ბრწყინვალე აღდგომის სწორზე, 12 მაისს, ღია ცის ქვეშ, თბილისის ივანე ჯავახიშვილის სახელობის თბილისის სახელმწიფო უნივერსიტეტის ბაღში გაიმართა ქართველი მწერლისა და საზოგადო მოღვაწის, XXI საუკუნის პირველი ოცწლეულის პოეტების ხუთეულში დასახელებული, თბილისისა და სიღნაღის საპატიო მოქალაქის, თსუ-ის ოქროს მედლის მფლობელის, დავით აღმაშენებლის, ილია ჭავჭავაძის, ივანე ჯავახიშვილის, ვაჟა-ფშაველას, გალაკტიონ ტაბიძის, ლევან გოთუას სახელობის, „საგურამოს“ და „მუზას“ პრემიების მფლობელის – თემურ ჩალაბაშვილის ხსოვნის საღამო.
მისი ლექსი, შუშანიკ დედოფალს რომ მიუძღვნა, ოქრომკერდით ამოიქარგა მეწამულ ხავერდზე და ახლა მეტეხის ტაძარში საქართველოსთვის წამებული დედოფლის საფლავს ამშვენებს. პოეტის ლექსზე „ჩემო საქართველოვ, მართლმადიდებელო!“ შექმნილ ჰიმნს სრულიად საქართველოს კათალიკოს პატრიარქმა, ილია მეორემ მართლმადიდებლობის სიმღერა უწოდა, ხოლო ლექსი „სანთელი“ თავად იქცა რელიგიურ სიწმინდედ… თემურ ჩალაბაშვილის ბიოგრაფიასა და შემოქმედებაზე ვრცლად ისაუბრეს დედოფლისწყაროს ილია ჭავჭავაძის სახელობის მწიგნობართა ასოციაციის თანათავმჯდომარემ, საქართველოს დამსახურებულმა ჟურნალისტმა, ნანა ჭიჭინაძემ და ლიტერატურული ალმანახის „ხორნაბუჯი“ რედაქტორ-გამომცემელმა, დედოფლისწყაროს მწერალთა ასოციაციის „ფიროსმანი“ თავმჯდომარემ, გიორგი ნატროშვილმა.
დედოფლისწყაროს მწერალთა და მწიგნობართა ასოციაციის წევრმა, სოფელ ქვემო ქედში დაბადებულმა ახალგაზრდა ნიჭიერმა პოეტმა, თსუ-ს მე-4 კურსის წარჩინებულმა სტუდენტმა, მარიამ ტოხიშვილმა წაიკითხა პოეტის უახლოესი მეგობრის, ჯუბა ღებელის ლექსი „ისევ ჩალაბას“:
„შენით მიყვარდა „ვორონცოვი“, ჩალაბაშვილო,
შენც მომატყუე ქალდანივით, – „მერე დავლიოთ,
რომ ჩამოხვალო“, – როგორ მინდა ახლა მანდ ვიყო,
წამოგაყენო კუბოდან და „გადაგასმიო“!..“
ცნობილმა პოეტებმა – მზია ხეთაგურმა, მარინა ცხვედიაშვილმა, მირანდა ერისთავმა და სხვებმა ჩალაბასადმი მიძღვნილი საკუთარი ლექსები წაიკითხეს.
თემურის ნიჭის დამფასებლებმა თსუ-დან გადაინაცვლეს მახათას მწერალთა და საზოგადო მოღვაწეთა პანთეონში, სადაც პოეტის საფლავი 72 თეთრი ვარდით შეამკეს და 72 თაფლის სანთელი დაანთეს.
გთავაზობთ მარინა ცხვედიაშვილის ლექსს, პოეტის გარდაცვალების შემდეგ რომ დაწერა:
„ბიჭო, ანაგურელო,
რაშო ფაფარაშლილო,
საქართველოს მოუკვდი,
თემურ ჩალაბაშვილო.
როგორ მოგიგურგურო,
გზა რომ გაგიიოლო,
შეწყვეტილო „ურმულო“,
დაშრეტილო იორო.
ქართულ ლექსის ლაზათო,
პოეზიის ბულბულო,
აბა ვით არ დამზაფროს,
ბედმა მჭლემ და უგულომ.
ვიცი ჰამლეტს შეხვდები
ფიროსმანის დუქანთან,
ამ სურათის შემყურეს,
სული გამიგულქვავდა.
რჩეულ კაცთა კრებული
გხვდება ხელებგაშლილი,
საქართველოს მოუკვდა
თემურ ჩალაბაშვილი!“
შენიშვნა: XXI საუკუნის პირველი ოცწლეულის 50 პოეტიდან ხუთეულში მოხვდნენ: რეზო ამაშუკელი, დავით მაღრაძე, თემურ ჩალაბაშვილი, ტარიელ ხარხელაური და მზია ხეთაგური.
მარიკა პოპიაშვილი
საღამოს ინიციატორი და ორგანიზატორი
