4 დეკემბერი, კვირა, 2022

უკრაინელ მოსწავლეებთან მომუშავე მასწავლებლებს, მანდატურებს, ფსიქოლოგებსა და სოციალურ მუშაკებს ვებინარები ჩაუტარდებათ

spot_img

საქართველოს განათლებისა და მეცნიერების სამინისტროს მხარდაჭერით, მასწავლებლის პროფესიული განვითარების ეროვნული ცენტრი, გაეროს ბავშვთა ფონდთან (UNICEF) ერთად, უკრაინელ მოსწავლეებთან მომუშავე პედაგოგებს ინტერაქციულ ვებინარებს სთავაზობს.

თემატური ვებინარები, რომლებსაც ცენტრისა და UNICEF-ის გამოცდილი სპეციალისტები და განათლების ექსპერტები გაუძღვებიან, დისტანციურ ფორმატში 19 აპრილიდან  5 მაისის ჩათვლით ჩატარდება. ონლაინ ლექციები, თემატიკის გათვალისწინებით, განკუთვნილია მათთვის, ვინც უკრაინელ მოსწავლეების სასწავლო პროცესშია ჩართული. მათ შორის არიან მასწავლებლები, მანდატურები, ფსიქოლოგები, სოციალური მუშაკები და სკოლის თანამშრომლები.

ვებინარების შესახებ საინფორმაციო შეხვედრა საქართველოს განათლებისა და მეცნიერების მინისტრის მოადგილე ვალერიან გობრონიძემ საქართველოში გაეროს ბავშვთა ფონდის წარმომადგენლობის ხელმძღვანელ ღასან ხალილთან და მასწავლებლის პროფესიული განვითარების ეროვნული ცენტრის ხელმძღვანელ ბერიკა შუკაკიძესთან ერთად გამართა.

შეხვედრაზე მხარეებმა პროექტის დეტალები განიხილეს და სასწავლო პროცესში უკრაინიდან ჩამოსული მოსწავლეების მხარდაჭერის მიმართულებით მიმდინარე და განსახორციელებელ ღონისძიებებზე იმსჯელეს.

მინისტრის მოადგილემ მადლობა გადაუხადა გაეროს ბავშვთა ფონდს უკრაინელი მოსწავლეებისა და მასწავლებლების ხელშეწყობისთვის. მისი თქმით, სამინისტროს ერთ-ერთ მთავარ პრიორიტეტს წარმოადგენს უკრაინიდან ჩამოსულ ბავშვებზე ზრუნვა. ამ მიმართულებით არაერთი ნაბიჯი გადაიდგა.

კერძოდ, პრემიერ-მინისტრის ირაკლი ღარიბაშვილის გადაწყვეტილებით, სამინისტრომ თბილისის 41-ე საჯარო სკოლაში ზუსტად 2 კვირაში დააფუძნა უკრაინულენოვანი სექტორი, სადაც უკრაინელ მოსწავლეებს პირველიდან მეთერთმეტე კლასის ჩათვლით მშობლიურ ენაზე აქვთ ზოგადი განათლების მიღების შესაძლებლობა. გარდა ამისა, საქართველოს მთავრობის გადაწყვეტილებით, უკრაინელი მოსწავლეები, საქართველოს სკოლებში გამარტივებული წესით ირიცხებიან. ვალერიან გობრონიძის განცხადებით, ამ დროისათვის მთელი ქვეყნის მასშტაბით, სხვადასხვა საჯარო და კერძო სკოლაში, 600-ზე მეტი უკრაინელი მოსწავლე იღებს განათლებას.

შეხვედრის მონაწილეებს მასწავლებლის პროფესიული განვითარების ეროვნული ცენტრის ხელმძღვანელმა უკრაინელი მოსწავლეებისთვის საბუნებისმეტყველო საგნების მხარდაჭერის პროგრამის – STEM კლუბ „ჩხირკედელას“ ფარგლებში დაგეგმილი აქტივობები გააცნო. უკრაინიდან ჩამოსული მოსწავლეები საბუნებისმეტყველო ლაბორატორიას ესტუმრებიან, სადაც რობოტიკის საფუძვლებს გაეცნობიან და სხვადასხვა საინტერესო STEM პროექტებს განახორციელებენ. აღსანიშნავია, რომ მოსწავლეების ტრანსპორტირებასა და კვებას მასწავლებლის პროფესიული განვითარების ეროვნული ცენტრი უზრუნველყოფს.

საქართველოში გაეროს ბავშვთა ფონდის წარმომადგენლობის ხელმძღვანელმა კიდევ ერთხელ დადებითად შეაფასა უკრაინელი მოსწავლეებისა და მასწავლებლების ხელშეწყობის მიზნით განათლებისა და მეცნიერების სამინისტროს მიერ განხორციელებული ღონისძიებები. როგორც მან აღნიშნა, მასწავლებლების პროფესიული მხარდაჭერა და მათთვის შესაბამისი ვებინარების ჩატარება უაღრესად მნიშვნელოვანი ინიციატივაა, რაც პედაგოგებს მისცემს შესაძლებლობას, დაეხმარონ მოსწავლეებს ომის შედეგად მიღებული სტრესის დაძლევაში.

როგორც ღასან ხალილმა განაცხადა, ქვეყნის მასშტაბით სხვადასხვა რეგიონში UNICEF-ის ინიციატივით ფუნქციონირებს „ბავშვთა უფლებების ცენტრები“, რომლებიც მზად არიან აქტიურად ჩაერთონ საქართველოში მყოფი უკრაინელი მოსწავლეებისთვის მხარდამჭერი პროექტების განხორციელებაში.

ბლოგი

მოსაზადებელი კურსი მოსწავლეებისთვის

პროფესიული

მსგავსი სიახლეები