სალომე გოჩოლეიშვილი
ბოლნისის მუნიციპალიტეტის სოფ. ქვემო არქევანის საჯარო სკოლის ქართული ენის კონსულტანტი მასწავლებელი
ბოლნისის მუნიციპალიტეტის სოფელ ქვემო არქევანის საჯარო სკოლაში 2011 წლიდან ვმუშაობ ქართული, როგორც მეორე ენის მასწავლებლად. ასევე, როგორც კონსულტანტ-მასწავლებელი, მასწავლებელთა პროფესიული განვითარების ეროვნულ ცენტრთან (TPDC) ვთანამშრომლობ, „არაქართულენოვანი სკოლების მხარდაჭერის“ პროგრამის ფარგლებში.
განათლებით საერთაშორისო ურთიერთობათმცოდნე ვარ. 2011 წელს დავამთავრე ივ. ჯავახიშვილის სახელობის თბილისის სახელმწიფო უნივერსიტეტის ბაკალავრიატი, საერთაშორისო ურთიერთობების სპეციალობით. 2015 წელს კი, ამავე უნივერსიტეტში, მომენიჭა დიპლომატიისა და საერთაშორისო პოლიტიკის მაგისტრის ხარისხი. ეთნიკური უმცირესობებით დასახლებულ რეგიონში ქართული, როგორც მეორე ენის მასწავლებლად მუშაობის დაწყება განაპირობა ჩემმა სურვილმა, მცირე წვლილი შემეტანა ქვეყნის სახელმწიფოებრივი სტაბილურობის განმტკიცების საქმეში. ქართულს უკვე თერთმეტი წელია ვასწავლი და ამ პერიოდის განმავლობაში არასოდეს მინანია მასწავლებლის პროფესიაში შესვლა. მუშაობის დაწყებიდან მალევე აღმოვაჩინე, რომ ეს სწორედ ის საქმეა, რომელსაც მუდამ სიყვარულითა და ხალისით ვაკეთებ. სტატუსით წამყვანი მასწავლებელი სიახლეების ძიებას კვლავ ვაგრძელებ. 2018 წელს მომენიჭა განათლების ადმინისტრირების მაგისტრის ხარისხი ილიას სახელმწიფო უნივერსიტეტში. სწავლის გაგრძელებას სადოქტორო საფეხურზეც განათლების მიმართულებით ვგეგმავ.
ქვემო არქევანის საჯარო სკოლამ თავიდანვე კარგად მიმიღო ახალბედა მასწავლებელი. სამუშაო გარემო ნამდვილად კომფორტულია ჩემთვის, რადგან კოლეგებს ერთმანეთთან უშუალო და მეგობრული ურთიერთობები გვაქვს. რა თქმა უნდა, იყო სირთულეებიც და წინააღმდეგობებიც. თუმცა, ახლა თამამად შემიძლია ვთქვა, რომ როგორც სასკოლო საზოგადოებისგან, ისე ადგილობრივი თემისგან სრული ნდობა და მხარდაჭერა მაქვს.
ჩემი ინიციატივით, ქვემო არქევანის საჯარო სკოლაში ბევრი სიახლე დაინერგა. განვახორციელე ისეთი პროექტები და ღონისძიებები, რომლებიც ორიენტირებული იყო თემში სახელმწიფო ენის პოპულარიზაციასა და არაფორმალური განათლების ხელშეწყობაზე. ვცდილობ, ჩემი მოსწავლეები დამოუკიდებელი ცხოვრებისთვის შევამზადო. პროექტებისა და სხვა საგანმანათლებლო ღონისძიებების განხორციელებით, ხელს ვუწყობ მოსწავლეებში დემოკრატიული ღირებულებებისა და გამჭოლი კომპეტენციების განვითარებას.
განათლების სამინისტროს „თავისუფალი გაკვეთილების“ პროგრამის ფარგლებში, განვახორციელე პროექტი „მე-ლიდერი“, რომელიც მოსწავლეებს დაეხმარა ლიდერობის პრობლემის გადაჭრის და მოქალაქეობრივი აზროვნების უნარების განვითარებაში. მსგავსი პროექტის „ლიდერ გოგონათა კლუბი“ მიზანს კი წარმოადგენდა ქვემო არქევანის საჯარო სკოლის მოსწავლე გოგონებისთვის ცნობიერების ამაღლება ადამიანის უფლებების შესახებ და პიროვნული განვითარების, განათლებისა და დასაქმების საჭიროების ჩვენება.
განათლების სამინისტროს „სასკოლო აქტივობების ხელშეწყობის“ პროგრამის ფარგლებში, განვახორციელე პროექტი „ქსოვის კლუბი“, რომლის დასრულების შემდეგ, მოსწავლეებმა განავითარეს შემოქმედებითი, თვითგამოხატვის, შრომითი და მეწარმეობის უნარები.
მოსწავლეებში კულტურული განსხვავებულობისადმი მზაობისა და მრავალენობრივი კომპეტენციის განვითარების მიზნებს ისახავდა ფრანგული ინსტიტუტის მხარდაჭერით განხორციელებული პროექტი „ენების ევროპული დღე“. ღონისძიების ფარგლებში, ქვემო არქევანის საჯარო სკოლაში, მოეწყო პოსტერების გამოფენა, ჩატარდა სახალისო ვიქტორინა და ქვიზი, გაიმართა კარაოკე.
ორგანიზაცია „სოციალური სამართლიანობის ცენტრის“ მხარდაჭერით, განვახორციელე პროექტი „ეკოგაკვეთილები“, რომელიც მიზნად ისახავდა გარემოსდაცვითი გამოწვევების შესახებ მსმენელთა ცნობიერების ამაღლებას.
