2022 წლის მასწავლებლის ეროვნული ჯილდოს 5 ფინალისტიდან ჯილდოს მფლობელი როლანდ შავაძე გახდა. ახალგაზრდა პედაგოგი ხულოს მუნიციპალიტეტის სოფელ მეკეიძეების საჯარო სკოლის ინგლისური ენის მასწავლებელია. გამარჯვებულს ფულადი პრიზის სახით, კამპანიის გენერალური სპონსორისგან – „გუდავაძე-პატარკაციშვილის“ ფონდისგან 15 000 ლარი გადაეცა.
გუდავაძე-პატარკაციშვილის ფონდი უკვე მეექვსე წელია აქტიურად უჭერს მხარს აღნიშნულ პროექტს და ერთ-ერთი პირველი ორგანიზაციაა, რომელმაც სურვილი გამოთქვა კონკურსის პარტნიორი გამხდარიყო და საკუთარი წვლილი შეეტანა მასწავლებლის როლის პოპულარიზაციაში. ფონდის დაარსების დღიდან, იგი მასწავლებლის ეროვნული ჯილდოს ძირითადი სპონსორი და დამფინანსებელია. 6 წლის განმავლობაში გპფ-ს მიერ გამოყოფილმა ფინანსურმა ინვესტიციამ გადააჭარბა 650 000 ათას ლარს, საიდანაც 80 000-ზე მეტი ლარი პროექტის გამარჯვებულთა საპრიზო ფონდს წარმოადგენს.
„გვიხარია, რომ პროექტის გამარჯვებული წელსაც განსხვავებული, საკუთარ საქმეზე შეყვარებული პედაგოგი გახდა. სწორედ ისეთი ადამიანი, რომლიც, თავის მხრივ, მისაბაძია სხვა პედაგოგებისთვისაც. გვახარებს ისიც, რომ ყოველწლიურად იზრდება მონაწილე მასწავლებლების რაოდენობა, წელსაც საინტერესო და გამორჩეული ათეული ჰყავდა კონკურსს. თითოეული მათგანი გმირია თავის საქმეში და დღეიდან სხვა პედაგოგებსაც გაუზიარებენ ამ ცოდნასა და გამოცდილებას.
ჩვენთვის კონკურსი ერთ-ერთი პირველი პროექტია, რომელსაც მხარი დავუჭირეთ და კონკურსისთვისაც ერთ-ერთი პირველი სპონსორი ვიყავით იმ დროს. თუმცა დროის ამ მოკლე მონაკვეთმა გვაჩვენა, რომ განათლებაში ჩადებული ინვესტიცია რთული, მაგრამ ერთ-ერთი ყველაზე სწორი გზაა წარმატებული ქვეყნის მშენებლობისთვის. დღეს უკვე იკვეთება ის კონტურები თუ რა წარმატებული შედეგები მოაქვს ჩვენს ფინანსურ თუ ადამიანურ ინვესტიციას. ჯილდოსა და სხვა პროექტების მხარდაჭერით, ვხედავთ იმ შედეგს, თუ როგორი პოპულარული ხდება მასწავლებლის პროფესია, რა სიახლეებს ნერგავენ ისინი სკოლებში, ახალგაზრდებში როგორ იცვლება დამოკიდებულება მომავალი პროფესიის მიმართ, რა კადრი შედის შემდეგ უნივერსიტეტიდან საკლასო ოთახში და, საერთო ჯამში, როგორ ტრანსფორმირდება პედაგოგის როლიც და საქმიანობაც. ეს სწორედ ის ტრანსფორმაცია და ცვლილებაა, რაც ქვეყანას სრულიად ახალ პედაგოგს მისცემს, იმ უალტერნატივო რესურსს, რომელმაც განათლებული და მოაზროვნე მომავალი უნდა აღზარდოს.“ – აღნიშნავს გუდავაძე პატარკაციშვილის ფონდის დირექტორი ზურაბ კერვალიშვილი.
