მაია ცქიტიშვილი – ქუთაისის საგანმანათლებლო რესურსცენტრის უფროსი
✔️🟪️ სამინისტრო-რესურსცენტრი-სკოლა – ეს არის უწყვეტი კავშირი იმ ძირითადი ორგანოებისა, რომელთაც ხარისხიანი განათლების ხელმისაწვდომობისა და განვითარებისთვის „ხელი მუდმივად პულსზე უდევთ და ესმით ერთმანეთის მაჯისცემა“.
რეფორმის შედეგად შესაძლებელი გახდება, რომ სკოლები რესურსცენტრში სწრაფად და ეფექტურად გაეცნონ და მიიღონ კონსულტაციები, კონკრეტული საჭიროებიდან გამომდინარე, სამინისტროსთან დააყენონ შუამდგომლობები და ისარგებლონ ყველა ხელმისაწვდომი მომსახურებით, რაც გულისხმობს იმ ამოცანების გადაწყვეტასა და განხორციელებას, რომელიც რესურსცენტრის კომპეტენციის ფარგლებშია შესაძლებელი.
რესურსცენტრი, როგორც სამინისტროს პოლიტიკის განხორციელების ხელშემწყობი ორგანო, თავის სამოქმედო ტერიტორიაზე არსებულ საჯარო სამართლის იურიდიულ პირებში – ზოგადსაგანმანათლებლო დაწესებულებებში უზრუნველყოფს მიმდინარე პროცესების ზედამხედველობას, მხარდაჭერას და კონსულტირებას, სასწავლო პროცესისა და გარემოს მონიტორინგს, შეფასებას, შესაბამისი ანგარიშების შედგენას და მათ საფუძველზე, სასწავლო პროცესისა და გარემოს გაუმჯობესებისათვის რეკომენდაციების შემუშავებას, შემდეგ საჯარო სკოლებისთვის და სამინისტროსთვის წარდგენას.
რესურსცენტრი, ეროვნული სასწავლო გეგმის შესაბამისად, სასწავლო პროცესის წარმართვის მონიტორინგსაც ახორციელებს, ხელს უწყობს: საგანმანათლებლო-აღმზრდელობითი თუ სხვა პროგრამებისა და პროექტების განხორციელებას; მშობელთა ინფორმირებულობის ზრდას განათლების სისტემაში მიმდინარე რეფორმების მიმართულებით; თავის სამოქმედო ტერიტორიაზე არსებული საჯარო სკოლების მიერ მოსწავლეთა პროფესიული ორიენტაციისა და კარიერის დაგეგმვის სისტემის დანერგვა-გაძლიერებასა და მოქმედებს კანონით მინიჭებული სხვა უფლებამოსილებების ფარგლებში.
✔️🟪️ ბოლო 3 წელია, პანდემიამ ქვეყანაში ახალი გამოწვევის წინაშე დააყენა საგანმანათლებლო სფერო, ზოგადად ყველა მიმართულება. თავდაპირველად, სანამ სრულად ავუღეთ ალღო ახალ მიმართულებას სწავლების ნაწილში, რასაც „დისტანციური სწავლება“ ჰქვია, იყო პრობლემები. თუმცა, უნდა ითქვას, რომ განათლების სისტემამ უმოკლეს დროში აუწყო ფეხი ახალ გამოწვევას.
✔️🟪️ მე, როგორც რესურსცენტრის ხელმძღვანელი, ვისურვებდი, ჩემს სამოქმედო ტერიტორიაზე არსებული ოცდათვრამეტივე საჯარო სკოლა იყოს სრულად რეაბილიტირებული, საერთაშორისო სტანდარტების შესაბამისად ისევე, როგორც ეს ქალაქ ქუთაისში განხორციელდა 2019 წელს, მილენიუმის პროექტის ფარგლებში და რეაბილიტაცია ჩაუტარდა 7 საჯარო სკოლას. ასევე, 2020 წელს, მუნიციპალური განვითარების ფონდმა დაიწყო 5 საჯარო სკოლის სრული რეაბილიტაცია, 2022 წლიდან კიდევ იგეგმება რამდენიმე ახალი სკოლის რეაბილიტაცია.
რესურსცენტრის უფროსის ინდივიადუალური ადმინისტრაციული აქტით განისაზღვრება შესაბამისი წარმომადგენელი, რომელიც უფლებამოსილია, მონაწილეობა მიიღოს, მასწავლებლის საქმიანობის დაწყების, პროფესიული განვითარებისა და კარიერული წინსვლის სქემის ფარგლებში, მასწავლებლის შეფასებისა და, საჭიროებიდან გამომდინარე, კონსულტაციის გაწევის პროცესში. შესაბამისი ღონისძიებების (ტრენინგების, სემინარებისა და სხვა) ორგანიზებით, რესურსცენტრი ზრუნავს მის სამოქმედო ტერიტორიაზე არსებული ზოგადსაგანმანათლებლო დაწესებულებების ადამიანური რესურსების განვითარებაზე და ხელს უწყობს მათთვის პროფესიულად მნიშვნელოვანი რესურსების შესახებ ინფორმაციის დროულად მიწოდებას.
✔️🟪️ ჩემი რესურსცენტრის ხელმძღვანელად დანიშვნის დღიდან, არაერთი აქტივობა განხორციელდა, მაგრამ განსაკუთრებით გამოვყოფდი ჩემ მიერ ინიცირებულ სტიპენდიას, ჩემივე სახელფასო ანაზღაურებიდან, რომელიც ყოველწლიურად ეძლევა პროექტ ეტალონში გამარჯვებულ „ქუთაისის ეტალონ მოსწავლეს“, 1000 ლარის ოდენობით და გარდამავალ თასს, რომელსაც გამარჯვებული სკოლა გადასცემს მომდევნო წლის გამარჯვებულ სკოლას, სადაც ერთი წელი ინახება და ელოდება შემდეგ მასპინძელ გამარჯვებულ სკოლას, ეს მათთვის დიდი სტიმულია.
✔️🟪️ ისევ პრობლემად რჩება ინფრასტრუქტურული ნაწილი გარკვეულ საჯარო სკოლებში. ადგილობრივ მუნიციპალიტეტთან ერთად, შეძლებისდაგვარად, ასეთ სკოლებს დახმარებას ვუწევთ. იმავდროულად, აქტიური ჩართულობითა და სამინისტროს მხარდაჭერით, მათი სრულად რეაბილიტაციის გადაწყვეტილებებს ველოდებით, რაც ეტაპობრივად, როგორც უკვე აღვნიშნე, ყოველწლიურად მიმდინარეობს.
სასურველია, რესურსცენტრი მეტად იყოს ჩართული სასწავლო პროცესში, მაგალითად, შეფასების ჯგუფში ჩართულობა და სხვა.