ირაკლი თავაძე
ჩინებული სეზონი ჩაატარა ამერიკულ სტუდენტურ საკალათბურთო ლიგაში (NCCA) ნიუ ჯერსის „სეტონ ჰოლის“ 21 წლის ქართველმა კალათბურთელმა, სანდრო მამუკელაშვილმა — იგი დაასახელეს თავისი კონფერენციის (BIG EAST) სიმბოლურ ხუთეულში, მერე კი — ამ კონფერენციის საუკეთესო მოთამაშეთა სამეულში; ჩაატარა რამდენიმე გამორჩეულად კარგი შეხვედრა… ამასთან, კონფერენციის სიმბოლურ ხუთეულში, თავის პოზიციაზე, ყველა მწვრთნელმა ერთხმად დაასახელა. ასეთი პატივი კი ხუთეულში, მის გარდა, მხოლოდ ერთს ხვდა წილად — „ვილანოვას“ ჯერემია რობინსონ ეარლის. აფროამერიკელი წლევანდელ ნომინაციებში კიდევ ერთხელ აღმოჩნდა ქართველის გვერდით — წელს BIG EAST-ის ხელმძღვანელობამ გადაწყვიტა, კონფერფენციის საუკეთესოდ სამი მოთამაშე დაესახელებინა, ამ ტრიოში მამუკელაშვილი და რობინსონ ეარლიც შევიდნენ, კიდევ ერთ ვილანოველთან — კოლინ გილესპისთან ერთად. ისინი ამ ტიტულს თანაბრად ინაწილებენ.
ერთი სიტყვით, მამუკელაშვილი NCCA-ს ვარსკვლავის რანგში ტოვებს და ამ სტატუსით მიდის NBA-ში: ქართველი კალათბურთელი, ზაფხულში, NBA-ს დრაფტზე დადგება. იქ წასვლა შარშანაც სურდა და თავისი კანდიდატურა დააყენა კიდეც დრაფტზე, რამდენიმე კლუბმა გასაუბრებაზეც მიიწვია და მოწონებაც დაიმსახურა, თუმცა, საბოლოოდ, მაინც მწვრთნელ კევინ ვილარდს დაუჯერა და ერთი წლით კვლავაც სტუდენტურ ლიგაში დარჩა. ვილარდი მას თავიდანვე ურჩევდა, არ ეჩქარა NBA-ში წასვლა, ჯერ კარგად მომზადებულიყო და მერე გადასულიყო.
საინტერესოა, რომ მამუკელაშვილს მაშინ NBA-ს დრაფტზე დადგომას არც სპეციალისტთა ნაწილი ურჩევდა, ოღონდ არა იმიტომ, რომ თითქოს მზად არ იყო ასეთ დონეზე სათამაშოდ, პირიქით, ლამის ერთხმად აღნიშნავდნენ, რომ ადაპტაცია არ გაუჭირდებოდა. მათი არგუმენტი ის იყო, რომ სტუდენტურ ლიგაში კიდევ უფრო მოძლიერდებოდა და გაცილებით უკეთ მოემზადებოდა NBA-ში სათამაშოდ. ამასთან, მიმომხილველთა ნაწილი პირდაპირ ურჩევდა „სეტონ ჰოლის“ ხელმძღვანელობას, რომ მიმდინარე სეზონშიც შეენარჩუნებინა მამუკელაშვილი, რადგან უკვე გადაწყვეტილი იყო NBA-ში კლუბის მეორე ლიდერის გადასვლა. ისინი პირდაპირ ამბობდნენ, რომ მამუკელაშვილსაც თუ დაკარგავდნენ, კლუბს მის გარეშე ფრიად გაუჭირდებოდა.
მაშინ „სეტონ ჰოლის“ მწვრთნელი იმასაც ამბობდა, რომ იმ გასაუბრებამ და დრაფტზე ყოფნამ მაინც დიდი როლი შეასრულა მამუკელაშვილის ცხოვრებაში. — ბევრად უფრო თავდაჯერებული გახდა: „მან NBA-ს დრაფტის გარკვეული ნაწილი გაიარა და დიდი დაინტერესებაც გამოიწვია. ახლა ის შეცვლილია — თუ ადრე თავდაჯერება ცოტათი აკლდა, ახლა საკუთარ ძალებში აბსოლუტურად დარწმუნებულია. მან უკვე კარგად იცის, რომ შესანიშნავი მოთამაშეა. ახალ სეზონში გუნდში „მამუს“ და კიდევ რამდენიმე მოთამაშის როლის გაზრდას ველოდები. სანდროს მაგარი სეზონი ექნება“. — ამბობდა ვილარდი.
მამუკელაშვილი მართლაც დარჩა კლუბში, სადაც მართლაც ნამდვილ ლიდერად მოგვევლინა და ვარსკვლავურადაც გაიბრწყინა! ახლა ის NBA-ს კარზეც ბევრად თამამად დააკაკუნებს. საინტერესოა, რომ სანდროს ბებია — ირა გაბაშვილი ყოფილი საბჭოთა კავშირის ქალ კალათბურთელთა ნაკრების კაპიტანი იყო!
