20 მაისი, ორშაბათი, 2024

მასწავლებლის ეროვნული პრემიის ფარგლებში განაცხადების მიღება იწყება

spot_img

2024 წლის მასწავლებლის ეროვნული პრემიის ფარგლებში განაცხადების მიღება 22 აპრილის დაიწყება 5 ივლისის ჩათვლით გაგრძელდება. აღნიშნულთან დაკავშირებით საქართველოს განათლების, მეცნიერებისა და ახალგაზრდობის მინისტრმა, გიორგი ამილახვარმა პრესკონფერენციაზე ისაუბრა:

გასულ წელს, საქართველოს მთავრობის გადაწყვეტილებით, ერთ-ერთი ყველაზე დამსახურებული და ღირსეული პროფესიის დაფასებისთვის, დავაწესეთ მასწავლებლის ეროვნული დღე, რომელიც იაკობ გოგებაშვილის დაბადების დღეს 27 ოქტომბერს, ყოველწლიურად, მთელი ქვეყნის მასშტაბით აღინიშნება.

კონკურსი წინა წელს პირველად ჩატარდა და მასში მასწავლებლების ჩართულობა საკმაოდ მაღალი იყო. წელს უკვე ვემზადებით რიგით მეორე კონკურსისთვის და 22 აპრილიდან ვიწყებთ პირველ ეტაპს განაცხადების მიღებას.

2024 წლის კონკურსი უფრო მასშტაბური იქნება, კიდევ უფრო მეტი პედაგოგი ჩაერთვება და საბოლოო ღონისძიებამდე, საქართველოს ყველა რეგიონსა და მუნიციპალიტეტში, სხვადასხვა წინასწარი აქტივობა გაიმართება, რაც უზრუნველყოფს კონკურსის მიმდინარეობის პროცესში სასკოლო საზოგადოების ჩართულობას. მოვუწოდებთ ყველა პედაგოგს, რომ იაქტიურონ. წელს გვექნება გარკვეული სიახლეები. კერძოდ, კონკურსი, შინაარსობრივად, მეტად იქნება დატვირთული.

აღსანიშნავია, რომ წელს, ისევე როგორც შარშან მასწავლებლის ეროვნული პრემიის ფარგლებში, სპეციალურად შერჩეული კომისიის მიერ, გამოვლინდება გამარჯვებულები, რომელთაც მასწავლებლის ეროვნული პრემია გადაეცემათ.

საქართველოს განათლების, მეცნიერებისა და ახალგაზრდობის სამინისტროში გამართულ პრესკონფერენციას, მედიასაშუალებების წარმომადგენლებთან ერთად, 200-ზე მეტი მასწავლებელი, მათ შორის, 2023 წლის მასწავლებლის ეროვნული პრემიის გამარჯვებულები ესწრებოდნენ.

მასწავლებლის ეროვნული დღე ყოველი წლის 27 ოქტომბერს – ქართველი პედაგოგის, საქართველოში მეცნიერული პედაგოგიკის ფუძემდებლის, პუბლიცისტის, საბავშვო მწერლისა და საზოგადო მოღვაწის იაკობ გოგებაშვილის დაბადების დღეს აღინიშნება. ამასთან, ყოველწლიურად, საზოგადოებისა და განათლების სისტემის განვითარებაში შეტანილი განსაკუთრებული წვლილისთვის, ღვაწლმოსილ პედაგოგებს გადაეცემა მასწავლებლის ეროვნული პრემია – სპეციალურად შექმნილი სამკერდე ნიშანი და ფულადი ჯილდო, 10 000 ლარის ოდენობით.

ერთიანი ეროვნული გამოცდები

ბლოგი

კულტურა

მსგავსი სიახლეები