ხათუნა ქვარცხავა
სსიპ ზუგდიდის აკაკი წერეთლის სახ. №1 საჯარო სკოლის ქიმიის წამყვანი მასწავლებელი
სამიზნე ცოდნის სამივე სახეზე (დეკლარატიული, პროცედურული, პირობისეული) ორიენტირება კონსტრუქტივიზმის ერთ-ერთი და გამორჩეული პრინციპია. ცოდნათა სამივე სახის აუცილებლობაზე არ დავობენ მარტივი მიზეზის გამო — აქსიომაა, მათი გათვალისწინების გარეშე ვერ ვიტყვით, რომ სწავლა-სწავლების პროცესი სწორად მიმდინარეობს.
თუ ქიმიაში ავიღებთ თემას (რამდენადმე ნაცნობ კონტექსტს) „ნივთიერებათა მრავალფეროვნება“, მაშინ შეგვიძლია ვიფიქროთ შემდეგ სამიზნე ცნებაზე, ქვეცნებასა და საკითხზე:
ნივთიერება – მჟავა ოქსიდი/მჟავა;
ფიზიკური და ქიმიური მოვლენა – მჟავა წვიმების წარმოქმნა;
მჟავა წვიმების გამომწვევი მიზეზები და თავიდან აცილების გზები.
ამ მოცემულობის შემთხვევაში, როგორ გავააქტიუროთ ცოდნის სამივე კატეგორია?
კომპლექსური დავალება მიჩნეულია იმ საშუალებად, რომელიც განაპირობებს, მოსწავლეთა საუკეთესო ინტერესების გათვალისწინებით, სასწავლო მიზნების მიღწევას. როცა ზემოთ აღნიშნულ თემაზე დავგეგმავთ კომპლექსურ დავალებას, საინტერესო პროცესის წარმართვისთვის, მრავალფეროვან რესურსებსა და სტრატეგიებს ვიყენებთ სიტუაციურად. განვიხილოთ 4 ისეთი შეკითხვა, რომელიც თემასთან ორგანულ კავშირშია.
⇒ შეკითხვა: რა გავლენას ახდენს მჟავა წვიმები გარემოზე?
კითხვაზე პასუხები, მოსალოდნელია, არაერთგვაროვანი, თუმცა ყველა პასუხი ფაქტობრივი მოცემულობისა იქნება. ამიტომ, ამ შემთხვევაში, ვეხებით დეკლარატიულ ცოდნას და ამით კიდევ ერთხელ გადამოწმდება, საკითხთან მიმართებით, მოსწავლეების მზაობა. სავარაუდოდ, ამ შეკითხვაზე დაბალი მზაობის მოსწავლეებსაც ექნებათ პასუხები. ეს უკვე განსაზღვრავს სასწავლო პროცესში მოსწავლეთა ჩართულობას, რაც გადამწყვეტი ფაქტორია ბავშვის პროგრესირების რთულსა და საპასუხისმგებლო გზაზე. ბუნებრივია, დეკლარატიული ცოდნის მნიშვნელობა მხოლოდ ამით არ ამოიწურება და აქვე დავძენ, რომ ამ ტიპის ცოდნის გარეშე სხვა სახეებს ვერ გავააქტიურებთ.
⇒ შეკითხვა: რა გავლენას ახდენს მჟავა წვიმები კულტურულ ძეგლებსა და შენობა-ნაგებობებზე?
ეს შეკითხვაც დეკლარატიული ცოდნის გააქტიურებას უწყობს ხელს და ზემოთ მოყვანილი სიტუაციის რამდენადმე გამეორება ხდება, ოღონდ, ამ შემთხვევაში, კიდევ ერთხელ აქცენტირება სამივე სახის მზაობის მოსწავლეებს უქმნის სასწავლო პროცესში მაქსიმალური ჩართულობის საფუძველს და ქიმია „დაუახლოვდება“ ტრანსფერის არეალებს ბავშვებისთვის. ამ შემთხვევაში, უკვე იცვლება სტერეოტიპული შეხედულება ქიმიაზე, როგორც თეთრ ფურცელზე წარმოდგენილ რთულ ინფორმაციაზე.
⇒ შეკითხვა: როგორ შეიძლება თავიდან იქნას აცილებული მჟავა წვიმები?
ამ შემთხვევაში, პროცედურული ცოდნის გააქტიურება იწყება და, იდეების გენერირების (ფუნქციური უნარი შემოქმედობითობაც იწყებს ჩამოყალიბებას) პარალელურად, სწავლა-სწავლება უაღრესად დინამიკური ხდება, რაც მოსწავლეებს ძალიან მოსწონთ. ამავე შეკითხვით აქტიურდება რამდენიმე ფუნქციური უნარი, ასევე, ეროვნული სასწავლო გეგმით გათვალისწინებული პრიორიტეტული თემა და ხელს უწყობს გლობალური კომპეტენციების გაუმჯობესებას.
⇒ შეკითხვა: თქვენი აზრით, ეკონომიკური აქტივობების პროცესები წარმოადგენს ქალაქში წარმოქმნილი ეკოლოგიური პრობლემებისა და კულტურული ძეგლების დაზიანების მიზეზს და წყაროს? დაასაბუთეთ თქვენი მოსაზრება.
ეს შეკითხვა ააქტიურებს ფუნქციურ უნარებს, გლობალურ კომპეტენციებსა და ჰოლისტური განვითარებისთვის იქმნება ნიადაგი. ამავე კითხვით შევძლებთ ე.წ. მაკროცნებათა გააქტიურებას, კერძოდ, შეგვიძლია ვიფიქროთ, ამ მიმართულებებით, როგორ ვაქციოთ მოსწავლეთა პასუხები:
♦კონსტრუქტად (მნიშვნელობის მინიჭება);
♦ ნარატივად (ინფორმაციის კონსტრუირება);
♦ კულტურულ მრავალფეროვნებად;
♦ მოდელად;
♦ კვლევად;
♦ სტრატეგიად;
♦ მოქალაქის პოზიციად;
♦ ინოვაციურ პროექტად.
მაკროცნებათა გააქტიურებით, იმის პერსპექტივა გვეძლევა, რომ მოსწავლემ საკითხი გაფართოებული აბსტრაქტის დონეზე ამოწუროს. რასაკვირველია, ეს დონე ადვილი მისაღწევი არაა, მაგრამ სასურველია და მისკენ სწრაფვა კიდევ უფრო მეტად აჩვენებს მოსწავლეს, რომ სკოლა და სწავლა არ წყდება მის ცხოვრებას.