ერთიანი ეროვნული გამოცდები 16 ივლისს ისტორიისა და ქიმიის გამოცდებით გრძელდება. ამ წუთებში მიმდინარეობს პირველი სესია, რომელზეც აბიტურიენტები ისტორიის გამოცდას აბარებენ, მეორე სესიაზე კი ქიმიის გამოცდისთვის გაივლიან რეგისტრაციას; მასწავლებლის გამოცდის მონაწილეები მათემატიკისა და სამოქალაქო განათლების გამოცდებს ჩააბარებენ.
გუშინ აბიტურიენტებს ისტორიის გამოცდა ჰქონდათ, ორ სესიად, ხოლო მასწავლებლის გამოცდებში მონაწილეებმა გეოგრაფიისა და ბიოლოგიის გამოცდები ცააბარეს – პირველი სესია გეოგრაფიას დაეთმო, მეორე – ბიოლოგიას.
საგამოცდო ცენტრებში გამოცხადდა 91%-მდე აბიტურიენტი, რაც შეეხება მასწავლებელთა გამოცხადებას, გეოგრაფიის გამოცდაზე 89%-ზე მეტი აპლიკანტი მივიდა, ხოლო ბიოლოგიაზე – 83%-მდე გამოსაცდელი.
დაგვიანების 9 შემთხვევა იყო, მიუხედავად არაერთი გაფრთხილებისა. შეფასებისა და გამოცდების ეროვნული ცენტრი სთხოვს ყველა გამოსაცდელს, არ დაიგვიანოს საგამოცდო ცენტრში მისვლა, წინააღმდეგ შემთხვევაში ის გამოეთიშება პროცესს.
ისევე, როგორც 2023 წელს, მასწავლებლის გამოცდის მონაწილეებს შორის წელსაც არიან ჩვილი ბავშვების დედები. შეფასებისა და გამოცდების ეროვნული ცენტრი პატარებისა და მათი მშობლების სიმშვიდეზე განსაკუთრებულად ზრუნავს – ჩვილებს რომ არ მოშივდეთ, კოორდინატორებს ისინი საგამოცდო ცენტრის ტერიტორიაზე შემოჰყავთ. დედები სექტორებს მცირე ხნით ტოვებენ, შემდეგ კი ისევ აგრძელებენ ტესტზე მუშაობას.
გისურვებთ წარმატებას!
