რუბრიკის „ქართველი სტუდენტები უცხოეთში“ სტუმარია საბა ხელაძე, Francis Marion university-ს ბიზნესის მენეჯმენტის და მარკეტინგის ფაკულტეტის IV კურსის სტუდენტი
მადლობელი ვარ, რომ მაქვს შესაძლებლობა, თქვენს მკითხველს გავაცნო ჩემი თავი. შევეცდები, არაფორმალურ ფორმატში გიამბოთ ჩემზე, თუ როგორ შევძელი ამერიკის შეერთებულ შტატებში ჩამოსვლა და განათლების მიღება.
საქართველოში განათლება მივიღე წყალტუბოს მუნიციპალიტეტის მამია ფანცულაიას სახელობის მე-2 საჯარო სკოლაში. თითოეულ მასწავლებელს დიდი წვლილი მიუძღვის ყველა იმ წარმატებაში, რომელსაც წლების განმავლობაში მივაღწიე. სკოლა დამეხმარა, გამეცნო ძალიან ბევრი საინტერესო პროფესიონალი, ყველა სფეროდან, რამაც განაპირობა ჩემი ინტერესი, სხვადასხვა პროექტებში მიმეღო მონაწილეობა. 15 წლის ასაკიდან დავიწყე არასამთავრობო ორგანიზაციებთან ერთად მუშაობა (AIESEC, ევროპულ-ქართული უნივერსიტეტი, ამერიკული კუთხე და სხვ.).
ლიდერთა გაცვლითი პროგრამა და ჩემი ამერიკული ოჯახი
FLEX-ის პროგრამაში გამარჯვებამ განაპირობა მომავალი წარმატებები, რამაც ჩემი ცხოვრება მკვეთრად შეცვალა. ამერიკაში წამოსვლა ძალიან დიდი წინ გადადგმული ნაბიჯი იყო ჩემს ცხოვრებაში. ყოველთვის მქონდა ინტერესი, მესწავლა სხვადასხვა ქვეყნის კულტურა და წესები, რათა გამეუმჯობესებინა როგორც პირადი ცნობიერება, ასევე მათთვის გამეცნო ჩემი ქვეყანა. ამერიკა მულტიკულტურული ქვეყანაა, სადაც შევხვდი და გავიცანი ძალიან ბევრ საინტერესო ადამიანი, მსოფლიოს თითქმის ყველა ქვეყნიდან. ამ ყველაფერმა მომცა შესაძლებლობა, ცხოვრებისთვის განსხვავებული პერსპექტივით შემეხედა.
თუ გინდა გახდე ფლექსის სტუდენტი, ერთადერთი რჩევა, რაც შემიძლია მივცე მოსწავლეებს, ის არის, რომ, პირველ რიგში, მათ უნდა გამოხატონ სხვადასხვა კულტურისადმი ინტერესი. ფლექსის ფინალისტობისთვის არ არსებობს ერთი კონკრეტული ფორმულა, ჩვენ ყველა განვსხვავდებით პიროვნულად და სწორედ ეს ხდის ფლექსს, და ჩვენს ყოველდღიურ ცხოვრებას, საინტერესოს.
ბედნიერი ვარ, რომ გამიმართლა და საუკეთესო ამერიკული ოჯახი შემხვდა. მთელი წლის განმავლობაში მეხმარებოდნენ, რათა შევჩვეოდი ამერიკულ კულტურას, ძალიან გამიადვილეს ადაპტირება ახალ გარემოსთან, ყოველდღიურობასთან. ამერიკაში ჩემი მეორედ ჩამოსვლის შემდეგ, ამ ოჯახში ვიცხოვრე ორი წელი და შემდეგ გადავწყვიტე, დამოუკიდებლად მეცხოვრა, ზუსტად ისე, როგორც თითქმის ყველა სხვა ამერიკელი სტუდენტი, რათა დამეგროვებინა უფრო მეტი გამოცდილება. დღესდღეობით, ძალიან კარგი ურთიერთობა მაქვს ბურკეტების ოჯახთან — ის ჩემი მეორე ამერიკული ოჯახია.
