მეოთხე წელია, რაც ეკატერინე პაპუაშვილი, დედოფლისწყაროს მუნიციპალიტეტის სოფელ სამრეკლოს საჯარო სკოლის ექიმია. მისი უმთავრესი მოვალეობა იმ სანიტარიულ-ჰიგიენური და სამკურნალო-პროფილაქტიკური ღონისძიებების განხორციელებაა, რომლებიც ხელს უწყობს მოსწავლეებში ჯანმრთელობის შენარჩუნებას, ფიზიკური განვითარების სრულყოფას. ექიმი, დილით, სკოლაში მისვლისთანავე, ამოწმებს რამდენადაა დაცული სკოლის შიდა თუ გარე სივრცეში ჰიგიენის ნორმები. მოსწავლეებთან მუდმივი კომუნიკაციით იღებს ინფორმაციას მათი ჯანმრთელობის შესახებ, რაც ამარტივებს ამა თუ იმ პრობლემის აღმოფხვრას.
ეკატერინე პაპუაშვილი:
„საბედნიეროდ, ჩემი სკოლის ექიმობის პერიოდში მოსწავლეებში ჯანმრთელობის დარღვევის რაიმე სერიოზული შემთხვევა არ მქონია.
სკოლაში, ყოველწლიურად, ტარდება მოსწავლეთა ჯანმრთელობის მონიტორინგი, რომელიც გულისხმობს მათი ფიზიკური მონაცემების შემოწმებას, კერძოდ: მხედველობა, სიმაღლე, წონა რამდენად შეესაბამება ნორმის ფარგლებს. გადახრის შემთხვევაში, ვატყობინებ მშობელს, რათა დროულად აღმოიფხვრას პრობლემა. ასევე, ვაძლევ სხვადასხვა სახის რეკომენდაციებს სკოლის გარეთ დღის რეჟიმის დაგეგმვის შესახებ, ვუხსნი პედაგოგებს, როგორ უნდა ისხდნენ ბავშვები მერხებთან, ვამოწმებ მერხების შესაბამისობას ასაკსა და სიმაღლესთან.
მოსწავლეები, ძირითადად, თავის ტკივილს და ზოგად სისუსტეს უჩივიან, რაც, ხშირ შემთხვევაში, უკავშირდება გადატვირთულ რეჟიმს, ასევე, ხშირია მუცლის ან კბილის ტკივილი, გულის ფრიალი, რომელიც, ძირითადად, ემოციური ფონითაა გამოწვეული; ხშირია ეზოში თამაშის დროს მიღებული მცირე ტრავმული შემთხვევები“.
სოფელ სამრეკლოს საჯარო სკოლაში 185 მოსწავლე სწავლობს, მათი სრულფასოვანი სწავლებისა და ჰარმონიული განვითარებისთვის 28 პედაგოგი ზრუნავს. სკოლას ჰყავს 5 სსსმ მოსწავლე. სპეცმასწავლებელი, ასისტენტთან ერთად, აქტიურადაა ჩართული სასწავლო პროცესში. სსსმ მოსწავლეებისთვის გამოყოფილი რესურსოთახი აღჭურვილია ისეთი ინვენტარითა და ნივთებით, რომლებიც ხელს უწყობს მათ განვითარებას. ეტლით მოსარგებლე მოსწავლე სკოლას არ ჰყავს, თუმცა, საჭიროების შემთხვევაში, მათთვის გარემო ადაპტირებულია. სკოლის ექიმის კაბინეტი აღჭურვილია თანამედროვე სამედიცინო ინვენტარითა და პირველადი დახმარების მედიკამენტებით.
