იგეგმება თუ არა პროფესიული განათლების სტუდენტების სამხედრო სამსახურის გადავადება

საკმაოდ ბევრი ახალგაზრდა პროფესიულ განათლებაზე უარს ამბობს იმ მიზეზით, რომ სწავლის პერიოდში სავალდებულო სამხედრო სამსახურის მოხდა უწევთ. რა გეგმები აქვს სამინისტროს ამ მიმართულებით და საერთოდ განიხილება თუ არა პროფესიული სასწავლებლის სტუდენტის სავალდებულო სამსახურის გადავადება სწავლის პერიოდში? მინისტრის მოადგილე თამარ ქიტიაშვილი აცხადებს, რომ: „ეს საკითხი მართლაც პრობლემურია სტუდენტებისთვის და   ერთგვარი განმზიდავი გარემოებაა ზოგადად პროფესიული განათლების მიღების გადაწყვეტილებისას. საკითხი აუცილებლად უნდა მოგვარდეს და პროფესიული განათლების სტუდენტებსაც უნდა გადაუვადდეთ სავალდებულო სამხედრო სამსახური. ამ ეტაპზე, სხვადასხვა სამინისტროსთან მიმდინარეობს მოლაპარაკება, თუ რა გზით და რა ფორმით შეიძლება წარიმართოს პროცესი უმტკივნეულოდ, ისე, რომ არ დაზარალდეს სამხედრო სამსახურის ინტერესები.“