ბუნებრივია, მამუკელაშვილს მთავარი გამარჯვებები წინ აქვს, წლეულს მოპოვებული წოდებები კი მისი კარიერის მხოლოდ დასაწყისია, თუმცა ესეც გამორჩეული ამბავია. აი, როგორ იხსენებს სანდრო იმ წუთებს, როცა კონფერენციის საუკეთესოდ აღიარების შესახებ შეიტყო. თურმე მას ეს ამბავი კლუბის საზოგადოებასთან ურთიერთობის სამსახურის ხელმძღვანელმა, ტომ ჩენმა შეატყობინა ტელეფონით:
„ამის გაგონებაზე, მგონი, ჭკუიდან შევიშალე და ტელეფონში ვყვიროდი — აღნიშნულისთვის ხომ ძალიან ბევრი ვიმუშავე. მაინც ეჭვმა შემიპყრო და ტომს მივწერე: მართალი მითხარი, ეს ნამდვილად მოხდა? მისი პასუხი მოკლე და მრავლისმეტყველი გახლდათ: „მამუ“!
როცა ჯილდოს მოგების ამბავი ჩემს ძმას გავაგებინე, ორივე შოკში ვიყავით. ეს ემოციების ზღვა იყო, რომელიც მეორე დღემდე გამყვა, ვიდრე მწვრთნელს დაველაპარაკებოდი. მთელი ღამე არ მეძინა… მადლობას ვუხდი კონფერენცია BIG EAST-ის ყველა წარმომადგენელს. უდავოა, რომ ეს ჩემს ცხოვრებაში ერთ-ერთი გამორჩეული მომენტი იყო.“
მამუკელაშვილმა ის დროც გაიხსენა, როცა სახლი დატოვა და უცხო გარემოში წავიდა მომავალთან შესახვედრად: „14 წლის ვიყავი, როდესაც სახლი დავტოვე და უცხო ქვეყანაში წავედი. ეს ნამდვილად ურთულესი გადაწყვეტილება იყო. წარმომიდგენია, რას გრძნობდნენ მაშინ დედა და მამა. მშობლებს ხომ ყოველთვის უნდათ, შვილი გვერდით ჰყავდეთ და მას დახმარება გაუწიონ. ჩემმა მშობლებმა იცოდნენ, რაც მსურდა და სრულადაც მენდობოდნენ. მახსოვს, მათ ყოველდღე ვურეკავდი, ვტიროდი და სახლში დაბრუნებას ვთხოვდი. თუმცა მათ მითხრეს, როცა რაიმე საქმეს იწყებ, ის ბოლომდე უნდა მიიყვანო, რისთვისაც შენი შესაძლებლობები სრულად უნდა გამოიყენო.
იყო დრო, როცა ეს მიუღწეველი მიზანი გახლდათ. ამიტომ ჩემი მოწოდება ერთია: ყოველთვის გჯეროდეთ საკუთარი თავის. ცხოვრებაში ბევრი წინსვლა და ვარდნაა და ზოგჯერ, უბრალოდ, გინდათ, რომ რაც შეიძლება იოლი გზა მონახოთ, თუმცა, მინდა იცოდეთ, რომ კომფორტის ზონა ყოველთვის დამღუპველად მოქმედებს.“
აღსანიშნავია, რომ მამუკელაშვილი „სეტონ ჰოლის“ ისტორიაში მეოთხე კალათბურთელია, ვინც კონფერენციის საუკეთესო მოთამაშედ დაასახელეს. წლეულს ის კიდევ ორი პრიზის ლაურეატია — დასახელებულია კარლ მელოუნის პრიზის (კოლეჯთა ლიგის საუკეთესო მძიმე ფორვარდი) ფინალისტად და და მეტროპოლიის წლის საუკეთესო მოთამაშის წოდების კანდიდატია. ამასთან, ის სრულიად სტუდენტური ლიგის — NCCA-ს წლის საუკეთესო მოთამაშის ტიტულისთვის მებრძოლთა 30-ეულშიც შევიდა. საინტერესოა, რომ მელოუნის პრიზის მფლობელი, 9 აპრილს, ESPN-ის პირდაპირ ეთერში გამოვლინდება.
