასო აქტივობები და სრულდება საშინაო დავალებები.
კომპლექსურ დავალებაზე მუშაობის პროცესი რამდენიმე წინაპირობას მოიცავს:
⇒ კომპლექსურ დავალებაზე მუშაობა რამდენიმე (მაგ., 5-6) გაკვეთილს მოიცავს;
⇒ კომპლექსურ დავალებაზე მუშაობს ყველა მოსწავლე. საჭიროების შემთხვევაში, უნდა მოხდეს კომპლექსური დავალების პირობის ადაპტირება კონკრეტული მოსწავლეების ინტერესებსა და შესაძლებლობებზე (მაგ., შეიძლება შეიცვალოს დავალების წარმოდგენის ფორმა, კრიტერიუმების რაოდენობა, გამარტივდეს სასწავლო რესურსი და სხვა);
⇒ ყველა მოსწავლემ, პირველივე გაკვეთილზე, უნდა იცოდეს, რომელი კომპლექსური დავალების შესრულებას ეძღვნება მომდევნო გაკვეთილები;
⇒ ყველა მოსწავლემ უნდა იცოდეს, რომ მასწავლებელი თითოეულ მათგანს მოსთხოვს შესრულებული კომპლექსური დავალების წარდგენას;
⇒ კომპლექსური დავალების პირველი ეტაპი ეძღვნება კომპლექსური დავალების ფორმას: აუცილებელია, მოსწავლეებმა კარგად გაიგონ, რა ფორმით მოეთხოვებათ, შესასწავლ საკითხთან მიმართებით, საკუთარი ცოდნის წარმოჩენა;
⇒ შეკითხვის ფორმით ჩამოყალიბებული კომპლექსური დავალების შეფასების კრიტერიუმები, სწავლების პროცესში, ეტაპების როლს ასრულებს;
⇒ სასწავლო პროცესში ყველა აქტივობა კომპლექსური დავალების შესრულებას უკავშირდება. ეს არის „ტრადიციული სასწავლო პროცესის“ ჩანაცვლება და არა ახალი ელემენტის დამატება არსებულ სასწავლო პროცესზე. ამდენად, ყველა აქტივობა, სავარჯიშო, საშინაო თუ საკლასო დავალება კომპლექსური დავალების შესრულებას ემსახურება;
⇒ კომპლექსური დავალება საკლასო აქტივობებია და არა მოსწავლისთვის დამოუკიდებელი სამუშაოს სახით მიცემული დავალება/საშინაო დავალება. დაუშვებელია, მოსწავლემ, მასწავლებლის დახმარების/ფასილიტაციის გარეშე, იმუშაოს კომპლექსურ დავალებაზე;
⇒ არ არის საკმარისი, მოსწავლემ უბრალოდ შეასრულოს კომპლექსური დავალება. დავალებაზე მუშაობისას და/ან საბოლოო წარდგენისას, მან უნდა აღწეროს რა პროდუქტი შექმნა, როგორ წარიმართა სამუშაო პროცესი, ახსნას რატომ შეასრულა დავალება ამ და არა სხვა სახით, შეაფასოს საკუთარი ნამუშევარი, დაუკავშიროს მის ან თანაკლასელების მიერ სხვადასხვა დროს შესრულებულს;
შუალედური სასწავლო მიზნების მოსწავლის საჭიროებებზე მორგება, სწორად განსაზღვრა და კომპლექსური დავალებების საშუალებით განხორციელება გრძელვადიანი მიზნის მიღწევის წინაპირობაა. სწავლება უნდა წარიმართოს კომპლექსური დავალებიდან კომპლექსურ დავალებამდე და არ უნდა ჰქონდეს მას ეპიზოდური ან ფორმალისტური ხასიათი.