ჩემი ინიციატივითა და ხელმძღვანელობით, 2019 წლიდან, ქვემო არქევანის საჯარო სკოლა ჩართულია eTwinning-ის ევროპელ მასწავლებელთა და სკოლების დამეგობრების პროგრამაში. საერთაშორისო პროექტებში ჩართულობა მოსწავლეებს ეხმარება თანამშრომლობის, შემოქმედებითი აზროვნების, მრავალენობრივი კომპეტენციების და ინფორმაციულ-საკომუნიკაციო ტექნოლოგიების გამოყენების უნარების განვითარებაში.
ვფიქრობ, მოსწავლეების სოციალური და სამოქალაქო კომპეტენციის განვითარების და მომავალში ძლიერი სამოქალაქო საზოგადოების ჩამოყალიბების საუკეთესო გზაა სკოლაში ისეთი სოციალური პროექტების განხორციელება, რომლებიც სოციუმში არსებულ რეალურ საჭიროებებზეა მორგებული და გარემოს გაუმჯობესება-გარდაქმნისკენ მიმართული.
ორგანიზაცია „ორბელიანი-საქართველოს“ მხარდაჭერით, ჩემ მიერ განხორციელებული პროექტი „ისტ-ის შემსწავლელთა კლუბი“ მიზნად ისახავდა, ქვემო არქევანში მცხოვრებ ახალგაზრდებს ესწავლათ ინფორმაციული და საკომუნიკაციო საშუალებების გამოყენება, დემოკრატიული მმართველობის საფუძვლები. ამავე ორგანიზაციის დახმარებით, განვახორციელე ვიდეოპროექტი „ჩემი წარმატების გზა“, რომელიც მიზნად ისახავდა საქართველოს სახელმწიფო უნივერსიტეტებში სწავლის პოპულარიზაციას ეროვნული უმცირესობების წარმომადგენელ ახალგაზრდებში.
რაც შეეხება უშუალოდ პრაქტიკულ საქმიანობას, ჩემი გაკვეთილი დემოკრატიული სწავლა-სწავლების პროცესია, რომელშიც თითოეულ მოსწავლეს თვითგამოხატვის შეუზღუდავი თავისუფლება აქვს. ქართული ენის გაკვეთილს, ხშირად, მოსწავლეებთან დიალოგის რეჟიმში წარვმართავ. სააზროვნო და დამხმარე შეკითხვების დასმით, ვზრდი მოსწავლეთა ჩართულობას სასწავლო პროცესში და ვახალისებ მათ, გაბედულად გამოხატონ საკუთარი აზრი. გაკვეთილი მოიცავს კითხვა-პასუხის, დიალოგის, დისკუსიის, როლური თამაშების აქტივობებს, რაც ეხმარება მოსწავლეს, გამოიყენოს ვერბალური ინტერაქცია, როგორც კომუნიკაციის დამყარების მთავარი საშუალება. დიდ ყურადღებას ვუთმობ და ვახალისებ მოსწავლეებში შემოქმედებითი უნარების განვითარებას. მოსწავლეები თავად ქმნიან გაკვეთილის თემასთან დაკავშირებულ სასწავლო რესურსებსა და თვალსაჩინოებებს. მაგალითად, სქემებს, ილუსტრაციებს ტექსტისთვის, საინფორმაციო ბროშურებს, პოსტერებს, მისალოც ბარათებს, კულინარიულ რეცეპტთა კრებულს და ა.შ.
თუ შევადარებთ ქვემო არქევანის საჯარო სკოლაში მუშაობის პირველ და მიმდინარე წელს, თამამად შემიძლია ვთქვა, რომ მოსწავლეთა მოტივაცია, ქართული ენის შესწავლის მიმართ, საგრძნობლად გაიზარდა. დღეისათვის, მოსწავლეთა უმეტესობა სრულად აცნობიერებს სახელმწიფო ენის ცოდნის საჭიროებას მათ ყოველდღიურობაში და იმას, თუ რა დიდი მნიშვნელობა აქვს ქართული ენის სათანადო დონეზე ფლობას მათი სწავლისა და დასაქმებისთვის.
მნიშვნელოვანია, რომ მოსწავლეები სკოლის კედლებში მიღებულ ცოდნას აქტიურად იყენებდნენ ყოველდღიურობაში. ჩემი მოსწავლეები ხშირად აღმოჩნდებიან ხოლმე თარჯიმნის როლში და სხვებს ეხმარებიან კომუნიკაციის წარმართვაში სამედიცინო დაწესებულებებში ვიზიტისას, დოკუმენტებთან დაკავშირებული საქმეების მოგვარებისას და სხვა მსგავს შემთხვევებში, როდესაც ქართული ენის ცოდნის საჭიროება დგება.
რაც შეეხება კოლეგებთან თანამშრომლობას, ადგილობრივ მასწავლებლებს პროფესიულ და კარიერულ წინსვლაში ვეხმარები: ვუძღვები სახელმწიფო ენის შემსწავლელ კურსებს ეროვნული უმცირესობების წარმომადგენელი მასწავლებლებისთვის, ვატარებ სამუშაო და საკონსულტაციო შეხვედრებს და ა.შ. ვცდილობ, ვიყო მასწავლებელი, რომლის საქმიანობა სცდება საკლასო სწავლების ვიწრო ფოკუსს. აქტიურად ვარ ჩართული როგორც სასკოლო ცხოვრებაში, ისე საზოგადოებრივ საქმიანობაში და უწყვეტი განათლების პროცესში.