როგორც ყველგან, აქაც, ერთ-ერთი სერიოზული პრობლემა მოსწავლეებისთვის ჯანსაღი კვებითი გარემოს შექმნაა. ნუტრიციოლოგების რეკომენდაციები მოზარდის ყოველდღიური რაციონის შესახებ საკმაოდ ვრცელია. ის, რომ საკვები მოზარდს ამარაგებს ორგანიზმისთვის აუცილებელი ენერგიით, რაც ხელს უწყობს მის სრულფასოვან ფუნქციონირებას და დიდ გავლენას ახდენს ჯანმრთელობაზე, თეორიულად ყველამ კარგად იცის. თუმცა, მოზარდები ხშირად უპირატესობას მაინც არაჯანსაღ საკვებს ანიჭებენ. ამ მხრივ, არც სამრეკლოს საჯარო სკოლის მოსწავლეები არიან გამონაკლისები. „მოსწავლეები დღის უმეტეს ნაწილს სკოლაში ატარებენ, აქედან გამომდინარე, მათ უწევთ მზა და არაჯანსაღი საკვების მიღება. როგორც ცნობილია, მოზარდები მიდრეკილნი არიან ისეთი პროდუქტებისკენ, როგორიცაა: ჩიფსი, ბურგერი, ენერგეტიკული სასმელი და ა.შ.
ჩემი რჩევაა, დილა დაიწყონ ჯანსაღი საუზმით. მიირთვან ხილი და დღის განმავლობაში მიიღონ ბევრი წყალი. სკოლაში უნდა ატარონ ისეთი საკვები, რომელიც დიდი რაოდენობით შეიცავს რკინას, რაც ააქტიურებს გონებრივ შესაძლებლობებს“.
სკოლის ექიმი მოსწავლეებს პირადი ჰიგიენის დაცვის, ჯანსაღი ცხოვრების წესის, საჭირო და სავალდებულო იმუნიზაციის მნიშვნელობისა და თვითშეგნების ამაღლების გარდა, ისეთ მნიშვნელოვან საკითხებზეც ესაუბრება, როგორიცაა ძალადობა და ბულინგი. თუმცა ამბობს, რომ მსგავს შემთხვევებს სკოლაში ადგილი არასოდეს ჰქონია.
სამრეკლოს საჯარო სკოლის ექიმი საკუთარ პროფესიულ განვითარებაზე მუდმივად ზრუნავს. კვალიფიკაციის ამაღლების, პროფესიული უნარ-ჩვევების გაღრმავება-განახლების მიზნით, ქალბატონი ეკატერინე არაერთ საინტერესო ტრენინგს ესწრება, რათა მედიცინის სიახლეებს არ ჩამორჩეს და ახალი მეთოდები პრაქტიკაში გამოიყენოს. „ყოველწლიურად, საქართველოში, სკოლის ექიმებისთვის სავალდებულო ტრენინგი ტარდება, რომელიც ცოდნის ამაღლებას ემსახურება. აღნიშნულ ტრენინგებს აქტიურად ვესწრები. მუდმივად ვზრუნავ პროფესიულ განვითარებაზე. ჩვენ ყველამ ერთად უნდა შევძლოთ, ქვეყანას ჰყავდეს ჯანსაღი მომავალი თაობა,“ – ამბობს ქალბატონი ეკატერინე.
თამარ ყოჩიაშვილი, სკოლის დირექტორი: „ჩვენი სკოლის ექიმი თავისი საქმის პროფესიონალია. მუდამ საჭირო დროს და ადგილზეა, მუდამ მოწოდების სიმაღლეზე. სასკოლო საზოგადოების თითოეულ წევრს გვაქვს მისი იმედი, ძალიან გვიყვარს და ვაფასებთ“.
თეკლა წიკლაური, X კლასის მოსწავლე: „სკოლაში აუცილებელია, იყოს უსაფრთხო და კომფორტული გარემო ბავშვებისთვის. ეკა ექიმი ის ადამიანია, რომელიც ზრუნავს თითოეული ჩვენგანის უსაფრთხოებაზე. ის ძალიან კარგი ექიმია. მისი ჩვენდამი თბილი დამოკიდებულება აფერადებს სასკოლო გარემოს“.
ანი ბოსტოღანაშვილი, XII კლასის მოსწავლე: „მოსწავლეთათვის და სკოლაში დასაქმებულ პირთათვის ჯანსაღი და უსაფრთხო გარემოს უზრუნველსაყოფად სკოლის ექიმი უდავოდ საჭიროა. ჩვენი სკოლის ექიმი გამოირჩევა მზრუნველობითა და ყურადღებით. ეკა ექიმი განათლებული და თავისი საქმის კარგი მცოდნეა. ის ყველა იმ თვისებითაა დაჯილდოებული, რომელიც ექიმისთვის უპირობოდ აუცილებელია“.
მოამზადა მაკა ყიფიანმა