სამწუხაროდ, წელს „სეტონ ჰოლს“ მამუკელაშვილივით წარმატებული სეზონი ვერ გამოუვიდა — ლიდერმა აშკარად კლუბზე მეტად გაიბრწყინა: ქართველმა ფორვარდმა 25 შეხვედრა ჩაატარა და ყველა სასტარტოში დაიწყო, მისი საშუალო შედეგიანობა კი 17 ქულას აჭარბებდა! კლუბისთვის ის იმდენად ძვირფასი ფიგურა გახდა, რომ ბოლოს წინა ტურში, კონექტიკუტის UCoon-თან, ნიუ ჯერსულმა კლუბმა უპრეცედენტო გადაწყვეტილება მიიღო — ბოლო 1 წლის განმავლობაში პირველად, დარბაზში 1700 მაყურებელი დაუშვეს, რათა მათ მამუკელაშვილთან და იმ კალათბურთელებთან დამშვიდობების საშუალება ჰქონოდათ, რომლებიც კლუბს ტოვებენ და NBA-ში მიდიან (ასეთი კიდევ 3 იყო, კლუბი ამ თამაშში მათ საზეიმოდ დაემშვიდობა). 2-მეტრიანი დისტანციის დაცვით განლაგებული მაყურებელი დარბაზში „მამუს“ სკანდირებდა. „სეტონ ჰოლმა“ ეს პაექრობა 58:69 წააგო, მაგრამ მამუკელაშვილმა ორმაგი დუბლი მიითვალა — 20 ქულა, 10 მოხსნა და 3 პასი. ამ ფონზე, სავსებით გასაგებია იმ მიმომხილველთა აზრი, რომლებსაც მიაჩნიათ, „სეტონ ჰოლს“ ძალიან გაუმართლა, მამუკელაშვილმა კიდევ ერთი სეზონით რომ გაახანგრძლივა მათთან თანამშრომლობა.
თავად კლუბი BIG EAST-ის კონფერენციაში მე-5 ადგილზე გავიდა და „მარტის სიგიჟედ“ წოდებული სტუდენტური ლიგის ფინალში, იგივე NCCA-ის ჩემპიონშიპში პირდაპირ ვერ მოხვდა, თუმცა ამ შანსს BIG EAST-ის ჩემპიონშიპში წარმატებული გამოსვლით ინარჩუნებდა — მინიმუმ, ორი შეხვედრა უნდა მოეგო, ანუ ფინალში გასულიყო. მიმომხილველები იმთავითვე მიიჩნევდნენ, რომ ეს ძნელი ამოცანა იყო, თუმცა ამბობდნენ, რომ ამ ძნელ საქმეში „მეკობრეთა“ („სეტონ ჰოლის“მეტსახელია) დახმარება მამუკელაშვილს ნამდვილად შეეძლო. „მეკობრეებმა“ ამოცანის შესრულება კარგადაც დაიწყეს — კონფერენციის ჩემპიონშიპში მეოთხედფინალიდან ჩაებნენ და ნიუ იორკის სახელოვან „მედისონ სქვერ გარდენში“ „სენტ ჯონსს“ 77:69 მოუგეს, ოვერტაიმში, დაძაბულ პაექრობაში. სამაგიეროდ, ქართველმა მორიგი ბენეფისი მოიწყო — კარიერაში ერთ-ერთი საუკეთესო მატჩი ჩაატარა და მორიგი ორმაგი დუბლიც მიითვალა — 20 ქულა, 11 მოხსნა და 4 პასი. ამ სეზონში ეს მისთვის მე-6 ორმაგი დუბლი იყო, მთლიანად კლუბში კი — მე-13, ამასთან, 10 ქულაზე მეტი, ზედიზედ, 14 თამაშში ჩააგდო. „მამუკელაშვილმა მეორე ტაიმში მხარზე შეგვისვა და ოვერტაიმში გაგვამარჯვებინა“ — მოგებული მატჩის შემდეგ ემოციებს და ქართველის კარგი თამაშით კმაყოფილებას ვერ მალავდა ნიუ ჯერსელთა მწვრთნელი კევინ ვილარდი. „ეს მარტია. უნდა გვახსოვდეს, რომ ახლა ყველა გუნდს შორის ანგარიში 0:0-ია. ჩვენ მატჩზე გამოვედით ერთადერთი მიზნით — ჩვენი მისია გამარჯვება და წინსვლა იყო.“ — დაამატა მის სიტყვებს მამუკელაშვილმა.
სამწუხაროდ, „სეტონ ჰოლი“ ნახევარფინალში ასეთივე განწყობით ვერ გავიდა „ჯორჯთაუნთან“, ვინც წინა წრეში გათამაშების უპირობო ფავორიტი, რეგულარულის საუკეთესო გუნდი და ზემოხსენებული ლიდერების მფლობელი „ვილანოვა“ გამოთიშა. ეს თამაში სანდრომაც შედარებით უფერულად ჩაატარა — 39 წუთში 8 ქულა, 10 მოხსნა და 5 პასი დააგროვა, მისი კლუბი კი, ბოლო 2.30 წუთში (ამ დროს ანგარიში თანაბარი იყო), დამარცხდა: 58:66.
ამით ნიუ ჯერსელებმა სეზონიც დაამთავრეს, თუმცა მამუკელაშვილს მთავარი ამბავი წინ ელოდება — ზაფხულში NBA-ს დრაფტი. დიდი იმედია, მისი დასრულების შემდეგ, NBA-ს მორიგი ქართველი შეემატება.