ამერიკული საუნივერსიტეტო განათლება
ამჟამად ვსწავლობ ფრენსის მერიონის სახელობის უნივერსიტეტის ბიზნესის მენეჯმენტისა და მარკეტინგის ფაკულტეტზე. ამერიკული უნივერსიტეტები საერთაშორისო სტუდენტებს მრავალი სახის სტიპენდიას სთავაზობენ, ეს შეიძლება იყოს აკადემიურიც და ასევე, სპორტულიც. დიდი მნიშვნელობა ენიჭება ფიზიკის, ინჟინერიის და მათემატიკის სფეროებს, მაგრამ არის უნივერსიტეტები, რომლებსაც მხოლოდ სპორტული ან მხოლოდ აკადემიური დაფინანსებები აქვთ, აგრეთვე უნივერსიტეტები, რომლებსაც საერთაშორისო სტუდენტებისთვის არანაირი სახის დაფინანსება არ აქვთ. შესაბამისად, თუ ხარ სტუდენტი და ცდილობ ამერიკის შეერთებულ შტატებში სწავლას, ჩემი რჩევა იქნება, რომ ინფორმაციის მოძიება ადრევე დაიწყო, რათა საჭირო დაფინანსების მოპოვების უფრო დიდი შანსი გქონდეს. უნივერსიტეტების უმეტესობა არ აფინანსებს საცხოვრებელს და შესაბამისად, უნდა წარადგინო ფინანსური დოკუმენტი, რომელიც დაადასტურებს, რომ გაქვს ფინანსური შესაძლებლობა, საკმარისი თანხა საცხოვრებლისა და საკვებისთვის.
ამერიკის უნივერსიტეტი ძალიან საინტერესოა იმით, რომ აქ, ერთი შეხედვით, განათლების მიღება ადვილია. სტუდენტების უმეტესობას აქვს მუშაობის შესაძლებლობა — 40-45 საათი კვირაში, რაც განათლების მიღებას საკმაოდ გამომწვევს ხდის. მე გავაკეთე დოკუმენტი, რომელიც მაძლევს საშუალებას, ვიმუშაო ჩემს სფეროში, რომელიც მხოლოდ ბიზნეს ანალიტიკას მოიცავს. ამ საბუთის მიღება ძალიან რთულია, თითქმის შეუძლებელი, მაგრამ თუ გჯერა საკუთარი თავის, როგორც პიროვნების და მზად ხარ, ამ რთული ნაბიჯის გადასადგმელად, შეუძლებელი არაფერია. დოკუმენტის აპლიკაციის შესავსებად და სხვადასხვა ინტერვიუებზე დასასწრებად ერთი წელი დამჭირდა, შემდეგ პოზიტიური პასუხის მიღებას კიდევ ერთი წელი ველოდი.
დღესდღეობით, ვმუშაობ „Full time“ — თითქმის 50-55 საათი კვირაში, მენეჯერად, ერთ-ერთ პოპულარულ ავსტრალიულ-ამერიკულ რესტორანში — „Outback Steakhouse“. ვიდრე სტუდენტები ამერიკაში წამოსვლას გადაწყვეტენ, მზად უნდა იყვნენ რთული სამუშაოსა და სასწავლო გრაფიკისთვის.
თავისუფალი დრო და ამერიკული სტუდენტური ცხოვრება
რაც შეეხება იმ ძალიან ცოტა თავისუფალ დროს, რაც მე მაქვს, უმეტესად, მეგობრებთან ერთად ვატარებ. ამერიკელ ახალგაზრდებს, როგორც ქართველებს, უყვართ თავისუფალი დროის გატარება კაფეტერიებსა და სხვადასხვა რესტორნებში, სადაც თითქმის ყოველთვის შეგიძლია შეხვდე საინტერესო ადამიანებს და გაეცნო მათ საქმიანობებს. ჩემი ამჟამინდელი სამსახური სწორედ ერთ-ერთ ბარში შემომთავაზა უცხო პირმა, რომელსაც საქართველოზე, ჩემს გამოცდილებაზე ვესაუბრე. მასზე ისეთი შთაბეჭდილება მოვახდინე, რომ სამსახური შემომთავაზა და ორ კვირაში, ერთ-ერთ ყველაზე პოპულარულ რესტორანშიმ მენეჯერად დავიწყე მუშაობა. ამერიკა სავსეა შესაძლებლობებით და შენი დამოკიდებულება ხალხისადმი დიდ როლს თამაშობს ამ შესაძლებლობების გაჩენისთვის.
ძალიან რთულია საქართველოდან შორს ყოფნა. მიყვარს ჩემი ქვეყანა და შესაძლებლობა იმისა, რომ იგი მსოფლიოს გავაცნო, დიდ მოტივაციას მაძლევს. ეს კი გადამწყვეტი ფაქტორია ჩემს ყველა წარმატებაში.
ესაუბრა მაკა ყიფიანი