წლევანდელი მასწავლებლის ეროვნული ჯილდოს ათი ფინალისტიდან ჟიურიმ 5 მონაწილე შეარჩია, რომლებსაც ფონდმა და პროექტის პარტნიორებმა სხვადასხვა პრიზები გადასცეს. წლევანდელი ფინალისტები გახდნენ:
- მიხეილ ლაბარტყავა – დამოუკიდებელი საერო გიმნაზიის ,,შავნაბადა” ქიმიის მასწავლებელი;
- ნანა მგალობლიშვილი – ჩოხატაურის ყოვლადწმიდა ღვთისმშობლის სახელობის სამრევლო სკოლის ქართული ენისა და ლიტერატურის მასწავლებელი;
- როლანდ შავაძე – ხულოს მუნიციპალიტეტის სოფელ მეკეიძეების საჯარო სკოლის ინგლისური ენის მასწავლებელი;
- სოფიო ძიგრაშვილი – ქუთაისის N33 საჯარო სკოლის სპეციალური მასწავლებელი;
- ირა ძირკვაძე – წალკის მუნიციპალიტეტის სოფელ გუმბათის საჯარო სკოლის ქართული ენისა და ლიტერატურის და ინგლისური ენის მასწავლებელი.
კონკურსის შესახებ:
მასწავლებლის ეროვნული ჯილდო, განათლების კოალიციის, განათლებისა და მეცნიერების სამინისტროს და მასწავლებელთა პროფესიული განვითარების ეროვნულ ცენტრს შორის გაფორმებული მემორანდუმის საფუძველზე, 2017 წლის 13 მაისს დაწესდა. აღნიშნული ინიციატივა საქართველოში უკვე მეექვსედ ხორციელდება და ის მასწავლებელთა პოპულარიზაციისკენ მიმართული გლობალური კამპანიის – „The Global Teacher Prize“ ნაწილია.
გპფ პროექტის გენერალური სპონსორია 2017 წლიდან. ასევე პროექტის მხარდამჭერები არიან: ოქროს სპონსორი – ლიბერთი ბანკი, განათლების და მეცნიერების სამინისტრო, მასწავლებელთა პროფესიული განვითარების ეროვნული ცენტრი, ილიას სახელმწიფო უნივერსიტეტი, EPAM Georgia, კონსულტაციის და ტრენინგის ცენტრი (ctc), პირველი არხი|ტელესკოლა და ციფრულ-კრეატიული სააგენტო „მავერიკი“.
ფონდის შესახებ
გუდავაძე-პატარკაციშვილის ფონდი, 2017 წელს, ქალბატონ ინა გუდავაძის ინიციატივით შეიქმნა და მისი მისიაა, ხელი შეუწყოს ქვეყანაში განათლების სისტემის განვითარებას. იგი მიზნად ისახავს განათლების საერთო ხარისხის ამაღლებას, განათლების სტანდარტების გაუმჯობესებასა და მასზე ხელმისაწვდომობის გაზრდას. საკუთარი საქმიანობითა და განათლების სექტორში ინვესტირებით „გპფ“ მოწოდებულია, შეიქმნას საჯარო და კერძო პარტნიორობის წარმატებული მოდელი ეროვნული განათლების სისტემის მხარდასაჭერად. ბოლო 4 წლის განმავლობაში, ფონდის მიერ, დაფინანსდა 25-ზე მეტი საგანმანათლებლო პროექტი. „გპფ-ს“ ფინანსური ინვესტიცია განათლების სექტორში თითქმის 3.5 მლნ. ლარს შეადგენს.
ფონდის მიერ დაფინანსებული პროექტების თანადამფინანსებლები და პარტნიორები არიან ისეთი ორგანიზაციები და ინსტიტუტები, როგორებიცაა: ათასწლეულის გამოწვევის ფონდი – საქართველო, საქართველოს გაეროს ბავშვთა ფონდი, USAID, UNDP, საქართველოს განათლებისა და მეცნიერების სამინისტრო, მასწავლებლის პროფესიული განვითარების ცენტრი, Konrad Adenauer Stiftung, საქართველოს პარლამენტის ევროპასთან ინტეგრაციის კომიტეტი, საინფორმაციო ცენტრი ნატოსა და ევროკავშირის შესახებ, Public Institution Educational Debate Centre in Lithuania, ილიას სახელმწიფო უნივერსიტეტი, სამცხე-ჯავახეთის სახელმწიფო უნივერსიტეტი, ივანე ჯავახიშვილის სახელობის თბილისის სახელმწიფო უნივერსიტეტი, გორის, ზუგდიდის, თელავის, ახალციხის, სოხუმის, ბათუმის სახელმწიფო უნივერსიტეტები და სხვა ორგანიზაციები.
